សៀមរាបៈ លោក ឃឹម ហ្វី​ណង់ អភិបាលរង​ខេត្តសៀមរាប​បានលើកឡើង​ថា ទន្ទឹមនឹង​ការ​ងើបឡើង​វិញ​ជា​បណ្តើរៗ នៃ​វិស័យ​ទេសចរណ៍​សម្រាប់​ខេត្តសៀមរាប​នេះ​គឺ​ទាមទារ​ឱ្យមាន​ការបណ្តុះបណ្តាល​នូវ​សមត្ថភាព​ជំនាញ​ដល់​បុគ្គលិក ដែល​កំពុង​បម្រើការ​ក្នុង​វិស័យ​ទេសចរណ៍ ដែលជា​មូលដ្ឋាន​យុទ្ធសាស្ត្រ​នៃ​ការពង្រឹង​គុណភាព​សេវាកម្ម និង​ការផ្តល់សេវា​ប្រកបដោយ​សេចក្តី​ពេញចិត្ត​ដល់​ភ្ញៀវទេសចរ​។

​លោក​អភិបាលរង​ខេត្តសៀមរាប​លើកឡើង​បែបនេះ​ក្នុង​ពិធី​បើក​កម្មវិធី “​ហាត់​ការ​វិជ្ជាជីវៈ​តាម​អាជីវកម្ម​សណ្ឋាគារ និង​ភោជនីយដ្ឋាន លើ​ជំនាញ​ការិយាល័យ​ជួរមុខ គេហកិច្ច ម្ហូបអាហារ និង​ភេសជ្ជៈ​”​នៅ​នឹង​ថ្ងៃទី​១ ខែធ្នូ ឆ្នាំ​២០២២ ដែល​កម្មវិធី​នេះ ធ្វើឡើង​ក្រោម​អធិបតីភាព លោក ប៉ាក់ សុខុម រដ្ឋលេខាធិការ​ក្រសួងទេសចរណ៍​។​

​លោក​ថ្លែងថា​៖«​ការបណ្តុះបណ្តាល​នូវ​សមត្ថភាព​ជំនាញ​ដល់​បុគ្គលិក ដែល​កំពុង​បម្រើការ​ក្នុង​វិស័យ​ទេសចរណ៍ ដែល​វា​ជា​មូលដ្ឋាន​យុទ្ធសាស្ត្រ​នៃ​ការពង្រឹង​គុណភាព​សេវាកម្ម និង​ការផ្តល់សេវា​ប្រកបដោយ​សេចក្តី​ពេញចិត្ត​ដល់​ភ្ញៀវទេសចរ ជាពិសេស​គឺ​បាន​បង្កើន​នូវ​ផលិតភាព​ការងារ ពង្រឹង​ឧត្តមភាព​ប្រកួតប្រជែង ជំរុញ​ការបង្កើត​ថ្មី និង​ភាព​ច្នៃប្រឌិត​ខ្ពស់​សម្រាប់​បុគ្គលិក​»​។​

​លោក​បន្តថា ការបើក​កម្មវិធី​ហាត់​ការ​វិជ្ជាជីវៈ​តាម​អាជីវកម្ម​សណ្ឋាគារ និង​ភោជនីយដ្ឋាន នាពេលនេះ​គឺ​ពិត​ជាមាន​សារៈសំខាន់ និង​ភាពចាំបាច់​ខ្លាំងណាស់​សម្រាប់​ទ្រទ្រង់​ដល់​វិស័យ​ទេសចរណ៍ ដោយ​ក្នុង​រយៈពេល​២​ឆ្នាំ​កន្លងមកនេះ បុគ្គលិក​ជំនាញ​ដែល​ធ្លាប់​បម្រើការ​ក្នុង​វិស័យ​ទេសចរណ៍​បាន​ងាក​ទៅ​បម្រើការ​នៅក្នុង​វិស័យ​ផ្សេង​ដែល​មិនមែនជា​ជំនាញ​របស់ខ្លួន ដែល​ធ្វើឱ្យ​ធនធានមនុស្ស​ក្នុង​វិស័យ​ទេសចរណ៍​បានទទួល​រង​នូវ​ផលប៉ះពាល់​យ៉ាងខ្លាំង​។

​លោក​បញ្ជាក់ថា​៖«​តាមរយៈ​កម្មវិធី​អភិវឌ្ឍន៍​ជំនាញ​នេះ គឺ​បាន​ឆ្លុ​ង​បញ្ចាំង​ពី​ការត្រៀមខ្លួន​យ៉ាង​ពេញលេញ​របស់​យើងទាំងអស់គ្នា ក្នុង​ការទទួល​ភ្ញៀវទេសច​រ​ដែល​នឹង​ចូលមក​ទស្សនា​ក្នុងប្រទេស​កម្ពុជា ក៏ដូចជា​ខេត្តសៀមរាប​នាពេលខាងមុខ ជាពិសេស​ក្នុង​ឆ្នាំ​២០២៣ ខាងមុខ ជា​ឆ្នាំ​ដែល​កម្ពុជា​នឹងធ្វើ​ជា​ម្ចាស់ផ្ទះ​ព្រឹត្តិការណ៍​កីឡា​ស៊ី​ហ្គេម​-​អាស៊ាន​ប៉ា​រ៉ា​ហ្គេម​»​។​

​លោក​អភិបាលរង​ខេត្តសៀមរាប​លើកឡើងថា ដោយមាន​ការយកចិត្ត​ទុកដាក់​ពី​រាជរដ្ឋាភិបាល​កម្ពុជា ជាពិសេស​ដោយមាន​ការ​ចង្អុលបង្ហាញ​ពី​ក្រសួងទេសចរណ៍ និង​មានការ​គាំទ្រ​ពី​ក្រសួង ស្ថាប័ន​ពាក់ព័ន្ធ​នានា ព្រមទាំង​មាន​កិច្ចសហប្រតិបត្តិការ​ល្អ​ជាមួយ​ផ្នែក​ឯកជន និង​ដៃគូ​អភិវឌ្ឍន៍​នានា រួមជាមួយ​នឹង​ការចូលរួមចំណែក​គាំទ្រ​ពី​សំណាក់​ប្រជាពលរដ្ឋនៅក្នុង​ខេត្ត​ផ្ទាល់ ព្រម​ជាមួយនឹង​ការចូលរួម​ពី​ភ្ញៀវទេសចរ​ជាតិ​-​អន្តរជាតិ បានធ្វើឱ្យ​វិស័យ​ទេសចរណ៍​ខេត្តសៀមរាប មានការ​អភិវឌ្ឍ​រីកចម្រើន​ពីមួយ​ឆ្នាំទៅ​មួយឆ្នាំ និង​បាន​ចូលរួមចំណែក​ក្លាយជា​វិស័យ​ដ៏​សំខាន់​មួយ​របស់​រាជរដ្ឋាភិបាល​កម្ពុជា ក្នុងការ​កាត់បន្ថយ​ភាពក្រីក្រ និង​ជំរុញ​កំណើន​GDP របស់​ប្រទេស​ក្នុង​រយៈពេល​ជាង​២​ទសវត្សរ៍​កន្លងមក​នេះ​៕​