ភ្នំពេញៈ លោក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុងបានណែនាំដល់សវនដ្ឋានទាំងអស់ កែលម្អចំណុចខ្វះខាតដែលកើតមាននៅសវនដ្ឋាន និងត្រូវយកចិត្តទុកដាក់តាមដានរាល់អនុសាសន៍ ដែលបានដាក់ជូននៅពេលចុះធ្វើសវនកម្ម សវនដ្ឋាន ហើយត្រូវធ្វើរបាយការណ៍ឆ្លើយតបមកសវនកម្មផ្ទៃក្នុងឱ្យទាន់ពេលវេលា។
លោកអគ្គនាយកនៃអគ្គនាយកដ្ឋានសវនកម្មផ្ទៃក្នុងបានធ្វើការណែនាំបែបនេះ ក្នុងពិធីឆ្លងរបាយការណ៍ និងបិទការងារសវនកម្មផ្ទៃក្នុងនៅមណ្ឌលអប់រំកែប្រែទី១ នារសៀលថ្ងៃសុក្រ ទី២ ខែធ្នូ ឆ្នាំ២០២២។ ដោយមានការអញ្ជើញចូលរួមពី លោក លោកស្រី អគ្គនាយករង ប្រធានមណ្ឌលអប់រំកែប្រែទី១ អនុប្រធានមណ្ឌល ប្រធានការិយាល័យចំណុះមណ្ឌលអប់រំកែប្រែទី១ និងសមាជិកគណៈប្រតិភូសវនកម្មផ្ទៃក្នុងផងដែរ។
លោកថ្លែងថា៖«ត្រូវយកចិត្តទុកដាក់តាមដានរាល់អនុសាសន៍ ដែលបានដាក់ជូននៅពេលចុះធ្វើសវនកម្ម សវនដ្ឋាន ហើយត្រូវធ្វើរបាយការណ៍ឆ្លើយតបនិងលទ្ធផលសម្រេចបានក្នុងរយៈពេល ៦ខែ ឬយ៉ាងយូរបំផុត ១២ខែ ជូនមកសវនកម្មផ្ទៃក្នុង»។
លោក ងួន ស្រេង លើកឡើងថា ការចុះធ្វើសវនកម្មគឺផ្តោតសំខាន់លើការពង្រឹងអភិបាលកិច្ច និងសុចរិតភាពនៃការគ្រប់គ្រង បុគ្គលិក ការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ ព្រមទាំងការអភិវឌ្ឍសមត្ថភាពអង្គភាព ទាំងនៅថ្នាក់ជាតិ និងថ្នាក់ក្រោមជាតិ ដែលស្ថិតក្រោមដែនសមត្ថកិច្ចក្រសួងមហាផ្ទៃ។
លោកថ្លែងថា៖«ការនេះសំដៅរួមចំណែកពង្រឹងអភិបាលកិច្ចល្អ សន្តិសុខ សុវត្ថិភាព សណ្តាប់ធ្នាប់សង្គម និងការអភិវឌ្ឍសេដ្ឋកិច្ចជាតិ ការត្រួតពិនិត្យហានិភ័យដែលកើតឡើងក្នុងកិច្ច ប្រតិបត្តិការរបស់សវនដ្ឋាននីមួយៗ និងដើម្បីចុះធ្វើសវនកម្មតាមផែនការប្រចាំឆ្នាំ របស់ក្រសួងមហាផ្ទៃ និងត្រួតពិនិត្យឡើងវិញនូវការតាមដាន ការអនុវត្តអនុសាសន៍កែលម្អ ដើម្បីឱ្យមានប្រសិទ្ធភាព តម្លាភាព និងគណនេយ្យភាព»៕