.jpg)
ទីតាំងមជ្ឈមណ្ឌលស្តារលទ្ធភាពពលកម្មកាយសម្បទា នៅខេត្តសៀមរាប ដែលត្រូវបានសម្ពោធដាក់ឱ្យប្រើប្រាស់ កាលពីថ្ងៃទី១ ធ្នូ។ រូបថត រដ្ឋបាលខេត្តសៀមរាប
សៀមរាបៈ អគារមជ្ឈមណ្ឌលស្តារលទ្ធភាពពលកម្មកាយសម្បទា ដែលមានទីតាំងនៅខេត្តសៀមរាប ត្រូវបានសម្ពោធដាក់ឱ្យប្រើប្រាស់កាលពីសប្តាហ៍មុន ដើម្បីផ្តល់សេវាស្តារលទ្ធភាពពលកម្មកាយសម្បទា ដល់ជនពិការ ចំនួន៣ខេត្ត គឺខេត្តសៀមរាប ខេត្តកំពង់ធំ និងខេត្តព្រះវិហារ។
រដ្ឋបាលខេត្តសៀមរាប ឱ្យដឹងថា អគារថ្មីនៃមជ្ឈមណ្ឌលស្តារលទ្ធភាពពលកម្មកាយសម្បទាខេត្តសៀមរាប ស្ថិតក្នុងភូមិវិហារចិន សង្កាត់ស្វាយដង្គំ ក្រុងសៀមរាប ត្រូវបានសម្ពោធកាត់ខ្សែបូដាក់ឱ្យប្រើប្រាស់ជាផ្លូវការឡើងវិញ នៅព្រឹកថ្ងៃទី១ ខែធ្នូ ឆ្នាំ២០២២។ ទីតាំងអគារថ្មីនេះសម្រាប់ការផ្តល់សេវាស្តារលទ្ធភាពពលកម្មកាយសម្បទា ដល់ជនពិការ ចំនួន៣ខេត្ត គឺខេត្តសៀមរាប ខេត្តកំពង់ធំ និងខេត្តព្រះវិហារ។
រដ្ឋបាលខេត្តបញ្ជាក់ថា៖«ការទទួលបានអគារថ្មីនេះ ស្របទៅនឹងកំណើននៃតម្រូវការសេវាស្តារលទ្ធភាពពលកម្មកាយសម្បទា វត្តមាននៃសេវាស្តារ ប្រកបដោយគុណភាព និងអាចទទួលយកបាន ដោយពុំមានឧបសគ្គ ពិតជាមិនអាចខ្វះបាន ដើម្បីចូលរួមគាំទ្រដល់ជនពិការក្នុងជីវិតរស់នៅប្រចាំថ្ងៃ ប្រកបដោយភាពថ្លៃថ្នូរ និងស្មើភាពគា្នក្នុងសង្គម»។
លោកនាក់ ណេរ៉ុន អភិបាលរងខេត្តសៀមរាប បានថ្លែងនាឱកាសនោះថា បច្ចុប្បន្ន កម្ពុជា ជាប្រទេស១ ដែលនៅតែធានាបាននូវឯកភាពជាតិ និងទឹកដីសន្តិភាព និងស្ថិរភាពខាងនយោបាយ សន្តិសុខ និងសណ្តាប់ធ្នាប់សង្គមល្អប្រសើរ ដែលជាមូលដ្ឋានគ្រឹះសម្រាប់កម្ពុជាធ្វើដំណើរលើមាគ៌ានៃការគោរពសិទ្ធិមនុស្ស ការពង្រឹងនីតិរដ្ឋ និងលទ្ធិប្រជាធិបតេយ្យ ការអភិវឌ្ឍសេដ្ឋកិច្ច និងការកាត់បន្ថយភាពក្រីក្រ។
ជាមួយគ្នានោះ លោក ស៊ឹម សុធន ប្រតិភូរាជរដ្ឋាភិបាលកម្ពុជា ទទួលបន្ទុកជានាយកនៃមូលនិធិជនពិការ ក៏បានសម្តែងនូវអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនអូស្ត្រាលី ដែលតែងតែផ្តល់ការគាំទ្រ និងការយកចិត្តទុកដាក់ដល់វិស័យពិការភាព។
លោកបញ្ជាក់ថា៖«ជាពិសេស ការងារស្តារលទ្ធភាពពលកម្មកាយសម្បទានៅកម្ពុជា ជាង១ទសវត្សរ៍កន្លងមកនេះ ក្រោមការយកចិត្តទុកដាក់ គិតគូរពីសំណាក់រាជរដ្ឋាភិបាលកម្ពុជា តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា និងដោយមានការចូលរួមចំណែកពីអាជ្ញាធរខេត្ត និងការគាំទ្របន្ថែម ពីរដ្ឋាភិបាលអូស្ត្រាលី តាមរយៈ កម្មវិធីACCESS»។
លោកស៊ឹម សុធន បន្ថែមថា ទោះបីជាមានបញ្ហាប្រឈមយ៉ាងណាក៏ដោយ ក៏មូលនិធិជនពិការ នៅតែខិតខំប្រឹងប្រែងជំរុញការផ្តល់សេវាជូនជនពិការ និងខិតខំស្នើសុំថវិកា ពីក្រសួងសេដ្ឋកិច្ច និងហិរញ្ញវត្ថុ ក៏ដូចជាដៃគូពាក់ព័ន្ធដើម្បីផ្តល់សេវាជូនបងប្អូនជនពិការឱ្យបានកាន់តែប្រសើរថែមទៀត ។
បើតាមរបាយការណ៍របស់មជ្ឈមណ្ឌលស្តារលទ្ធភាពពលកម្មកាយសម្បទា គិតពីឆ្នាំ១៩៩១មក មានអតិថិជនជាង ៨ ០០០នាក់បានមកទទួលសេវាស្តារពីមជ្ឈមណ្ឌលនេះ។ តួលេខនេះនៅមានចំនួនទាបនៅឡើយ ដោយមូលហេតុកង្វះនៃការផ្សព្វផ្សាយអំពីសេវាស្តារ ដែលផ្តល់ជូនដោយមជ្ឈមណ្ឌលនេះ។ កង្វះកិច្ចសហការពីស្ថាប័នពាក់ព័ន្ធ អាជ្ញាធរមូលដ្ឋាន និងអង្គការជនពិការ។ល។ ក្នុងនោះ តម្រូវការនៃសេវាស្តារ ឧបករណ៍ជំនួយ រួមទាំងរទេះរុញ មានការកើនឡើង ធនធានមនុស្ស និងធនធានថវិកា នៅមានកម្រិត។
នាឱកាសនោះ លោកស៊ឹម សុធន ក៏បានស្នើដល់អាជ្ញាធរ និងស្ថាប័នពាក់ព័ន្ធ អង្គការដៃគូ រួមទាំងបងប្អូនជនពិការ និងក្រុមគ្រួសារ បន្តការគាំទ្រដល់មជ្ឈមណ្ឌលស្តារ និងជួយផ្សព្វផ្សាយដល់សាធារណជនឱ្យបានទូលំទូលាយ អំពីសេវារបស់មជ្ឈមណ្ឌលស្តារ ដើម្បីជាប្រយោជន៍ដល់ជនពិការ និងការចូលរួមកសាងសង្គម១ប្រកបដោយបរិយាប័ន្ន។
ក្នុងសារលិខិតរបស់លោកនាយករដ្ឋមន្ត្រី ហ៊ុន សែន នាឱកាសទិវាជនមានពិការភាពកម្ពុជា លើកទី២៤ និងទិវាជនមានពិការភាពអន្តរជាតិលើកទី៤០ ថ្ងៃទី៣ ខែធ្នូ ឆ្នាំ២០២២ ក្រោមប្រធានបទ «ពិការភាពទាំងអស់មិនអាចកំណត់ដោយការមើលនឹងភ្នែកនោះទេ» បានឱ្យដឹងថា ក្នុងឆ្នាំ២០២២ ជនមានពិការភាពចូលបម្រើការងារក្នុងក្រសួងស្ថាប័នរដ្ឋចំនួន៣៧ មានចំនួន៣ ៧៤៨នាក់។ ក្នុងនោះស្ត្រីមានពិការភាពចំនួន ៨៦២នាក់ ជនមានពិការភាពកម្រិតធ្ងន់ចំនួន ២ ២៦០នាក់ បើគិតជាភាគរយ ២,០១% កើនលើសឆ្នាំ២០២១។
ដោយឡែក វិស័យឯកជន រួមមាន ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ និងរោងចក្រ បានចុះបញ្ជិកា និងទទួលបានវិញ្ញាបនបត្រលើការអនុវត្តច្បាប់ស្ដីពីកិច្ចការពារ និងលើកកម្ពស់សិទ្ធិជនពិការទូទាំងប្រទេស មានចំនួន ២៩១គ្រឹះស្ថាន រោងចក្រ សហគ្រាស ដែលមានជនមានពិការភាពចូលបម្រើការងារចំនួន ៥ ៨៣៩នាក់ ស្ត្រីមានពិការភាព ៣ ៨៣៦នាក់ សរុបទាំងស្ថាប័នរដ្ឋ និងវិស័យឯកជនទូទាំងប្រទេស មានចំនួនជនមានពិការភាព ៩ ៥៨៧នាក់កំពុងបម្រើការងារ៕
