ភ្នំពេញៈ លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានចេញសេចក្តីណែនាំជុំវិញការពង្រឹងការផ្តល់សេវាសុខាភិបាលនៅតាមមូលដ្ឋានសុខាភិបាលឯកជន បន្ទាប់ពីកើតមានបាតុភាពអវិជ្ជមានមួយចំនួននាពេលថ្មីៗនេះ និងបានក្រើនរំឭកដល់បណ្តាមូលដ្ឋានសុខាភិបាលឯកជនទាំងអស់ឱ្យគោរពឱ្យម៉ឺងម៉ាត់នូវដំណើរការបច្ចេកទេស តួនាទី ភារកិច្ច និងក្រមសីលធម៌វិជ្ជាជីវៈរៀងៗខ្លួន ដោយអនុលោមតាមច្បាប់ជាធរមាន។
នៅថ្ងៃទី៤ ខែធ្នូ ឆ្នាំ២០២២ លោក ម៉ម ប៊ុនហេង បានចេញសេចក្តីណែនាំរបស់ខ្លួនដោយភ្ជាប់ជាមួយក្រមច្បាប់មួយចំនួនសម្រាប់មូលដ្ឋានសុខាភិបាលឯកជនក្រោមមូលបទ «ការពង្រឹងការផ្តល់សេវាសុខាភិបាលនៅតាមមូលដ្ឋានសុខាភិបាលឯកជន»។
លោក ម៉ម ប៊ុនហេង បានសង្កត់ធ្ងន់ដល់បណ្តាមន្ទីរពេទ្យឯកជនថា ដោយសង្កេតឃើញថា ការគ្រប់គ្រង និងការផ្តល់សេវាសុខាភិបាលនៅតាមមូលដ្ឋានសុខាភិបាលឯកជនមួយចំនួនតូចមានលេចចេញបាតុភាពជាបន្តបន្ទាប់។
លោកថា ៖ «អ្នកដែលប្រព្រឹត្តខុសវិជ្ជាជីវៈ ឬមានការធ្វេសប្រហែសលើការងារគ្រប់គ្រងមូលដ្ឋានសុខាភិបាលឯកជនរបស់ខ្លួន ឬធ្វើឱ្យមានកំហុសបច្ចេកទេសធ្ងន់ធ្ងរណាមួយបន្ថែមលើការដាក់វិន័យ នៃគណៈវិជ្ជាជីវៈនីមួយៗ នឹងត្រូវប្រឈមទៅនឹងច្បាប់ទៅតាមសណ្ឋានទម្ងន់ទោសដែលមានចែងនៅក្នុងច្បាប់»។
សូមបញ្ជាក់ថា ក្រសួងសុខាភិបាលបានចេញសេចក្តីណែនាំដោយភ្ជាប់ជាមួយក្រមច្បាប់ចំនួន២ ពាក់ព័ន្ធនឹងទី១ ច្បាប់ស្តីពីការរំលូតកូន និងទី២ ច្បាប់ស្តីពីការគ្រប់គ្រងអ្នកប្រកបវិជ្ជាជីវៈសុខាភិបាល។ ក្រសួងក៏បានអំពាវនាវដល់រដ្ឋបាលថ្នាក់ក្រោមជាតិ និងមន្ទីរសុខាភិបាលរាជធានី-ខេត្ត យកចិត្តទុកដាក់ត្រួតពិនិត្យការងារផ្តល់សុខាភិបាល ការចេញអាជ្ញាប័ណ្ណ ច្បាប់អនុញ្ញាតនានាចំពោះសេវាសុខាភិបាលឯកជន និងអំពាវនាវឱ្យពលរដ្ឋទៅពិនិត្យនិងពិគ្រោះជំងឺជាមួយមូលដ្ឋានសុខាភិបាលដែលមានជំនាញត្រឹមត្រូវ ចៀសវាងជួបហេតុការណ៍ជាយថាហេតុណាមួយ។
ជុំវិញបញ្ហានេះដែរ លោក អ៊ូច វុទ្ធី ប្រធានសមាគមគ្រូពេទ្យគុណធម៌កម្ពុជា សាទរចំពោះចំណាត់ការរបស់ក្រសួងសុខាភិបាលចំពោះជំហររឹតបន្តឹងចំពោះគុណភាពនៃបណ្តាមូលដ្ឋានសេវាសុខាភិបាលឯកជន ដើម្បីឱ្យអ្នកជំនាញផ្នែកនេះយកចិត្តទុកដាក់លើវិជ្ជាជីវៈ និងក្រមសីលធម៌ខ្លួនបន្ថែម នៅចំពោះមុខកម្សោយនៃការយកចិត្តទុកដាក់និងបញ្ហាបច្ចេកទេសមួយចំនួននៅតាមបណ្តាគ្លីនិកឯកជន។
លោកអ៊ូច វុទ្ធី ថ្លែងថា៖ «សព្វថ្ងៃនេះ យើងឃើញបុគ្គលមួយចំនួនយកលាភសក្ការៈជាធំ ដែលអាចបង្កជាគ្រោះថ្នាក់សុខាភិបាលច្រើន កន្លែងហ្នឹង ខ្ញុំសូមអំពាវនាវដល់បងប្អូនដែលជាគ្រូពេទ្យទាំងឡាយ ត្រូវមានអាកប្បកិរិយាល្អដើម្បីជួយដល់បងប្អូនប្រជាពលរដ្ឋ កុំរវល់គិតលុយជាធំ»។
លោកបានបន្ថែមថា៖ «ត្រូវព្យាបាលពួកគាត់ជាមុន ហើយលុយវាមកតាមក្រោយទេ បើគាត់អត់ហើយ លើកដៃសំពះហើយ គួរអនុគ្រោះគាត់ទៅ។នៅតាមឱសថស្ថានឯកជនខ្លះ មានទាំងថ្នាំហួសកាលបរិច្ឆេទកំណត់ផង ដែលជារឿងគួរឱ្យព្រួយបារម្ភខ្លាំងណាស់»។
លោក វុទ្ធី ថ្លែងបន្តថា បញ្ហានៅតាមបណ្តាគ្លីនិកឯកជនក្នុងស្រុកមួយចំនួនគឺដោយសារកង្វះការយកចិត្តទុកដាក់នៅតាមបណ្តាគ្លីនិកឯកជនទាំងនោះផ្ទាល់ដែលមិនអនុលោមតាមវិជ្ជាជីវៈខ្លួនត្រឹមត្រូវ ដែលករណីខ្លះ លោកថា គ្រូពេទ្យដែលមានភារៈវះកាត់ ព្យាបាលអ្នកជំងឺ ធ្វើសេចក្តីសម្រេចចិត្តអត្តនោម័តមិនពិគ្រោះជាមួយនាយកធំ មុនព្យាបាល ឬ ករណីខ្លះថៅកែដែលគ្មានវិជ្ជាជីវៈជាគ្រូពេទ្យបែរជាបញ្ជាគ្រូពេទ្យទៅវិញដោយមិនអនុលោមតាមក្បួនខ្នាតត្រឹមត្រូវ។
លោកអ៊ូច វុទ្ធី ក៏បានអំពាវនាវដល់ក្រសួងសុខាភិបាល និងស្ថាប័នពាក់ព័ន្ធធ្វើការរឹតបន្តឹង និងចុះត្រួតពិនិត្យជាប្រចាំឱ្យបានញឹកញាប់លើការអនុវត្តក្រមសីលធម៌ និងវិជ្ជាជីវៈនៅតាមបណ្តាមូលដ្ឋានសុខាភិបាលឯកជនទាំងឡាយ ហើយក្នុងការត្រួតពិនិត្យត្រូវរក្សាការសម្ងាត់ ដោយមិនគួរប្រាប់ដំណឹងជាមុន ដែលធ្វើឱ្យបណ្តាមន្ទីរពេទ្យឯកជនបានត្រៀមខ្លួនរៀបរយទុកមុន ខុសពីការអនុវត្តប្រចាំថ្ងៃលើការផ្តល់សេវារបស់ខ្លួន។
ស្រដៀងគ្នានេះដែរ លោកវេង គឹមយូ ជាគ្រូពេទ្យនៃមណ្ឌលសុខភាពមួយកន្លែងក្នុងខេត្តបាត់ដំបង ថ្លែងថា កម្រិតនៃភាពទទួលខុសត្រូវរបស់បណ្តាមូលដ្ឋានសុខាភិបាលឯកជនអាស្រ័យទៅតាមតម្លៃសេវា ពោលគឺនៅតាមគ្លីនិកដែលមានកញ្ចប់សេវាថ្លៃ។ តួយ៉ាងនៅទីក្រុង គេផ្តល់សេវាព្យាបាលដែលល្អ មានការយកចិត្តទុកដាក់ខ្ពស់ និងសមត្ថភាពគ្រូពេទ្យពូកែ ខណៈបណ្តាគ្លីនិកដែលមានកញ្ចប់សេវាថោក។
លោកថា នៅតាមបណ្តាខេត្ត កម្រិតសេវាព្យាបាលមិនសូវជាល្អ ហើយបច្ចេកទេសព្យាបាល និងសមត្ថភាពគ្រូពេទ្យក៏នៅមានកម្រិតទៅតាមហ្នឹងដែរ។
លោកវេង គឹមយូ ថ្លែងថា៖ «ក្នុងករណីអ្នកជំងឺមានស្ថានភាពធ្ងន់ធ្ងរ ភាគច្រើននៅតាមបណ្តាពេទ្យឯកជន ពេលខ្លះពួកគាត់មិនទទួលខុសត្រូវទេ ដោយសារពួកគាត់អាងបញ្ជូនទៅកាន់មន្ទីរពេទ្យរដ្ឋវិញ»។
ករណីខ្លះ គ្រូពេទ្យមួយចំនួនដែលបម្រើការនៅពេទ្យរដ្ឋ គាត់មកបើកគ្លីនិកឯកជន ហើយនៅពេលមានបញ្ហា ពួកគាត់បញ្ជូនទៅកន្លែងគាត់ធ្វើការ ដោយគេចវេះពីការទទួលខុសត្រូវខ្លួន រួចដាក់បន្ទុកមកកាន់មន្ទីរពេទ្យរដ្ឋវិញ។ នេះបើតាមការបន្ថែមពីលោក វេង គឹមយូ។
គ្រូពេទ្យរូបនេះ សំណូមពរឱ្យរដ្ឋាភិបាល និងស្ថាប័នពាក់ព័ន្ធគួរមានយន្តការត្រួតពិនិត្យណាមួយឲ្យកាន់តែមានប្រសិទ្ធភាពខ្ពស់ក្នុងការតាមដានការអនុវត្តវិជ្ជាជីវៈ និងក្រមសីលធម៌របស់គ្រូពេទ្យនៅតាមបណ្តាគ្លីនិកឯកជន បន្ទាប់ពីបានផ្តល់អាជ្ញាប័ណ្ណអនុអញ្ញាតផ្តល់សេវាសុខាភិបាលពីសំណាក់មូលដ្ឋានសុខាភិបាលឯកជនទាំងឡាយរួចមក និងមានការបណ្តុះបណ្តាលសមត្ថភាពបន្ថែមសម្រាប់គ្រូពេទ្យតាមអង្គភាពឯកជន និងជាពិសេសកាត់បន្ថយអំពើពុករលួយក្នុងវិស័យសុខាភិបាលនេះ។
សូមរំឭកថា នាពេលថ្មីៗនេះ មានការវែកញែក និងលើកឡើងជាសាធារណៈមតិយ៉ាងផុសផុលចំពោះវិជ្ជាជីវៈសុខាភិបាលឯកជននៅកម្ពុជា បន្ទាប់ពីកើតមានករណីស្ត្រីអ្នកជំងឺម្នាក់បានចូលមកសម្រាកនៅ គ្លីនិកដើមអង្គ្រង ដោយរោគវិនិច្ឆ័យ កូនស្លាប់ក្នុងស្បូន អាយុ ១៨សប្តាហ៍។
ជាមួយគ្នានេះដែរក្រសួងតម្រូវឱ្យមន្ទីរសម្រាកព្យាបាលដើមអង្គ្រង ត្រូវទទួលខុសត្រូវចំពោះមុខច្បាប់ជាធរមាន លើបាតុភាពដែលបានកើតមានឡើងដែលបណ្ដាលមកពីការធ្វេសប្រហែសរបស់ខ្លួន។ ការណ៍នេះ ត្រូវបានមហាជនយកមកជជែកយ៉ាងផុសផុលពីស្ថានភាពសុខាភិបាលឯកជនកម្ពុជា ដែលជាបញ្ហាប្រឈមមួយដែលរដ្ឋត្រូវគិតគូរកែប្រែដើម្បីវិស័យសុខភាពសាធារណៈកម្ពុជាមានភាពប្រសើរឡើង៕