ព្រះវិហារៈ អាជ្ញាធរជាតិព្រះវិហារ និងសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) រួមគ្នារៀបចំកម្មវិធី "យាត្រាដើម្បីបេតិកភណ្ឌ" នៅរមណីយដ្ឋានប្រាសាទព្រះវិហារ ក្នុងគោលបំណង់រួមគ្នាស្តាឡើងវិញ នូវវិស័យទេសចរណ៍កម្ពុជា ដែលមានការចូលរួមពីភ្ញៀវជាតិ និងអន្តរជាតិចំនួន៥ ប្រទេស។
អាជ្ញាធរជាតិព្រះវិហារ បានឱ្យដឹងថា ព្រឹត្តិការណ៍នេះ បានធ្វើឡើងកាលពីថ្ងៃទី៤ ធ្នូ ដោយមានការចូលរួមពីភ្ញៀវទេសចរជាតិ និងភ្ញៀវអន្តរជាតិសរុបជិត៣០០នាក់ មកពីប្រទេសចំនួន៥ គឺកម្ពុជា ថៃ ភូមា អេស្ប៉ាញ និងឥណ្ឌូនេស៊ី។ អាជ្ញាធរជាតិព្រះវិហារ បានបញ្ជាក់ថា៖«កម្មវិធីនេះបានចាប់ផ្តើមនៅម៉ោង៦:៣០នាទីព្រឹក ដោយអ្នកចូលរួម ត្រូវដើរដោយថ្មើរជើងចេញដំណើរពីជើងភ្នំប្រាសាទព្រះវិហាររហូតដល់គោបុរៈទី៤នៃប្រាសាទព្រវិហារ ក្នុងចម្ងាយ៧គីឡូម៉ែត្រ ដើម្បីបានទៅដល់គោលដៅ»។
លោក គង់ ពុទ្ធិការ អគ្គនាយកអាជ្ញាធរជាតិប្រាសាទព្រះវិហារ បានប្រាប់ភ្នំពេញប៉ុស្តិ៍នៅថ្ងៃទី៤ ធ្នូថា នេះគឺជាព្រឹត្តិការណ៍ដំបូងបំផុត ដែលអាជ្ញាធរជាតិព្រះវិហារ បានរួមគ្នាជាមួយស្ថាប័នពាក់ព័ន្ធបង្កើតឡើងក្នុងន័យជាផ្នែកមួយក្នុងការផ្សព្វផ្សាយតំបន់ទេសចរណ៍នៅក្នុងប្រាសាទព្រះវិហារ។
លោក បានបញ្ជាក់ថា៖«នេះគឺជាព្រឹត្តិការណ៍ទេសចរណ៍កីឡាដែលយើងធ្វើជាលើកទី១ សម្រាប់ប្រាសាទព្រះវិហាររបស់យើង។ យើងធ្វើនេះ គឺដើម្បីលើកកម្ពស់វិស័យទេសចរណ៍ ដោយយើងដើរដើម្បីបេតិកភណ្ឌ យើងដើរដើម្បីទេសចរណ៍ យើងដើរដើម្បីបរិស្ថាន និងយើងដើរដើម្បីមិត្តភាពរវាងចម្រុះជាតិសាសន៍ដែលមកចូលរួមដើរទាំងអស់គ្នា»។
បើតាមលោក ពុទ្ធិការ ក្នុងរយៈពេល១១ ខែ ឆ្នាំ២០២២នេះ ប្រាសាទព្រះវិហារ ទទួលភ្ញៀវទេសចរជាតិប្រមាណជិត១០ម៉ឺននាក់ ខណៈភ្ញៀវទេសចរអន្តរជាតិមានចំនួនតិចតួចមែនទែនគឺមានប្រមាណ២ ពាន់នាក់ប៉ុណ្ណោះ។ លោក គង់ ពុទ្ធិការ រំពឹងថា ព្រឹត្តិការណ៍នេះ អាចនឹងចូលរួមផ្សព្វផ្សាយ និងទាក់ទាញភ្ញៀវទេសចរមកទស្សនារមណីយដ្ឋានព្រះវិហារឱ្យបានកាន់តែច្រើន បន្ទាប់ពីវិបត្តិកូវីដ១៩ មានស្ថានភាពថមថយទៅវិញ។
លោកបានរៀបរាប់ថា៖«ខ្ញុំសូមអំពាវនាវឱ្យប្រជាជនយើង ទាំងភ្ញៀវជាតិ និងអន្តរជាតិមកទស្សនាប្រាសាទព្រះវិហារដែលជាប្រាសាទមួយមានលក្ខណៈខុសប្លែកពីប្រាសាទផ្សេងៗនៅក្នុងប្រទេសយើង ដែលបានកសាងសង់នៅលើកំពូលភ្នំដងរែក ហើយក៏ជាប្រាសាទមួយបង្ហាញពីនិមិត្តរូបនៃសាមគ្គីភាពរបស់កម្ពុជាផងដែរ»។
នៅក្នុងតំបន់រមណីយដ្ឋានប្រាសាទព្រះវិហារនេះ ក្រៅពីប្រាសាទព្រះវិហារ លោក គង់ ពុទ្ធិការ បានណែនាំថា ភ្ញៀវទេសចរ ក៏អាចមកទស្សនាតំបន់ទេសចរណ៍ជាច្រើនទៀត ដែលមានដូចជា សហគមន៍តំបន់ការពារធម្មជាតិត្មាតប៉ើយ តំបន់ទេសចរណ៍ធម្មជាតិភ្នំត្បែង និងតំបន់រមណីដ្ឋានប្រាសាទកោះកេរផងដែរ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បាននិយាយថា ការរៀបចំព្រឹត្តិការណ៍នេះឡើង គឺជាការរួមចំណែកមួយដើម្បីចូលរួមជាមួយរាជរដ្ឋាភិបាល ក្នុងការស្តារឡើងវិញនូវវិស័យទេសចរណ៍ និងសេដ្ឋកិច្ចក្នុងប្រទេស បន្ទាប់ពីជួបប្រទះនូវវិបត្តិកូវីដ១៩។
បន្ថែមពីនេះ លោក បានអះអាងថា ព្រឹត្តិការណ៍នេះ ក៏ដើម្បីរឹតចំណងមិត្តភាពជាមួយប្រទេសជិតខាង ដូចជាប្រទេសថៃជាដើម ដើម្បីចូលរួមជំរុញនូវសាមគ្គីភាពនៅក្នុងតំបន់អាស៊ានទាំងមូល និងអាចចូលរួមទាក់ទាញភ្ញៀវទេសចរពីប្រទេសទាំងនោះផងដែរ។
លោក ស៊ីណាន បានបញ្ជាក់ថា៖«ព្រឹត្តិការណ៍នេះ មានការចូលរួម និងគាំទ្រយ៉ាងពេញទំហឹងពីអាជ្ញាធរជាតិព្រះវិហារ ក៏ដូចជាក្រសួងវប្បធម៌របស់កម្ពុជា និងក្រសួងទេសចរណ៍។ សូមចូលរួមលើកកម្ពស់ វិស័យទេសចរណ៍ និងបរិស្ថាន តាមរយៈព្រឹត្តិការណ៍កីឡាទាំងអស់គ្នា “កីឡានាំមកនូវសុខភាព និងមិត្តភាព”យើងរួមគ្នាដើរដើម្បីបេតិកភណ្ឌ(មរតក) ទេសចរណ៍ បរិស្ថាន មិត្តភាព និងការអភិវឌ្ឍសេដ្ឋកិច្ចមូលដ្ឋាន តាមរយៈព្រឹត្តិការណ៍កីឡាទេសចរណ៍»៕
វីដេអូ៖