ភ្នំពេញៈ គិតមកទល់ពេលនេះ ប្រជាកសិករក្នុងខេត្តគោលដៅចំនួន១៦ ដែលរងគ្រោះដោយទឹកជំនន់ បានដាំស្រូវស្ដារឡើងវិញ សម្រេចបានជាង៩៩ភាគរយហើយ។ នេះបើយោងតាមទិន្នន័យដែលទទួលបានពីក្រសួងកសិកម្ម រុក្ខាប្រមាញ់ និងនេសាទ។
គ្រោះទឹកជំនន់ក្នុងឆ្នាំ២០២២ បានបង្កផលប៉ះពាល់ និងខូចខាតដំណាំស្រូវជិត២០ម៉ឺនហិកតា របស់ប្រជាកសិករនៅក្នុងរាជធានី-ខេត្តចំនួន១៦ រួមមាន រាជធានីភ្នំពេញ ខេត្តកំពត តាកែវ កណ្ដាល ព្រៃវែង ស្វាយរៀង ត្បូងឃ្មុំ កំពង់ចាម កំពង់ធំ សៀមរាប ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង និងខេត្តក្រចេះ។ ក្នុងនោះ ខូចខាតទាំងស្រុងអស់ជាង១១ម៉ឺនហិកតា។ ក្រៅពីដំណាំស្រូវ ដំណាំផ្សេងៗ និងហេដ្ឋារចនាសម្ព័ន្ធមួយចំនួន ក៏បានរងផលប៉ះពាល់ និងខូចខាតផងដែរ។
ការខូចខាតផលស្រូវដ៏ច្រើនសន្ធឹកសន្ធាប់នេះ បានប៉ះពាល់យ៉ាងខ្លាំងដល់ជីវភាពរស់នៅរបស់ប្រជាកសិករនៅក្នុងតំបន់ទីជនបទ។ ដោយមើលឃើញពីទុក្ខលំបាកនេះ លោកនាយករដ្ឋមន្ត្រី ហ៊ុន សែន បានជំរុញដល់ក្រសួង និងអាជ្ញាធរពាក់ព័ន្ធ បញ្ចេញស្រូវពូជជាច្រើនពាន់តោន ផ្ដល់ជូនដល់គ្រួសារកសិករ រងគ្រោះ ដើម្បីដាំស្ដារឡើងវិញ ក្នុងគោលបំណងធ្វើឱ្យប្រសើរឡើងនូវសន្តិសុខស្បៀង នៅកម្ពុជា។
កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ បានប្រាប់ភ្នំពេញប៉ុស្តិ៍ថា ក្រោយទទួលបានស្រូវពូជ និងបន្ទាប់ពីទឹកជំនន់បានស្រកអស់ពីក្នុងដីស្រែ កសិករនៅក្នុងបណ្ដារាជធានី-ខេត្ត ដែលរងគ្រោះដោយទឹកជំនន់ទាំងនោះ បានចាប់ផ្ដើមដាំដុះស្រូវស្ដារឡើងវិញជាបន្តបន្ទាប់ ដែលគិតមកទល់ពេលនេះ បានសម្រេច១០០ភាគរយហើយ លើកលែងតែនៅខេត្តសៀមរាបមួយប៉ុណ្ណោះ ដែលនៅមិនទាន់បានសម្រេច១០០ភាគរយ ដោយសារកង្វះគ្រឿងចក្រភ្ជួររាស់ដី និងប្រព័ន្ធស្រោចស្រព។
កញ្ញា រចនា បានបញ្ជាក់ថា៖«វឌ្ឍនភាពនៃការដាំស្រូវស្តារឡើងវិញ គិតត្រឹមថ្ងៃទី៤ ខែធ្នូ ឆ្នាំ២០២២ ការដាំស្ដារដំណាំស្រូវ បានសម្រេចជាង៦៣ពាន់ហិកតា ស្មើ៩៩,១២ភាគរយនៃផ្ទៃដីត្រូវដាំស្ដារឡើងវិញសរុបជាង៦៨ពាន់ហិកតា។ ក្នុងនោះរាជធានី-ខេត្តចំនួន១៥បានដាំស្រូវស្តារឡើងវិញ សម្រេចបាន១០០ភាគរយតាមផែនការដែលបានគ្រោងទុក។ ដោយឡែកនៅខេត្តសៀមរាប មានសភាពយឺតយ៉ាវបន្តិច ដោយគិតមកទល់ពេលនេះ ទើបតែសម្រេចបានជាង ៨០ភាគរយប៉ុណ្ណោះ»។
ជុំវិញករណីនេះ លោក ទា គឹមសុទ្ធ ប្រធានមន្ទីរកសិកម្មខេត្តសៀមរាប បានប្រាប់ភ្នំពេញប៉ុស្តិ៍ថា គិតមកទល់ពេលនេះ ក្រៅពីស្រុកស្រីស្នំ នៅបណ្ដាស្រុកផ្សេងៗទៀតក្នុងខេត្តសៀមរាប ប្រជាកសិករបានដាំស្រូវស្ដារឡើងវិញសម្រេចបាន១០០ភាគរយហើយ។ ចំណែកនៅស្រុកស្រីស្នំ ការដាំស្ដារឡើងវិញទើបតែសម្រេចបានលើផ្ទៃដីជាង៦ ០០០ហិកតា ឬស្មើជាង៥០ភាគរយនៃផ្ទៃដីដែលត្រូវដាំស្ដារឡើងវិញសរុប១ ១០០ហិកតា។
លោកថ្លែងថា៖«ភាគយឺតយ៉ាវរបស់កសិករនៅក្នុងស្រុកស្រីស្នំ គឺដោយសារកង្វះគ្រឿងចក្រភ្ជួរាស់ដី និង កង្វះប្រព័ន្ធប្រឡាយសម្រាប់នាំទឹកទៅស្រោចស្រព ដែលធ្វើឱ្យកសិករ ដែលពួកគាត់ទទួលបានស្រូវពូជហើយ ស្ទាក់ស្ទើក្នុងការដាំស្ដារឡើងវិញ ហើយយកពូជស្រូវទាំងនោះ ទៅបណ្ដាក់ឱ្យកសិករ ដែលមានដីស្រែស្ថិតនៅជាប់ប្រព័ន្ធប្រឡាយមេ ដែលមានទឹកគ្រប់គ្រាន់ ដើម្បីទទួលបានផលចំណេញពីស្រូវពូជនេះវិញ»។
កាលពីថ្ងៃទី៣ ខែធ្នូ ឆ្នាំ២០២២ លោក ខូយ រីដា អភិបាលខេត្តពោធិ៍សាត់ ក្នុងដំណើរចុះសួរសុខទុក្ខប្រជាកសិករនៅឃុំស្រែស្តុក ស្រុកកណ្តៀង និងដើម្បីត្រួតពិនិត្យពីវឌ្ឍនភាពនៃការដាំស្រូវស្ដារឡើងវិញ បានថ្លែងដោយជំរុញដល់កសិករឱ្យយកចិត្តទុកដាក់ ថែទាំស្រូវដោយបោចស្មៅ និងថែទាំដាក់ទឹកដាក់ជីឱ្យបានល្អស្របតាមស្ដង់ដាបច្ចេកទេស ដែលត្រូវបានណែនាំដោយមន្ត្រីជំនាញកសិកម្ម។
លោកថ្លែងថា៖«ប្រភពទឹកយើងមានគ្រប់គ្រាន់ហើយ ប្រព័ន្ធប្រឡាយសម្រាប់បញ្ជូនទឹកទៅក្នុងស្រែក៏បានស្ថាបនាទៅដល់ជាប់នឹងដីស្រែហើយដែរ ដូច្នេះស្រូវអាចផ្ដល់ទិន្នផលល្អឬអត់នោះ គឺអាស្រ័យលើការថែទាំរបស់យើង។ យើងត្រូវថែទាំស្រូវយើងកុំឱ្យមានស្មៅដុះនៅក្នុងដីស្រែ និងត្រូវបាញ់ថ្នាំកម្ចាត់សត្វល្អិតចង្រៃ កុំឱ្យមកស៊ីស្រូវរបស់យើង និង ត្រូវបូមទឹកបញ្ចូលស្រែ កុំឱ្យដីស្រែស្ងួតប្រេះក្រហែង និង ដាក់ជីបំប៉នឱ្យបានត្រឹមត្រូវតាមការណែនាំរបស់មន្ត្រីជំនាញកសិកម្ម»។
ទន្ទឹមនឹងនេះ លោកបានសម្ដែងការរីករាយជាមួយកសិករនៅក្នុងក្នុងស្រុកកណ្ដៀងទាំងមូល ដែលបានប្រឹងប្រែងដាំស្ដារឡើងវិញសម្រេចបាន១០០ភាគរយ លើផ្ទៃដីដាំស្ដារឡើងវិញសរុប ១៦៧៤ហិកតា។ លោកបានបន្តថា គិតមកទល់ពេលនេះ នៅទូទាំងខេត្តពោធិ៍សាត់ទាំងមូល ការដាំដុះស្រូវស្ដារឡើងវិញ សម្រេចបាន១០០ភាគរយ នៃផ្ទៃដីដែលត្រូវបានដាំស្ដារឡើងវិញសរុប ៦៦៦៨ហិកតា៕
វីដេអូ៖