The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋមន្ត្រី​អប់រំ​ប្រាប់​ឱ្យ​បេក្ខជនប្រឡង​បាក់​ឌុប​ គោរព​វិន័យ​ ហូប​អាហារ និង​សម្រាក​គ្រប់​គ្រាន់ ដើម្បី​ត្រៀមប្រឡង​

រដ្ឋមន្ត្រី​អប់រំ​ប្រាប់​ឱ្យ​បេក្ខជនប្រឡង​បាក់​ឌុប​ គោរព​វិន័យ​ ហូប​អាហារ និង​សម្រាក​គ្រប់​គ្រាន់ ដើម្បី​ត្រៀមប្រឡង​

Content image - Phnom Penh Post
បេក្ខជន​-បេក្ខនារី ពិនិត្យ​មើល​ឈ្មោះ​ប្រឡង​សញ្ញាបត្រ​ទុតិយភូមិ​ កាលពី​ថ្ងៃម្សិលមិញ។ រូបថត ក្រសួង​អប់រំ យុវជន​ និង​កីឡា

រដ្ឋមន្ត្រី​អប់រំ​ប្រាប់​ឱ្យ​បេក្ខជនប្រឡង​បាក់​ឌុប​ គោរព​វិន័យ​ ហូប​អាហារ និង​សម្រាក​គ្រប់​គ្រាន់ ដើម្បី​ត្រៀមប្រឡង​

​ភ្នំពេញៈ រដ្ឋមន្ត្រីក្រសួង​អប់រំ យុវជន និង​កីឡា លោក ហង់​ជួន ណា​រ៉ុ​ន នៅ​ព្រឹក​ថ្ងៃទី​​ ៤ ខែធ្នូ បាន​អំពាវនាវ​ឱ្យ​បេក្ខជន​ប្រឡង​សញ្ញាបត្រ​មធ្យមសិក្សា​ទុតិយ​​ភូមិ​ទាំងអស់​គោរព​យ៉ាង​ម៉ឺងម៉ាត់ នូវ​បទ​ប្បញ្ញត្តិ និង​កម្រិត​វិន័យ ដែល​ក្រសួង​ដាក់ចេញ និង​រំឭក​ឱ្យ​បេក្ខជន​ទាំងអស់​ទទួលទាន​អាហារ និង​ទឹក ព្រមទាំង​សម្រាក ឱ្យបាន​គ្រប់គ្រាន់ ដើម្បី​មាន​សុខ​ភាពល្អ ត្រៀម​ចូលរួម​ការប្រឡង​។

​ថ្លែង​សារ​តាមរយៈ​វីដេអូ​ខ្លី​ជាង​ ២ ​នាទី នៅ​ព្រឹក​ថ្ងៃទី​ ៤ ខែធ្នូ លោក​ហង់​ជួន ណា​រ៉ុ​ន បាន​ជូនពរ​ដល់​បេក្ខជន​ប្រឡង​សញ្ញាបត្រ​មធ្យមសិក្សា​ទុតិយភូមិ​ទាំងអស់​មាន​សុខ​ភាពល្អ និង​ទទួលបាន​ជោគជ័យ​ក្នុង​ការប្រឡង​។ លោក​បាន​អំពាវនាវ​ឱ្យ​បេក្ខជន​ទាំងអស់ ត្រូវ​ចេះ​កាត់បន្ថយ​ភាព​តានតឹង​ត្រៀមលក្ខណៈ​ប្រឡង​ឱ្យបាន​ត្រឹមត្រូវ ជាពិសេស​ត្រូវ​រំឭក​មេរៀន ឡើងវិញ​។ បន្ថែម​លើ​នេះ បេក្ខជន ត្រូវ​អនុវត្តតាម​វិធានការ​សុខភាព​របស់​ក្រសួងសុខាភិបាល វិធានការ ៣ ​កុំ និង ៣​ ការពារ​។

លោក​ថ្លែងថា​៖ «​ខ្ញុំ​សូម​អំពាវ​នាវ​សូមឱ្យ​បេក្ខជន​ទាំងអស់​គោរព យ៉ាង​ម៉ឺងម៉ាត់​នូវ​បទ​ប្បញ្ញត្តិ និង​កម្រិត​វិន័យ​ដែល​ក្រសួង​អប់រំ​ដាក់ចេញ​សម្រាប់​ការប្រឡង​នេះ​។ ខ្ញុំ​សូមឱ្យ​ក្មួយៗ​ទទួលទាន​អាហារ ទទួលទាន​ទឹក និង​សម្រាក​ឱ្យបាន គ្រប់គ្រាន់ ជាពិសេស​ទទួលទានដំណេក​ឱ្យ​គ្រប់គ្រាន់​ដើម្បី​មាន​សុខ​ភាពល្អ សម្រាប់​ចូលរួម​ការប្រឡង​»​។​

​លោក​រដ្ឋមន្ត្រី​បាន​រំឭក​បន្ថែម​ដល់​បេក្ខជន​ប្រឡង ធ្វើដំណើរ​ដោយ​ប្រុងប្រយ័ត្ន ដោយ​គោរព​តាមច្បាប់​ចរាចរណ៍ និង​វិធាន​ការ​ក្នុង​ការធ្វើ​ចរាចរណ៍​ផ្លូវទឹក​ដែល​ក្រសួង​អប់រំ​យុវជន និង​កីឡា​បានដាក់​ចេញ​។ លោក​ក៏បាន​រំឭក​ឱ្យ​បេក្ខជន​ទាំងអស់​ទៅ​មើល​ឈ្មោះ​ ១​ ថ្ងៃមុន​ថ្ងៃ​ប្រឡង ហើយ​ត្រូវមាន​វត្តមាន​ក្នុង​មណ្ឌល​ប្រឡង​យ៉ាងហោចណាស់ ៣០​ នាទី ឬ​ ១ ​ម៉ោង​មុន​ចាប់ផ្តើម​ការប្រឡង​។

​ក្រសួង​អប់រំ យុវជន និង​កីឡា ឱ្យដឹងថា បេក្ខជន ដែល​បាន​ប៉ះ​ពាល់​ផ្ទាល់​ជាមួយ​អ្នក​វិជ្ជមាន​កូ​វីដ​ ១៩ និង​បេក្ខជន​ដែលមាន​កម្តៅ​លើសពី ៣៧.៥​ អង្សា​សេ ឬ​មាន​រោគសញ្ញា ដូចជា​ក្អក​ហៀរ​សំបោរ ឈឺបំពង់ក ពិបាក​ដកដង្ហើម ត្រូវ​ទៅ​មណ្ឌល​ប្រឡង​ឱ្យបាន​មុន​បេក្ខជន​ទូទៅ​ដើម្បី​ទទួល​ការ​ស្ទង់​​កម្តៅ និង​ឆែកឆេរ​សំណៅ​ឯកសារ មុនគេ ព្រមទាំង​ដាក់​ដោយឡែក​។

​លោក​មឹង វាសនា ប្រធាន​ការិយាល័យ​ប្រឡង​ចំណេះ​ទូទៅ និង​អប់រំ​បច្ចេកទេស នៃ​នាយក​ដ្ឋា​ន​កិច្ចការ​ប្រឡង ឱ្យដឹង​នៅ​ថ្ងៃទី​ ៤ ខែធ្នូ ថា អ្វីដែល​បេក្ខជន​ត្រូវតែ អនុវត្ត​ក្នុង​ថ្ងៃ​ប្រឡង គឺ​ត្រូវ​ពាក់​ម៉ាស់ តម្រង់​ជួរ ដោយ​រក្សា​គម្លាត​សុវត្ថិ​​ភាព​យ៉ាងតិច ១ ​ម៉ែត្រ​កន្លះ នៅមុខ​មណ្ឌល​ប្រឡង​។ បន្ទាប់មក​គណៈកម្មកា​រ នឹងត្រូវ​ត្រួតពិនិត្យ​បណ្ណ​សម្គាល់​ខ្លួន ឬ​ស​លាកប​ត្រ​ឯកត្តជន មុនពេល​ឆែកឆេរ​សំ​ណៅឯ​ក​សារ និង​អនុញ្ញាត​ឱ្យចូល​មណ្ឌល​ប្រឡង​។

​លោក​បញ្ជាក់ថា​៖ «​នៅក្នុង​បន្ទប់​ប្រឡង បេក្ខជន​ត្រូវ​អង្គុយ​តាម​លេខ​តុ ដែល​បានកំណត់ ដោយ​រក្សា​ភាព​ស្ងៀមស្ងាត់​។ នៅពេល​ធ្វើ​ដំណើរការ​សំណេរ បេក្ខជន​មិនត្រូវ​ងើបឈរ ងាក​ឆ្វេង​ស្តាំ អើត​ឈោង​ទៅមុខ ឬ​ដើរ​ចេញពី​កន្លែង​អង្គុយ ដោយ​​គ្មាន​ការអនុញ្ញាត​ពី​អនុរក្ស និង​ដំណើរការ​សំណេរ បេក្ខជន​មិនត្រូវ​ធ្វើ​សញ្ញា​សម្គាល់​លើ​សន្លឹក​កិច្ចការ​ឡើយ​»​។

​ក្រសួង​អប់រំ​បញ្ជាក់ថា បេក្ខជន​មិនត្រូវ​លាក់ទុក​ជាប់​នឹង​ខ្លួន​នូវ​ឧបករណ៍​អេឡិចត្រូនិក​គ្រប់​ប្រភេទ​ចូលក្នុង​មណ្ឌល​ប្រឡង ឬ​បន្ទប់​ប្រឡង​ជាដាច់ខាត​។ ក្នុងករណី​រកឃើញថា បាន​ប្រព្រឹត្ត​ផ្ទុយ​នឹង​បទ​ប្បញ្ញត្តិ និង​កម្រិត​​វិន័យ បេក្ខជន​នឹងត្រូវ​បានកំណត់​ឱ្យ​ធ្លាក់​ជា​ស្វ័យប្រវត្តិ​។​

​ក្រសួង​អប់រំ បន្ដថា នៅ​ថ្ងៃទី ​៤ ខែធ្នូ គណៈមេប្រយោគ​ទូទាំង​ប្រទេស គណៈកម្មការ​អប្បមាទ ជំនួយការ​អប្បមាទ ប្រធាន​​អនុប្រធាន​មណ្ឌល​ប្រចាំរាជធានី​-ខេត្ត​នីមួយៗ និង​អង្គភាព​ប្រឆាំង​​អំពើពុករលួយ បាន​អញ្ជើញ​ចុះ​ត្រួតពិនិត្យ​ស្ថានភាព​ទូទៅ​នៅតាម​មណ្ឌល​ប្រឡង​។

​ការពិនិត្យ​នេះ​ធ្វើឡើង​ផ្ដោត​សំខាន់​ទៅលើ​បរិវេណ​មណ្ឌល​ប្រឡង ឧបករណ៍​​បំពង​សំឡេង ស្ថានភាព​អគារ បន្ទប់​ប្រឡង​នីមួយៗ និង​គ្រឿង​​បរិក្ខារ​នានា ព្រមទាំង​បន្ទប់​បម្រុង​ទុក​ក្នុងករណី​បេក្ខជន​មាន​បញ្ហា​សុខភាព​ត្រូវការ​ការសង្គ្រោះ​បឋម​ផ្សេងៗ ការរក្សា​នូវ​អនាម័យ និង​សុវត្ថិភាព ដើម្បី​ធានាបាន​ថា ដំណើរការ​សំណេរ​នៃ​ការប្រឡង​សញ្ញាបត្រ​មធ្យមសិក្សា​ទុតិយ​ភូមិ នា​ថ្ងៃទី​ ៥ ធ្នូ ២០២២ ប្រព្រឹត្ត​ទៅដោយ​រលូន​។​

សម្រាប់​ការប្រឡង​សញ្ញាបត្រ​​មធ្យមសិក្សា​ទុតិយភូមិ​នេះ មាន​បេក្ខជន​ចុះឈ្មោះ​ប្រឡង​សរុប ១២៨ ១៣៤ ​នាក់ ស្រី​ ៦៨ ៧៧១ នាក់ មណ្ឌល​ប្រឡង​សរុប ២២១ ​មណ្ឌល ត្រូវជា ៥ ១៧៤​ បន្ទប់ និង​មានការ​ចូលរួម​ដោយ​គណៈ​​មេ​ប្រយោគ និង​គណៈកម្មការ​នានា​ក្នុង​ដំណើរការ​ប្រឡង​សរុប​ចំនួន​ ២៧ ៧៥៣ ​នាក់​។

​សេចក្តីជូនដំណឹង​រប​ស់​អង្គភាព​ប្រឆាំង​អំពើពុករលួយ​បានឱ្យដឹង នៅ​ថ្ងៃទី​ ២ ៨​វិច្ឆិកា ថា សម្រាប់​ការប្រឡង​សញ្ញាបត្រ​មធ្យមសិក្សា​​ទុតិយភូមិ នៅ​ថ្ងៃទី ​៥ និង​ទី​ ៦ ធ្នូ​នេះ អង្គភាព​ប្រឆាំង​អំពើពុករលួយ​គ្រោង​រៀបចំ​អ្នកសង្កេតការណ៍​ស្ម័គ្រចិត្ត​ជិត ៣ ០០០​ នាក់ និង​ដាក់​មន្ត្រី​អង្គភាព​ប្រឆាំង​អំពើ​ពុករលួយ ប្រមាណ​ ៣០០​ នាក់ ដើម្បី​ចូលរួម​សង្កេតការណ៍​។​

​ក្រសួង​អប់រំ យុវជន និង​កីឡា គ្រោង​នឹង​ប្រកាស​លទ្ធផល​ប្រឡង នៅ​ថ្ងៃទី​ ២៧ ខែធ្នូ ឆ្នាំ ២០២២ សម្រាប់​រាជធានី​ភ្នំពេញ និង​ខេត្តកណ្ដាល និង​ថ្ងៃទី​ ២៨ ខែធ្នូ ឆ្នាំ​ ២០២២ សម្រាប់​ខេត្ត​ផ្សេង​​ទៀត ព្រមទាំង​មាន​ផ្សាយ​នៅលើ​ទំព័រ​ហ្វេ​ស​ប៊ុ​ក​ផ្លូវការ​ក្រសួង​អប់រំ យុវជន និង​កីឡា​។

​ក្រសួង​អប់រំ​ឱ្យដឹងថា ហឹប​វិ​ញ្ញា​​សា សម្រាប់​ដំណើរការ​សំណេរ​នៃ​ការប្រឡង​សញ្ញាបត្រ​មធ្យម​សិក្សា​ទុតិយភូមិ​នេះ ត្រូវបាន​​ដឹកជញ្ជូន​ពី​រដ្ឋបាល​សាលា​រាជ​ធានី​-​ខេត្ត ទៅ​រក្សាទុក​នៅតាម​សាលាស្រុក​នីមួយៗ ប្រកប​ដោយ​សុវត្ថិភាព​ហើយ​។​

​ក្រសួង​បញ្ជាក់ថា​៖ «​ក្នុង​ដំណើរ​​ការ នៃ​ការ​ទុកដាក់​ហឹប​វិញ្ញាសា​នេះ មានការ​ចូលរួម​ពិនិត្យ​យ៉ាង​ហ្មត់ចត់​ដោយ​ស្មារតី​ទទួលខុសត្រូវ ខ្ពស់​ពី​សំណាក់​គណៈមេប្រយោគ គណៈកម្មការ​អប្បមាទ ជំនួយការ​​អប្បមាទ អង្គភាព​ប្រឆាំង​អំពើ​ពុករលួយ ព្រមទាំង​អាជ្ញាធរ​​ដែនដី ដែល​ពាក់ព័ន្ធ ដើម្បី​រក្សា​បាន​នូវ​ស្តង់ដា​នៃ​ការប្រឡង ដោយ​គោរព​តាម​គោលការណ៍​ច្បាប់ យុត្តិធម៌ តម្លាភាព និង​លទ្ធផល​ទទួលយកបាន​»​។​

​បើ​យោងតាម​ក្រសួង​អប់រំ វិញ្ញាសា​ទាំងអស់​ត្រូវបាន​ជ្រើសរើស តាក់តែង រៀបចំ និង​គ្រប់គ្រង​ដោយ​ក្រសួង​អប់រំ យុវជន និង​កីឡា​។ វិញ្ញាសា​​ប្រឡង ត្រូវ​បានកំណត់​សម្រាប់​ថ្នាក់​វិទ្យាសាស្ត្រ និង​សម្រាប់​ថ្នាក់​វិទ្យាសាស្ត្រ​សង្គម ដោយ​ទម្រង់​វិញ្ញាសា ត្រូវបាន​រៀបចំ​ជា​ ២ គឺ​ទម្រង់​វិញ្ញាសា​ចម្លង​ដាក់​លើ​ក្តារខៀន និង​ទម្រង់​​វិញ្ញាសា ដែលជា​សន្លឹក​ក្រដាស ចែកជូន​បេក្ខជន​៕

អត្ថបទគួរចាប់អារម្មណ៍