ភ្នំពេញៈ អភិបាលក្រុងអាស៊ានប្តេជ្ញាដោះស្រាយបញ្ហាប្រឈមនានា សម្រាប់អភិវឌ្ឍទីក្រុងរបស់ខ្លួនឱ្យកាន់តែរីកចម្រើន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ខណៈសាលាក្រុងភ្នំពេញអះអាងថា កិច្ចប្រជុំអភិបាលរាជធានី និងរដ្ឋធានីអាស៊ាន (MGMAC) និងវេទិកាអភិបាលក្រុងអាស៊ាន (AMF) បានបិទបញ្ចប់ដោយជោគជ័យជាមួយនឹងលទ្ធផលផ្លែផ្កា «យ៉ាងត្រចះត្រចង់»។
សាលាក្រុងភ្នំពេញបញ្ជាក់ក្នុងគេហទំព័រនាថ្ងៃទី ៣ធ្នូ ថា៖ «កិច្ចប្រជុំ MGMAC និងវេទិកាAMF ឆ្នាំ ២០២២ បានបញ្ចប់ដោយជោគជ័យជាមួយផ្លែផ្កាយ៉ាងត្រចះត្រចង់ ដោយបណ្តាទីក្រុងនៃប្រទេសអាស៊ានទាំងអស់បានទទួលយកបទពិសោធន៍ ក្នុងការដោះស្រាយបញ្ហាប្រឈមជាច្រើនសម្រាប់អភិវឌ្ឍទីក្រុងរបស់ខ្លួនឱ្យកាន់តែរីកចម្រើន ឆ្លើយតបទៅនឹងតម្រូវការរបស់ប្រជាពលរដ្ឋ»។
ថ្លែងក្នុងពិធីបិទវេទិកា AMF នៅថ្ងៃទី ៣ ខែធ្នូ លោក ឃួង ស្រេង អភិបាលរាជធានីភ្នំពេញថ្លែងថា ថ្នាក់ដឹកនាំទីក្រុងអាស៊ានបានចូលរួមយ៉ាងសកម្មប្រកបដោយចក្ខុវិស័យជាក់ស្តែងនិយម និងការគិតគូរយកចិត្តទុកដាក់ក្នុងន័យស្ថាបនាជួយគ្នាទៅវិញទៅមក ដើម្បីរួមចំណែកធ្វើឱ្យប្រសើរឡើងនូវការពិភាក្សាដែលជាអនុសាសន៍សម្រាប់ទិសដៅរួមគ្នានៃការអភិវឌ្ឍទីក្រុងអាស៊ាន។
លោកថ្លែងថា៖ «បញ្ហាប្រឈម និងទស្សនវិស័យជាសកលនាពេលបច្ចុប្បន្ន និងទៅអនាគត ថ្នាក់ដឹកនាំទីក្រុងអាស៊ាន បានយល់ស្របគ្នាអំពីសារៈសំខាន់នៃភាពជាដៃគូ និងកិច្ចសហប្រតិបត្តិការសម្រាប់រដ្ឋបាលថ្នាក់ក្រោមជាតិក្នុងការឆ្លើយតបទៅនឹងបញ្ហាប្រឈមរួម ដោយឈរលើស្មារតីសាមគ្គីភាព និងការទទួលខុសត្រូវខ្ពស់ ដែលជាមូលដ្ឋានដ៏ចាំបាច់ ក្នុងការលើកកម្ពស់ ការស្តារឡើងវិញនូវសេដ្ឋកិច្ច និងសង្គមកិច្ច ក្រោយវិបត្តិនៃជំងឺកូវីដ ១៩»។
លោកបន្តថាអភិបាលក្រុងអាស៊ានបានឯកភាពក្នុងការជំរុញសម្ទុះនៃការកសាងទីក្រុងឆ្លាត ប្រកបដោយភាពធន់ ចីរភាពបរិវត្តកម្ម និងបរិយាប័ន្ន តាមគន្លងប្រក្រតីភាពថ្មី។ ពួកគេបានពិភាក្សាយ៉ាងស៊ីជម្រៅអំពីសារៈសំខាន់ និងភាពចាំបាច់នៃកិច្ចសហប្រតិបត្តិការល្អក្នុងចំណោមរាជធានីរដ្ឋធានីអាស៊ាន រដ្ឋបាលខេត្ត ទីក្រុងសម្ព័ន្ធមេត្រី និងបណ្តាទីក្រុងអាស៊ានក្នុងន័យជំរុញឱ្យសម្រេចបានទីក្រុងដែលឆ្លាត មានភាពធន់ និងចីរភាព។
វេទិកា និងកិច្ចប្រជុំនេះបានចេញឯកសារចំនួន ២ គឺសេចក្តីប្រកាសរួមកិច្ចប្រជុំអភិបាលរាជធានី និងរដ្ឋធានីអាស៊ានដែលមានខ្លឹមសារ ៦ ចំណុច និងសេចក្តីថ្លែងការណ៍វេទិកាអភិបាលក្រុងអាស៊ានឬហៅថា សេចក្ដី ថ្លែងការណ៍រាជធានីភ្នំពេញឆ្នាំ ២០២២ ដែលមានខ្លឹមសារចំនួន ១២ ចំណុច។
លោក ឃួង ស្រេង ថ្លែងថា៖ «ឯកសារជាប្រវត្តិសាស្ត្រទាំង ២ នេះ ពិតជាបានឆ្លុះបញ្ចាំងឱ្យឃើញកាន់តែច្បាស់អំពីឆន្ទៈ និងការប្តេជ្ញាចិត្តរួមរបស់អភិបាលអភិបាលរងរាជធានី រដ្ឋធានី ខេត្ត និងក្រុងនៃប្រទេសជាសមាជិកអាស៊ានក្នុងការពួតដៃគ្នាបន្តដំណើរទៅមុខរួមគ្នា និងជំរុញកិច្ចសហប្រតិបត្តិការកាន់តែជិតស្និទ្ធបន្ថែមទៀត ដើម្បីកសាងទីក្រុងឆ្លាត មានភាពធន់ និងមានចីរភាព សម្រាប់បម្រើឱ្យកំណើនសេដ្ឋកិច្ច និងវិបុលភាពរួមស្របតាមចក្ខុវិស័យរបស់សហគមន៍អាស៊ានឆ្នាំ ២០២៥ និងក្រោយឆ្នាំ ២០២៥ ផងដែរ»។
គេហទំព័រដដែលបញ្ជាក់ថារដ្ឋបាលក្រុងនៃប្រទេសឥណ្ឌូនេស៊ីបានក្លាយជាប្រធានប្តូរវេននៃកិច្ចប្រជុំ MGMAC និងវេទិកា AMF នៅឆ្នាំ ២០២៣ ដោយបានប្តេជ្ញាបន្តបម្រើជាយន្តការប្រើប្រាស់ជាវេទិកាជជែកពិភាក្សា ចែករំលែកបទពិសោធន៍ ក៏ដូចជាគំនិតផ្តួចផ្តើម និងនវានុវត្តន៍ថ្មីៗបន្ថែមទៀត សម្រាប់ភាពរីកចម្រើននៃបណ្ដាញរដ្ឋបាលថ្នាក់ក្រោមជាតិអាស៊ាន។
លោកស្រី Bernadia Irawati Tjandradewi អគ្គលេខាធិការសមាគមទីក្រុង និងរដ្ឋបាលមូលដ្ឋានប្រចាំតំបន់អាស៊ី និងប៉ាស៊ីហ្វិក (UCLG ASPAC) ថ្លែងក្នុងពិធីបិទកិច្ចប្រជុំ និងវេទិកានេះថា កិច្ចពិភាក្សារកដំណោះស្រាយ និងបទពិសោធន៍ពីរាជធានី និងរដ្ឋធានីដទៃទៀតនៅក្នុងកិច្ចប្រជុំទាំង ២ នេះគឺជាធាតុចូលក្នុងការពង្រឹង និងគ្រប់គ្រងរាជធានី រដ្ឋធានីអាស៊ាន ដោយមានការគិតគូរដល់ពលរដ្ឋជាធំ និងផ្ដល់ប្រយោជន៍ដល់ពលរដ្ឋ។
លោកស្រីត្រូវបានស្រង់សម្តីចុះផ្សាយក្នុងគេហទំព័រសាលាក្រុងភ្នំពេញថា កិច្ចប្រជុំ និងវេទិកានៅថ្ងៃនេះ គឺជាមូលដ្ឋានគ្រឹះមួយ សម្រាប់បន្តពង្រឹងកិច្ចសហប្រតិបត្តិការដ៏រឹងមាំនៅក្នុងតំបន់អាស៊ាន។
លោកស្រីត្រូវបានស្រង់សម្តីថា៖ «កិច្ចការនេះ មិនមែនជាអ្វីដែលកើតឡើងនៅក្នុងថ្ងៃនេះ ឬម្សិលមិញនោះទេ គឺជាអ្វីដែលបានបន្តមករាប់ឆ្នាំមកហើយ ដើម្បីអាចទៅមុខរួមគ្នា ជោគជ័យទាំងអស់គ្នា ដោយត្រូវបន្តសាមគ្គីភាពជាបន្តទៅទៀត ដើម្បីអាចសម្រេចបានគោលដៅ ក្នុងការបង្កើតទីក្រុងដែលមានភាពឆ្លាតវៃ មានភាពធន់ និងមាននិរន្តរភាព»។
លោកស្រីបានសន្យានឹងបន្តកិច្ចការនេះជាមួយអភិបាលក្រុងឥណ្ឌូនេស៊ីបន្តទៀតដែលជាប្រធានប្តូរវេន នៅឆ្នាំ ២០២៣ បន្ទាប់ពីកម្ពុជា ដើម្បីរួមគ្នាធ្វើឱ្យទីក្រុងក្នុងតំបន់អាស៊ានមានភាពឆ្លាតវៃមានភាពធន់ និងនិរន្តរភាព។
លោកថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គ សម្រាប់ការសិក្សាយុទ្ធសាស្ត្រ នៃវិទ្យាស្ថានចក្ខុវិស័យអាស៊ី (AVI) ថ្លែងថា គោលដៅរបស់កម្ពុជា គឺតភ្ជាប់ការអភិវឌ្ឍហេដ្ឋារចនាសម្ព័ន្ធ និងការរៀបចំក្រុងនិងនៅតាមបណ្តាខេត្តឱ្យមានចរីភាព បរិយាប័ន្នដើម្បីប្រយោជន៍ដល់ប្រជាជន និងការអភិវឌ្ឍមូលដ្ឋាន។
លោកថ្លែងថា៖ «ការគិតគូរវែងឆ្ងាយ រៀបចំប្លង់មេ និងគោលនយោបាយអភិវឌ្ឍន៍ទីក្រុងវៃឆ្លាតនេះគឺត្រូវធ្វើឡើងដើម្បីឆ្លើយតបនូវបញ្ហាសង្គម និងតំបន់ដែលពិភពលោកកំពុងជួបប្រទះដូចជាគ្រោះធម្មជាតិ បម្រែសម្រួលអាកាសធាតុ កំណើនប្រជាជន បញ្ហាសុខុមាលភាព បញ្ហាបរិស្ថាន។ល។ ដែលបញ្ហាទាំងនេះត្រូវការជួយគាំទ្រគ្នាទៅវិញទៅមកជាមួយបណ្តាសមាជិកអា-ស៊ាន និងដៃគូអភិវឌ្ឍន៍អាស៊ាន»។
ដោយឡែករាជធានីភ្នំពេញ និងរាជធានីបាងកក ប្រទេសថៃ បានឯកភាពគ្នាបង្កើតក្រុមការងារបច្ចេកទេសមួយ ដើម្បីរៀបចំផែនការរួមគ្នាធ្វើឱ្យទីក្រុងទាំង ២ មានការអភិវឌ្ឍ រីកចម្រើន ពិសេសរួមគ្នាដោះស្រាយបញ្ហាផ្សេងៗ។ការឯកភាពគ្នានេះធ្វើឡើងក្នុងជំនួបទ្វេភាគីរវាងលោក ឃួង ស្រេង និងលោក Chadchart Sittipunt អភិបាលរាជធានីបាងកក នៅល្ងាចថ្ងៃទី ២ ខែធ្នូ។
លោក Sittipun ត្រូវបានស្រង់សម្តីមកចុះផ្សាយក្នុងគេហទំព័រសាលាក្រុងភ្នំពេញនាថ្ងៃទី ៣ ថា៖ «ក្នុងនាមជាប្រទេសជិតខាងភូមិផងរបងជាមួយគ្នា ត្រូវទំនាក់ទំនងការងារជាមួយគ្នាឱ្យបានល្អ ដោយយើងនឹងបង្កើតជាក្រុមការងារមួយដើម្បីទាក់ទងគ្នាធ្វើការ ជាមួយគ្នាឱ្យបានល្អពិសេសគឺការពង្រឹងកិច្ចសហប្រតិបត្តិការរវាងប្រទេសទាំង២ ទីក្រុងទាំង ២ ពាក់ព័ន្ធបញ្ហាប្រឈមសំរាម ការកកស្ទះចរាចរណ៍ និងការជំរុញជើងហោះហើរត្រង់ពីភ្នំពេញទៅបាងកកជាដើម»។
រាជធានីភ្នំពេញ និងរដ្ឋធានីវៀងចន្ទន៍ ប្រទេសឡាវ ក៏បានឯកភាពគ្នាជំរុញទំនាក់ទំនងឱ្យកាន់តែល្អប្រសើរមួយកម្រិតថែមទៀតដែរដើម្បីបម្រើផលប្រយោជន៍ឱ្យប្រជាពលរដ្ឋនៃប្រទេសទាំង ២ ដែលធ្វើឡើងក្នុងជំនួបទ្វេភាគីកាលពីថ្ងៃទី ៣ ធ្នូ រវាងលោក ឃួង ស្រេង និងលោក Atsaphangthong Siphandone អភិបាលរដ្ឋធានីវៀងចន្ទន៍ នៅទីក្រុងភ្នំពេញ។
លោក Siphandone ត្រូវបានស្រង់សម្ដីមកចុះផ្សាយក្នុងគេហទំព័រសាលាក្រុងភ្នំពេញនាថ្ងៃទី ៤ ខែធ្នូ ថា លោកជំរុញឱ្យទំនាក់ទំនងរវាងទីក្រុងទាំង ២ កាន់តែល្អប្រសើរថែមទៀតដើម្បីបម្រើឱ្យផលប្រយោជន៍នៃប្រជាជាតិទាំង ២ ខណៈភាគីទាំង ២ បានឯកភាពគ្នាផ្លាស់ប្ដូរនិស្សិតអាហារូបករណ៍ទៅសិក្សារវាងទីក្រុងទាំង ២ ទៅវិញទៅមក៕