ភ្នំពេញៈ បណ្ណាល័យកំពង់ស្ពឺ នឹងផ្តួចផ្ដើមគម្រោងយុទ្ធនាការលើកកម្ពស់ការអានជាសាធារណៈ ដែលមានឈ្មោះថា សៀវភៅ១ សហគមន៍១ រយៈពេល៣ថ្ងៃ ដើម្បីលើកកម្ពស់ការអាន និងការប្រើប្រាស់សេវាកម្មបណ្ណាល័យឱ្យកាន់តែប្រសើរឡើង មុនពេលយុទ្ធនាការនេះ បន្តសកម្មភាពបន្តបន្ទាប់ទៅខេត្ត-ក្រុងដទៃទៀតទូទាំងប្រទេស។
គម្រោងយុទ្ធនាការលើកកម្ពស់ការអានជាសាធារណៈ ដែលមានឈ្មោះថា សៀវភៅ១ សហគមន៍១ នឹងប្រព្រឹត្តទៅនៅថ្ងៃទី១៣-១៥ ខែមករា ឆ្នាំ២០២៣ សហការជាមួយក្រុមការងារ Riel Tiger Solutions Co.,LTD បណ្ណាល័យបញ្ញវន្ត Business Record និងដៃគូសហការមួយចំនួនទៀត។
បណ្ណាល័យខេត្តកំពង់ស្ពឺ បានឱ្យដឹងនៅក្នុងសេចក្តីជូនដំណឹងរបស់ខ្លួនថា កម្មវិធីនេះ ធ្វើឡើងក្នុងគោលបំណងចម្បង រួមគ្នាលើកកម្ពស់ការអាននៅតាមសហគមន៍ តាមរយៈការចែករំលែកនូវទស្សនទាននិងបទពិសោធន៍ល្អៗ អំពីគន្លឹះជោគជ័យក្នុងការសិក្សា និងសារៈសំខាន់នៃការអាន គន្លងអាជីព និងការរៀបចំផែនការជីវិតដោយវាគ្មិនជាថ្នាក់ដឹកនាំ និងជាអ្នកជំរុញទឹកចិត្តល្បីៗ នៅក្នុងប្រទេសកម្ពុជា។
សេចក្តីជូនដំណឹង បានបញ្ជាក់ថា៖« កម្មវិធីរយៈពេល៣ថ្ងៃនេះ ក៏នឹងមានការចែកសៀវភៅអានជូនសាធារណជនដោយឥតគិតថ្លៃ និងការផ្តល់ឱកាសឱ្យអ្នកអានទាំងអស់ បានបង្ហាញសមត្ថភាពចូលរួមប្រកួតប្រជែងអំណានជាសាធារណៈទៀតផង»។
លោក សឿង សារ៉ាន់ ប្រធានបណ្ណាល័យកំពង់ស្ពឺ បាននិយាយថា សម្រាប់បេក្ខជន ជើងឯកជយលាភីផ្នែកអំណានប្រចាំប្រទេស នឹងទទួលបានឱកាសទៅទស្សនកិច្ចសិក្សានៅប្រទេសជប៉ុន។ លើសពីនេះទៀតកម្មវិធីដ៏កម្រ និងលើកដំបូងនេះនឹងផ្ដល់ឱកាសឱ្យអ្នកចូលចិត្តអានអាចស្វែងរកសៀវភៅអាន និងស្នាដៃនានាដ៏សម្បូរបែបនៅក្នុងកម្មវិធីពិព័រណ៍និងផ្សារណាត់សៀវភៅផងដែរ ។
លោក បានបញ្ជាក់ថា៖«កម្មវិធីនេះនឹងចាប់ផ្ដើម ដំណើរការដំបូងនៅបណ្ណាល័យកំពង់ស្ពឺ ដែលប្រព្រឹត្តទៅនៅថ្ងៃទី១៣, ១៤, ១៥ (សុក្រ សៅរ៍ អាទិត្យ) ខែមករា ឆ្នាំ២០២៣ មុននឹងបន្តសកម្មភាពបន្តបន្ទាប់ទៅខេត្តក្រុងដទៃទៀតទូទាំងប្រទេស»។
ជាមួយគ្នានេះ លោក សឿន សារ៉ាន់ បានអំពាវនាវដល់សា្ថប័នសាធារណៈ និងឯកជន និងប្រជាពលរដ្ឋគ្រប់ មជ្ឈដ្ឋាននៃខេត្តកំពង់ស្ពឺ ព្រមទាំងសិស្សានុសិស្សគ្រប់ភូមិសិក្សា ចូលរួមនៅក្នុងកម្មវិធីនេះឱ្យបានច្រើនកុះករ ក្នុងស្មារតីរួមចំណែកលើកកម្ពស់ទម្លាប់អាន និងការសិក្សាស្វែងយល់នូវគន្លឹះសំខាន់ៗសម្រាប់ដុសខាត់សតិបញ្ញា និងផ្នត់គំនិត ដែលជាមូលដ្ឋានក្នុងការកសាងសមត្ថភាពប្រកបដោយសក្តានុពល ឈានទៅសម្រេចផែនការជីវិតដ៏ប្រសើរនៅពេលអនាគត និងស្វែងរកឱកាសបង្ហាញសមត្ថភាពនាំយកស្នាដៃ និងកិត្តិយស ជូនទឹកដីមាតុភូមិរបស់យើង។
យុទ្ធនាការសៀវភៅ១សហគមន៍១ គឺជាគម្រោងដែលបង្កើតឡើងដើម្បីលើកកម្ពស់វិស័យអំណានទៅដល់យុវជននៅក្នុងប្រទេសកម្ពុជា តាមរយៈព្រឹត្តិការណ៍សំខាន់ៗចំនួន៥ គឺការប្រកួតប្រជែងការអាន ការចែកសៀវភៅ បណ្ណាល័យចល័ត ការអភិវឌ្ឍបណ្ណាល័យ និងផ្សារណាត់ ហើយគម្រោងនេះ នឹងដាក់ឱ្យដំណើរការរយៈពេល ២៥ខែ ចាប់ផ្តើមពីខែកុម្ភៈ ឆ្នាំ២០២៣ ដល់ខែមករា ឆ្នាំ២០២៤។ នេះបើតាមលិខិតប្រកាសរបស់គម្រោងយុទ្ធនាការសៀវភៅ ១ សហគមន៍។
លោក សុខ ឡាក់ សហស្ថាបនិកបណ្ណាល័យបញ្ញវន្ត និងជាសហស្ថាបនិកយុទ្ធនាការសៀវភៅ១ សហគមន៍១ បាននិយាយថា បណ្ណាល័យកំពង់ស្ពឺ គឺទីតាំងដំបូងគេ ដែលគម្រោងសៀវភៅ១ សហគមន៍១ នឹងអនុវត្ត ដើម្បីឈានអនុវត្តគម្រោងនេះជាបន្តបន្ទាប់ឱ្យគ្រប់២៥ រាជធានី-ខេត្ត។
លោក បានបញ្ជាក់ថា៖ «គម្រោងរបស់ខ្លួន នឹងចូលរួមជំរុញឱ្យស្ថាប័នមួយចំនួនទទួលយកវប្បធម៌អាន និងចំណេះដឹងក្នុងប្រតិបត្តិការរបស់ពួកគេ ខណៈសៀវភៅ ២៥ ០០០ ក្បាល និងបណ្ណាល័យចំនួន២៥ ត្រូវបានរំពឹងទុកថា នឹងផ្តល់ទៅដល់អ្នកអានចន្លោះពី៥ម៉ឺន ទៅ៧ម៉ឺននាក់នៅទូទាំង ២៥រាជធានី-ខេត្ត»។
យោងតាមការស្ទង់មតិសេដ្ឋកិច្ចសង្គមកម្ពុជាឆ្នាំ២០១៤ ប្រទេសកម្ពុជា មានអត្រាអក្ខរកម្មទាបបំផុតទី២ នៅក្នុងបណ្តាប្រទេសអាស៊ាន បន្ទាប់ពីប្រទេសឡាវ និងប្រហែល២៩ភាគរយ នៃប្រជាជនសរុប គឺខ្វះជំនាញអាន និងសរសេរជាមូលដ្ឋាន។ ចំណែកការរកឃើញរបស់ក្រុមប្រឹក្សាអភិវឌ្ឍន៍យុវជនជាតិ (NYDC 2021) នៅកម្ពុជាបានបង្ហាញថា កម្ពុជាជាប្រទេសដែលមានយុវជន ៣២ភាគរយដែលមានអាយុពី១០ ដល់ ២៤ឆ្នាំ និង ៧១ភាគរយនៃយុវជនមិនបានសិក្សាជាផ្លូវការ៕