ភ្នំពេញៈ ក្នុងរយៈពេល ៤ ថ្ងៃ ចាប់ពីថ្ងៃទី ១ដល់ថ្ងៃទី ៤ ខែធ្នូកម្លាំងការិយាល័យអត្តសញ្ញាណបណ្ណសញ្ជាតិខ្មែរ នៃស្នងការដ្ឋាននគរបាលរាជធានីភ្នំពេញ រួមទាំងអធិការនគរបាលខណ្ឌទាំង ១៤ និងប៉ុស្តិ៍រដ្ឋបាលទាំងអស់ បានចុះធ្វើអត្តសញ្ញាណបណ្ណសញ្ជាតិខ្មែរនៅតាមភូមិជូនប្រជាពលរដ្ឋបានជាង ៣ ០០០ នាក់។
លោក សាន សុខសីហា អ្នកនាំពាក្យ ស្នងការដ្ឋាននគរបាលរាជធានីភ្នំពេញ បានឱ្យដឹងនៅថ្ងៃទី ៥ ខែធ្នូថា បន្ទាប់ពីទទួលបទបញ្ជា និងការណែនាំរបស់លោក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ការិយាល័យជំនាញអត្តសញ្ញាណបណ្ណសញ្ជាតិខ្មែរ នៃស្នងការដ្ឋាននគរបាលរាជធានីភ្នំពេញ អធិការនគរបាលខណ្ឌទាំង ១៤ និង ប៉ុស្តិ៍នគរបាលរដ្ឋបាលទាំង ១០៥ បានយកចិត្តទុកដាក់ខ្លាំងចំពោះកិច្ចការងារនេះ ដោយបានចុះចាប់ផ្តើមយុទ្ធនាការតាំងពីថ្ងៃទី១ ខែធ្នូ រហូតមកដល់ថ្ងៃទី ៤ ខែធ្នូនេះ ធ្វើបានជាង ៣ ០០០នាក់។
លោកថ្លែងថា៖«បើយើងគិតសរុបរួមមកគឺធ្វើបាន ៣ ០៩៣ នាក់ធ្វើជូនបងប្អូនប្រជាពលរដ្ឋទាំងអ្នកធ្វើថ្មី ទាំងអ្នកហួសសុពលភាព ឬក៏ខូចផ្សេងៗ»។
តាមរយៈយុទ្ធនាការនៃការចុះធ្វើអត្តសញ្ញាណបណ្ណសញ្ជាតិខ្មែរដល់តាមភូមិ និងតាមខ្នងនេះឃើញថា មានប្រជាពលរដ្ឋច្រើន ចូលរួមសហការ និងឆ្លៀតពេលវេលាមកធ្វើច្រើន ដោយសារតែសេវានេះបានទៅដល់មុខផ្ទះនិងបង្កភាពងាយស្រួលជូនពួកគាត់។
លោកបន្ថែមថា ភាពងាយស្រួលនោះគឺប្រជាពលរដ្ឋ គាត់ចំណេញទាំងពេលវេលា និងប្រាក់កាស ខុសពីមុនដែលពលរដ្ឋគាត់ត្រូវយកពេលម៉ោងការងាររដ្ឋបាលដោយការសុំច្បាប់ ឬក៏គាត់ឆ្លៀតពេលទៅធ្វើអត្តសញ្ញាណបណ្ណ ប៉ុន្តែឥឡូវនេះគឺអត់ទេ ពលរដ្ឋអាចរង់ចាំនៅផ្ទះ ព្រោះពេលសមត្ថកិច្ចទៅធ្វើគឺភាគច្រើនពេលម៉ោងពលរដ្ឋសម្រាក ជាពិសេសសមត្ថកិច្ចចុះធ្វើការងារនេះដល់ពេលយប់ទៀតផង។
លោកថ្លែងថា៖«សំខាន់បំផុតគាត់ចំណេញពេលវេលាច្រើនមែនទែន អ៊ីចឹងគាត់ចេញពីធ្វើការមក គាត់ចប់ម៉ោងធ្វើការគាត់ចេញមកអាចធ្វើបាន។ សេវាមួយចំនួនតែចប់ម៉ោង៥ម៉ោង៦ គឺចប់ ប៉ុន្តែការងារនេះអត់ទេ គឺមន្ត្រីយើងចុះធ្វើរហូតដល់យប់ ម៉ោង៦ ម៉ោង ៧រហូតដល់ម៉ោង ១០យប់ ក៏ថាបាន»។
ចំពោះការចុះធ្វើអត្តសញ្ញាណបណ្ណជូនពលរដ្ឋតាមភូមិនេះ លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានថ្លែងថា ការចុះធ្វើកិច្ចការងារនេះគឺជាការបង្ករលក្ខណៈងាយស្រួលជូនប្រជាពលរដ្ឋនៅតាមមូលដ្ឋាន ប៉ុន្តែទោះជាយ៉ាងណា អាជ្ញាធរមូលដ្ឋាន ឬមន្ត្រីដែលធ្វើកិច្ចការងារនេះ គួរតែមានការផ្សព្វផ្សាយជូនដំណឹងប្រកាសឱ្យប្រជាពលដ្ឋបានដឹងមុន ៣ទៅ ៤ ថ្ងៃ ដើម្បីពួកគាត់ត្រៀមរៀបចំ កាលវិភាគនិងពេលវេលា ឱ្យបានសមស្របដើម្បីរង់ចាំធ្វើអត្តសញ្ញាណបណ្ណ។
លោក ប៉ា ចន្ទរឿន លើកឡើងថា តាមការសង្កេតពិនិត្យជាក់ស្តែងឃើញថា សន្លឹកអត្តសញ្ញាណបណ្ណសញ្ជាតិខ្មែរ មានគុណភាពអន់ ហេតុនេះលោកសំណូមពរដល់អាជ្ញាធរពាក់ព័ន្ធគិតគូរឡើងវិញអំពីការជ្រើសរើសរូបធាតុយកមកប្រើប្រាស់សម្រាប់ធ្វើអត្តសញ្ញាណបណ្ណសញ្ជាតិខ្មែរ ។ លោកថា អត្តសញ្ញាណបណ្ណជាឯកសារសំខាន់មួយរបស់ជាតិ សម្រាប់ប្រើប្រាស់ជាផ្លូវការគួរតែជ្រើសរើសសម្ភារដែលយកមកធ្វើសន្លឹកអត្តសញ្ញាណបណ្ណឱ្យមានគុណភាពខ្ពស់ ។
លោកថ្លែងថា៖«មើលទៅគុណភាពនៃអត្តសញ្ញាណបណ្ណ ដែលជាឯកសារដ៏សំខាន់របស់ប្រជាពលរដ្ឋហ្នឹង វាអន់ជាងកាតក្រុមហ៊ុនឯកជន ឬក៏កាតធនាគារទៅទៀត»។
ឆ្លើយតបចំពោះបញ្ហាអត្តសញ្ញាណបណ្ណសញ្ជាតិខ្មែរមានគុណភាពអន់នេះ អគ្គនាយកដ្ឋានអត្តសញ្ញាណកម្មបាន អះអាង តាមរយៈហ្វេស Messenger ថា គុណភាពរបស់អត្តសញ្ញាណបណ្ណ សញ្ជាតិខ្មែរមានគុណភាពល្អ សមស្របសម្រាប់ការប្រើ ប្រាស់តាមសុពលភាព។
ចំណែក លោក សុខ ហេង អធិការនគរបាលខណ្ឌទួលគោក ប្រាប់ភ្នំពេញប៉ុស្តិ៍នៅថ្ងៃទី ៥ ខែធ្នូថា ចំពោះការចុះធ្វើអត្តសញ្ញាណបណ្ណសញ្ជាតិខ្មែរជូនប្រជាពលរដ្ឋ កម្លាំងសមត្ថកិច្ចបានសហការជាមួយអាជ្ញាធរមូលដ្ឋាន មេភូមិ ចៅសង្កាត់ ធ្វើការផ្សព្វផ្សាយជូនដំណឹងឱ្យពលរដ្ឋបានដឹង។ តាមការកត់សម្គាល់ បន្ទាប់ពីមានការផ្សព្វផ្សាយបានទូលំទូលាយដល់ប្រជាពលរដ្ឋ ឃើញថា ពលរដ្ឋជាច្រើនបានមកធ្វើអត្តសញ្ញាណបណ្ណ ដែលក្នុង១ថ្ងៃ យ៉ាងហោចជាង ១០០ នាក់ដែរនៅក្នុងខណ្ឌទួលគោក។
លោកថ្លែងថា៖«យើងផ្សព្វផ្សាយឱ្យពលរដ្ឋបានដឹងថា ការបំពេញបែបបទធ្វើអត្តសញ្ញាណបណ្ណហ្នឹងត្រូវការឯកសារអ្វីខ្លះ ហើយពេលដែលគាត់មកធ្វើគាត់យកឯកសារមកគ្រប់គ្រាន់។ អ៊ីចឹងអត់មានបញ្ហាអីប្រឈមជាមួយបញ្ហាឯកសារទេ»។
លោកបន្តថា ចំពោះការចុះយុទ្ធនាការធ្វើអត្តសញ្ញាណបណ្ណសញ្ជាតិខ្មែរនេះ គឺកម្លាំងសមត្ថកិច្ច ធ្វើការថតបំពេញបែបបទ រួចបញ្ជូនទិន្នន័យទៅស្នងការដ្ឋាននគរបាលរាជធានីភ្នំពេញ ហើយស្នងការដ្ឋាននឹងបញ្ជូនទៅអគ្គនាយកដ្ឋានអត្តសញ្ញាណកម្ម។
ក្រោយអគ្គនាយកដ្ឋានអត្តសញ្ញាណកម្មបោះពុម្ពរួច កម្លាំងសមត្ថិច្ចនគរបាលក្នុងមូលដ្ឋាននឹងយកទៅចែកជូនដល់ប្រជាពលរដ្ឋតាមខ្នងផ្ទះតែម្តង៕