.jpg)
រដ្ឋមន្ត្រីក្រសួងកិច្ចការនារី និងសារក្នុងយុទ្ធនាការ ១៦ ថ្ងៃ។ រូប ក្រសួងកិច្ចការនារី
ភ្នំពេញៈ ក្រសួងកិច្ចការនារី បានវាយតម្លៃថា អ្នកសារព័ត៌មាន មានការផ្លាស់ប្ដូរជាវិជ្ជមានក្នុងការសរសេរអត្ថបទព័ត៌មាន ពីអំពើហិង្សាលើស្ត្រី ដោយមានការគោរព និងអនុវត្តតាមក្រមប្រតិបត្តិប្រព័ន្ធផ្សព្វផ្សាយក្នុងអំឡុងពេល ៣ ខែចុងក្រោយ និងបានជំរុញឱ្យអ្នកប្រើប្រាស់បណ្តាញសង្គមចូលរួមយុទ្ធនាការ១៦ថ្ងៃក្នុងការបញ្ឈប់អំពើហិង្សាលើស្ត្រី។
ការវាយតម្លៃនេះ ក្រោយក្រុមការងារបានពិនិត្យ និងផ្តល់យោបល់លើរបាយការណ៍លទ្ធផលនៃការតាមដានលើសារព័ត៌មានចំនួន ១២ ដែលស្រង់ដោយក្រសួងកិច្ចការនារី អង្គការអាកសិនអេដ និងអង្គការយេនឌីវ និងកិច្ចអភិវឌ្ឍន៍ដើម្បីកម្ពុជាកាលពីថ្ងៃទី ២០ ខែតុលា ឆ្នាំ ២០២២។
ការវាយតម្លៃនេះ ក៏ស្របពេលដែលរដ្ឋាភិបាលក៏ដូចជាអង្គការក្រៅរដ្ឋាភិបាល បានរួមគ្នាធ្វើយុទ្ធនាការឌីជីថលក្រោមប្រធានបទ សារៈសំខាន់របស់ប្រព័ន្ធផ្សព្វផ្សាយក្នុងការចូលរួមទប់ស្កាត់អំពើហិង្សាលើស្ត្រី និងក្មេងស្រីដែលជាផ្នែក ១ នៃយុទ្ធនាការ ១៦ ថ្ងៃដើម្បីបញ្ឈប់អំពើហិង្សាលើស្ត្រី និងក្មេងស្រី ចាប់ពីថ្ងៃទី ២៥ វិច្ឆិកា ដល់ថ្ងៃទី ១០ ធ្នូ ផងដែរ។
ក្រសួងកិច្ចការនារី បានលើកឡើងក្នុងសេចក្ដីថ្លែងការណ៍ចុះថ្ងៃទី ៥ ធ្នូថា ជាលទ្ធផល ក្រុមការងារបានសង្កេតឃើញមានការផ្លាស់ប្ដូរជាវិជ្ជមានរបស់អ្នកសារព័ត៌មាន ក្នុងការសរសេរអត្ថបទព័ត៌មាន ការរាយការណ៍ព័ត៌មាននៃអំពើហិង្សាលើស្ត្រី ដោយមានការគោរព និងអនុវត្តតាមក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី។
ក្រសួងបញ្ជាក់ថា៖ «អង្គប្រជុំបានកត់សម្គាល់ឃើញថា ក្នុងចំណោមសារព័ត៌មាន ១២ ភាគច្រើនមានការផ្លាស់ប្តូរជាវិជ្ជមានក្នុងអំឡុង ៣ ខែចុងក្រោយនេះ ជាពិសេស ការគោរពតាមក្រមប្រតិបត្តិបានប្រសើរជាងមុន ដូចជាកាត់បន្ថយការបង្ហាញពីអត្តសញ្ញាណរបស់ជនរងគ្រោះ ការផ្ដល់ព័ត៌មានលម្អិតពេក»។
ក្នុងខ្លឹមសារអត្ថបទព័ត៌មាន មានការកាត់បន្ថយការរាយការណ៍បែបលែបខាយ ការលេងសើចលើករណីរំលោភសេពសន្ថវៈ ហើយការរាយការណ៍ភាគច្រើនផ្តោតលើទង្វើរបស់ជនសង្ស័យ និងមានការគោរពសិទ្ធិ ការរក្សាភាពថ្លៃថ្នូររបស់ជនរងគ្រោះ និងជនសង្ស័យ។
ជាមួយនឹងការមើលឃើញបែបនេះ ក្រសួងកិច្ចការនារី ក៏បានអះអាងដែរថា បើទោះជាទទួលបានភាពវិជ្ជមាន ក៏នៅមានសារព័ត៌មានមួយចំនួននៅតែបន្តរាយការណ៍ដោយមិនការពារអត្តសញ្ញាណរបស់ជនរងគ្រោះ ហើយការរាយការណ៍របស់គេ ភាគច្រើននៅមិនទាន់បានគិតគូរដល់ការផ្តល់ព័ត៌មានដែលបង្កើនការយល់ដឹង និងកែប្រែឥរិយាបថរបស់សាធារណជន ដើម្បីលុបបំបាត់អំពើហិង្សាលើស្ត្រីនៅឡើយ ព្រោះភាគច្រើននៃចំណងជើងអត្ថបទសារព័ត៌មាន នៅតែបន្តមានលក្ខណៈបែបលេងសើច មិនបានផ្តល់តម្លៃដល់ជនរងគ្រោះ និងសមាជិកគ្រួសារ។
ក្រសួងកិច្ចការនារី បានបញ្ជាក់ថា៖ «ក្រុមការងារក៏ជួបប្រទះនូវបញ្ហាប្រឈមមួយចំនួន ក្នុងការតាមដានលើសារព័ត៌មានអនឡាញ ជាពិសេសទំព័រព័ត៌មាន ដែលមិនបានចុះបញ្ជិកាស្របច្បាប់ជាមួយក្រសួងព័ត៌មាន និងអ្នកសារព័ត៌មានអនឡាញដែលមិនមានជំនាញវិជ្ជាជីវៈត្រឹមត្រូវ។ ក្រុមការងារក៏បានកត់សម្គាល់អំពីឥទ្ធិពលជាវិជ្ជមានពីមហាជនតាមបណ្ដាញសង្គមនានា ដែលធ្វើឱ្យអ្នកសារព័ត៌មានកាន់តែបង្កើនការប្រុងប្រយ័ត្នជាងមុន ក្នុងការសរសេរ និងផ្សព្វផ្សាយអត្ថបទណា ដែលអាចប៉ះពាល់តម្លៃស្ត្រី និងសីលធម៌សង្គម»។
កាលពីឆ្នាំ ២០១៧ ក្រសួងកិច្ចការនារី និងក្រសួងព័ត៌មាន បានចេញសេចក្តីប្រកាសរួមស្តីពីក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី ក្នុងគោលបំណងដើម្បីទប់ស្កាត់ការយកករណីហិង្សាលើស្ត្រី (ទាំងហិង្សាផ្លូវកាយ ផ្លូវចិត្ត ផ្លូវភេទ និងអំពើហិង្សាលើផ្នែកសេដ្ឋកិច្ច) ធ្វើជាព័ត៌មានបែបកម្សាន្តសប្បាយ ឬកំប្លុកកំប្លែង និងដើម្បីកែប្រែឥរិយាបថសង្គម ក្នុងការលុបបំបាត់អំពើហិង្សាលើស្ត្រី។
សេចក្តីថ្លែងការណ៍បានបញ្ជាក់ថា៖ «ជាបន្តបន្ទាប់ ក្រសួងកិច្ចការនារី ក្រសួងព័ត៌មាន និងដៃគូពាក់ព័ន្ធ បានរៀបចំកម្មវិធីបណ្ដុះបណ្ដាល និងកម្មវិធីផ្សព្វផ្សាយក្រមប្រតិបត្តិនេះជាមួយបណ្ដាអ្នកសារព័ត៌មានក្រុមសិល្បៈ អ្នកគ្រប់គ្រងកម្មវិធីព័ត៌មាន និងនិស្សិតសារព័ត៌មាននានា ដែលអាចយកក្រមប្រតិបត្តិនេះជាផ្នែកមួយ ក្នុងការពង្រឹងលើក្រមសីលធម៌ និងវិជ្ជាជីវៈ ព្រមទាំងពង្រីកនូវតួនាទីរបស់អ្នកសារព័ត៌មាន ក្នុងការចូលរួមទប់ស្កាត់អំពើហិង្សាលើស្ត្រី»។
ជាមួយគ្នានេះ ក្រុមការងារត្រួតពិនិត្យតាមដានការអនុវត្តក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី ត្រូវបានបង្កើតឡើងជាយន្តការកម្រិតបច្ចេកទេស មានសមាសភាពមកពីក្រសួងកិច្ចការនារី ក្រសួងព័ត៌មាន ក្លិបអ្នកកាសែត គ្រឹះស្ថានអប់រំ ស្ថានីយវិទ្យុជាតិ និងឯកជន និងអង្គការសង្គមស៊ីវិលពាក់ព័ន្ធនានា។ ក្រុមការងារនេះ បានដំណើរការការងាររបស់ខ្លួនជាប្រចាំ ក្នុងការពិនិត្យ តាមដាន និងជំរុញការអនុវត្តក្រមប្រតិបត្តិនេះ។
លោក ថេ ឈុនហាក់ អគ្គនាយកនៃអគ្គនាយកដ្ឋានសមភាពយេនឌ័រ និងអភិវឌ្ឍន៍ក្រសួងកិច្ចការនារី បានថ្លែងថា សម្រាប់កិច្ចការទៅមុខ ក្រុមការងារ នឹងបន្តដំណើរការការងាររបស់ខ្លួន និងពិនិត្យលើលទ្ធភាពក្នុងការរៀបចំវិធានការជាក់លាក់ តាមរយៈការចេញលិខិតណែនាំដោយផ្ទាល់ ឬដោយបើកចំហ ចំពោះស្ថាប័នសារព័ត៌មានណាដែល នៅតែបន្តមិនអនុវត្តតាមក្រមប្រតិបត្តិ និងបង្កឱ្យប៉ះពាល់ធ្ងន់-ធ្ងរដល់ជនរងគ្រោះជាស្ត្រី ក៏ដូចជាតម្លៃរបស់ស្ត្រីទូទៅ។
លោក ថ្លែងថា ដើម្បីចូលរួមចំណែកនៅក្នុងយុទ្ធនាការ ១៦ ថ្ងៃបញ្ឈប់អំពើហិង្សាលើស្ត្រី គឺចាប់ពីថ្ងៃទី ២៥ ខែវិច្ឆិកា រហូតដល់ថ្ងៃទី ១០ ខែធ្នូ ឆ្នាំ ២០២២ ក្រុមការងាររៀបចំជាយុទ្ធនាការឌីជីថលស្ដីពី «សារៈសំខាន់របស់ប្រព័ន្ធផ្សព្វផ្សាយ ក្នុងការទប់ស្កាត់អំពើហិង្សាលើស្ត្រី និងក្មេងស្រី» តាមបណ្ដាញសង្គមរបស់ក្រសួងកិច្ចការនារី និងដៃគូពាក់ព័ន្ធ។
លោក ថេ ឈុនហាក់ បញ្ជាក់ថា៖ «អំពាវនាវឱ្យអ្នកប្រើប្រាស់បណ្តាញសង្គម ក៏ដូចជាប្រព័ន្ធផ្សព្វផ្សាយ ចូលរួមយុទ្ធនាការនេះឱ្យបានគ្រប់គ្នា តាមរយៈសកម្មភាពសំខាន់ៗ និងជម្រើសនានាជាច្រើនដែលអាចចូលរួម និងរួមគ្នានៅក្នុងយុទ្ធនាការនេះ ដើម្បីទប់ស្កាត់អំពើហិង្សាលើស្ត្រី ជាពិសេសតាមរយៈការបង្កើត Hashtag ការប្តូរ Cover Page ពណ៌ទឹកក្រូច ការផលិតកិច្ចសន្ទនានារីរតនៈ ស្តីពីតួនាទីរបស់ប្រព័ន្ធផ្សព្វផ្សាយ ក្នុងការទប់ស្កាត់អំពើហិង្សាលើស្ត្រី ការផលិតវីដេអូទស្សនមហាជន ការផលិត Poster ដោយភ្ជាប់ជាមួយសារគន្លឹះៗ និងការផលិតកម្មវិធីវិទ្យុជាដើម»៕
