មណ្ឌលគិរីៈ ប្រជាពលរដ្ឋ ៩គ្រួសារ នៅខេត្តមណ្ឌលគិរី បានឡើងមកដាក់ពាក្យប្តឹងជាលើកទី២ នៅក្រសួងរៀបចំដែនដីនគរូបនីយកម្ម និងសំណង់ ក្រសួងមហាផ្ទៃ និងទីស្តីការគណៈរដ្ឋមន្ត្រី នៅថ្ងៃទី៦ ខែធ្នូ ដើម្បីសុំអន្តរាគមន៍ជួយរកយុត្តិធម៌ ករណីរងគ្រោះដោយសារអភិបាលស្រុកអូររាំង និងអ្នកមានលុយ លួយចុះបញ្ជីលើដីរបស់ពួកគាត់ស្ថិតក្នុងភូមិពូរ៉ាង ឃុំសែនមនោរម្យ ស្រុកអូររាំង។
ពាក្យបណ្តឹងរបស់ប្រជាពលរដ្ឋទាំង៩គ្រួសារ ចុះថ្ងៃទី៥ ខែធ្នូ លើកឡើងថា ពួកគេបានរងគ្រោះបាត់បង់ដីធ្លី ដោយសារអភិបាលស្រុកអូររាំង និងអ្នកមានលុយម្នាក់បានឃុបឃិតគ្នាចុះបញ្ជីយកដីពួកគេ ដែលមានទំហំ ៣៥,៤២៤ហិកតា នៅភូមិពូរ៉ាង ឃុំសែនមនោរម្យ ស្រុកអូររាំង។ដីនេះពួកគេបានកាន់កាប់អាស្រ័យផលតាំងពីឆ្នាំ១៩៩៧ រហូតមកដល់បច្ចុប្បន្ន ដោយមានដំណាំកសិកម្មចម្រុះជាច្រើន។
តាមរយៈពាក្យបណ្តឹង ពលរដ្ឋបញ្ជាក់ថា៖«ដីនេះមានដំណាំស្រូវ ដំឡូងមី ដើមខ្នុរ ស្វាយចន្ទី និងដំណាំចម្រុះផ្សេងៗទៀត ហើយដី១ផ្នែកទៀតសម្រាប់ឃ្វាលគោក្របី។ ការកាន់កាប់អាស្រ័យផលរបស់ពួកយើងក្នុងរយៈពេលប្រមាណ២៣ឆ្នាំមកនេះ ពុំមាននរណាម្នាកជំទាស់តវ៉ាទេ»។
ប្រភពដដែលឱ្យដឹងទៀតថា នៅឆ្នាំ២០២០ ស្រាប់តែអភិបាលស្រុកអូររាំង លោកសៀក មុន្នី បានរៀបចំដីនេះឱ្យទៅលោកឧកញ៉ាស្រី ចន្ធូ និងបានលួចចុះបញ្ជីដីនេះជាដីកម្មសិទ្ធិរបស់ឧកញ៉ាស្រី ចន្ធូ។ ចំពោះករណីខាងលើនេះ ពលរដ្ឋអះអាងថា បានដាក់ពាក្យបណ្តឹងជាបន្តបន្ទាប់ ក្នុងនោះ រួមមាន សាលាខេត្តមណ្ឌលគិរី ក្រសួងមហាផ្ទៃ និងក្រសួងដែនដី នគរូបនីយកម្ម និងសំណង់ ប៉ុន្តែមិនទាន់មានលទ្ធផលដំណោះស្រាយនៅឡើយ ដោយគាំងនៅត្រឹមអាជ្ញាធរខេត្ត។
លោកម្លូស តេន តំណាងប្រជាពលរដ្ឋ ក្នុងទំនាស់ដីធ្លីនេះ ឱ្យដឹងនៅថ្ងៃទី៦ ខែធ្នូ ថា ការដាក់ពាក្យបណ្តឹងសាជាថ្មីនេះ ដោយសារកាលដាក់លើកមុន ក្រសួងមហាផ្ទៃ បានស្នើមកអភិបាលនៃគណៈអភិបាលខេត្តមណ្ឌលគិរី ពិនិត្យស្រាវជ្រាវ ប៉ុន្តែគណៈអភិបាលខេត្តដែលទទួលបន្ទុកកិច្ចការងារនេះផ្អឹបរឿងទុក ដោយប្រាប់ថា លើកពេលដោះស្រាយជាបន្តបន្ទាប់។
លោកនិយាយថា៖«មូលហេតុដែលយើងឡើងមកដាក់ពាក្យបណ្តឹងសាថ្មីទៀត ដោយសារពាក្យបណ្តឹងកាលមុនគឺយើងដាក់ហើយខាងក្រសួងមហាផ្ទៃលោកបានចេញ ស.ជ.ណ. បញ្ជូនទៅឱ្យខេត្តដោះស្រាយ។ ប៉ុន្តែខេត្ត គាត់អត់ព្រមដោះស្រាយ ដូច្នេះយើងមានតែឡើងមកដាក់សាថ្មីទៀតដើម្បីឱ្យក្រសួង ស្ថាប័នពាក់ព័ន្ធជួយធ្វើការរឿងហ្នឹងទៅខេត្តវិញ»។
លោកគ្រើង តុលា អ្នកប្រឹក្សាយោបល់ក្រុមការងារបណ្តាញសហគមន៍ជនជាតិដើមភាគតិចព្នង នៅខេត្តមណ្ឌលគិរី បញ្ជាក់ថា ចំពោះបញ្ហានេះអាជ្ញាធរក៏ដូចជាក្រសួងនៅថ្នាក់ជាតិ គួរតែពិចារណារ និងពិនិត្យឡើងវិញ ទៅលើអនុក្រឹត្យ ដែលចេញថ្មីៗ ធ្វើឱ្យប៉ះពាល់ស្រែចម្ការ លំនៅឋាន តំបន់ជំនឿ កន្លែងឃ្វាលគោក្របីរបស់ពួកគាត់។
លោកថ្លែងថា៖«គួរតែចុះសិក្សាឡើងវិញ បង្កើតគណៈកម្មការសាជាថ្មី ហើយមុនធ្វើអ្វី១ យើងត្រូវនិរាករណ៍ អនុក្រឹត្យសិន ដើម្បីពិនិត្យឡើងវិញ មិនគួរទុកឱ្យប្រជាពលរដ្ឋរងទុក្ខវេទនានោះទេ»។
លោកសៀក មុន្នី អភិបាលស្រុកអូររាំង ថ្លែងនៅទី៦ ខែធ្នូ ថា បញ្ហាដីធ្លីនៅទីនោះ លោកបានសម្របសម្រួល និងបញ្ចប់រឿងរួចរាល់អស់ហើយ ដោយភាគីខាងប្រជាពលរដ្ឋ ព្រមទទួលសំណងជាប្រាក់ ដែលគិតទៅតាមទំហំដី និងដំណាំ ដែលពួកគាត់បានដាំ។ លោកថ្លែងថា៖«កន្លងមកយើងបានសម្របសម្រួលគ្នារួចអស់ហើយ។ ដីអស់ហ្នឹងអត់មានបញ្ហាអ្វីទៀតទេ»។
ដោយឡែក លោកជាក់ ម៉េងហ៊ាង អភិបាលរងខេត្ត និងជាអ្នកនាំពាក្យរដ្ឋបាលខេត្តមណ្ឌលគិរីថ្លែង នៅថ្ងៃទី៦ ខែធ្នូ ថា ចំពោះបញ្ហាដីធ្លីនេះលោក នឹងពិនិត្យមើល ប៉ុន្តែបញ្ហាដីធ្លីនៅស្រុកអូររាំង ក្នុងភូមិពូរ៉ាង ឃុំសែនមនោរម្យនេះមានច្រើនក្បាលដី ហើយលោកមិនទាន់ទទួលបានព័ត៌មានច្បាស់លាស់យ៉ាងណានៅឡើយ៕