.jpg)
ពីធីចុះ MoU នៅថ្ងៃទី៦ ខែធ្នូ ដោយមានការចូលរួមពីលោក ស ខេង រដ្ឋមន្ដ្រីក្រសួងមហាផ្ទៃ និងលោក MIKAMI Masahiro ឯកអគ្គរាជទូតជប៉ុនប្រចាំកម្ពុជា។ រូបថត ក្រសួងមហាផ្ទៃ
ភ្នំពេញៈ អគ្គស្នងការដ្ឋាននគរបាលជាតិ បានចុះMoU បន្តសុពលភាពនៃការយោគយល់គ្នាជាមួយក្រុមហ៊ុន ESS របស់ជប៉ុន រយៈពេល១០ឆ្នាំបន្ថែមទៀតពាក់ព័ន្ធនឹងកិច្ចសហការផ្តល់សេវាកម្មព័ត៌មានសន្តិសុខ បន្ទាប់ពីបានអនុវត្តដោយជោគជ័យរយៈពេល១០ឆ្នាំក្នុងការការពាររក្សាសន្តិសុខ និងសុវត្ថិភាពសង្គមជូនពលរដ្ឋកម្ពុជា និងធុរជនដែលជាអតិថិជនរបស់ក្រុមហ៊ុន។
ការចុះ MoU បន្តសុពលភាពនេះ បានធ្វើឡើងនៅថ្ងៃទី៦ ខែធ្នូ ដោយមានការចូលរួមពីលោក ស ខេង រដ្ឋមន្ដ្រីក្រសួងមហាផ្ទៃ និងលោក MIKAMI Masahiro ឯកអគ្គរាជទូតជប៉ុនប្រចាំកម្ពុជា ក្នុងពិធីចុះហត្ថលេខាបន្តសុពលភាពលើឧបសម្ព័ន្ធអនុស្សរណៈ នៃការយោគយល់គ្នា (MoU) រវាងអគ្គស្នងការដ្ឋាននគរបាលជាតិកម្ពុជា និងក្រុមហ៊ុន E SECURITY SERVICE Co,Ltd (ESS)។
ក្រសួងមហាផ្ទៃ បានឱ្យដឹងថា ឧបសម្ព័ន្ធអនុស្សរណៈនៃការយោគយល់គ្នារវាងអគ្គស្នងការដ្ឋាននគរបាលជាតិកម្ពុជា និងក្រុមហ៊ុន ESS នាពេលនេះ គឺបញ្ជាក់អំពីការបន្តសុពលភាពរយៈពេល១០ឆ្នាំ បន្ថែមលើអនុស្សរណៈនៃការយោគយល់គ្នាច្បាប់ដើម ស្ដីពីការសហការផ្តល់សេវាកម្មព័ត៌មានសន្តិសុខ រវាងអគ្គស្នងការដ្ឋាននគរបាលជាតិ នៃក្រសួងមហាផ្ទៃកម្ពុជា និងក្រុមហ៊ុន ESS ដែលផុតសុពលភាពកាលពីថ្ងៃទី១៦ ខែវិច្ឆិកា ឆ្នាំ២០២២។ ក្រសួងបានអះអាងថា MoU គឺគ្មានការផ្លាស់ប្ដូរខ្លឹមសារ ដូចមានចែង ក្នុងមាត្រានៃអនុស្សរណៈ នៃការយោគយល់គ្នាច្បាប់ដើមនោះទេ។
ក្រសួងមហាផ្ទៃ បានបញ្ជាក់ថា៖«ពិធីចុះ MoU បន្តសុពលភាពនៃការយោគយល់គ្នា រវាងអគ្គស្នងការដ្ឋាននគរបាលជាតិកម្ពុជា និងក្រុមហ៊ុន ESS នាពេលនេះ គឺធ្វើឡើងបន្ទាប់ពីមានការស្នើសុំពី លោក OKUBO Hideo ជាស្ថាបនិកមូលនិធិគាំទ្រការអប់រំអន្តរជាតិកម្ពុជា ហៅកាត់CIESF នាឱកាសសុំការអនុញ្ញាតចូលជួបសម្តែងការគួរសមជាមួយសម្ដេចក្រឡាហោម
លោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីទី២១ ខែកញ្ញា ឆ្នាំ២០២២ ដែលអនុស្សរណៈនេះត្រូវបានផុតកំណត់នៅអំឡុងខែតុលា ឆ្នាំ២០២២កន្លងមក»។
លោក TAKEHARU MIZUKOSHI នាយកប្រតិបត្តិក្រុមហ៊ុន ESS បាននិយាយថា ក្នុងឆ្នាំ២០១២ បន្ទាប់ពីទទួលបានគោលការណ៍អនុញ្ញាតពីរាជរដ្ឋាភិបាល និងក្រសួងមហាផ្ទៃកម្ពុជា ក្នុងការបង្កើតអនុស្សរណៈ នៃការយោគយល់គ្នារវាង អគ្គស្នងការដ្ឋាននគរបាលជាតិ និងក្រុមហ៊ុនESS រួចមក ទាំងភាគីក្រុមហ៊ុន និងកងកម្លាំងនគរបាលជាតិកម្ពុជា បានសហការគ្នាចាត់តាំងអនុវត្តស្របតាមស្មារតី និងខ្លឹមសារដូចមានចែងក្នុង MoU ដោយផ្តោតសំខាន់ទៅលើការចូលរួមការពាររក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ជូនដល់ប្រជាពលរដ្ឋកម្ពុជា និងធុរជនដែលជាអតិថិជនរបស់ក្រុមហ៊ុនផ្ទាល់។
លោក បានបញ្ជាក់ថា៖«ដោយឡែកតាមរយៈឧបករណ៍ សម្ភារបច្ចេកទេស និងប្រព័ន្ធផ្តល់សញ្ញាសន្តិសុខរបស់ក្រុមហ៊ុន និងដោយមានការគាំទ្រសម្របសម្រួលពីមជ្ឈមណ្ឌលប្រចាំបញ្ជា នៃអគ្គស្នងការដ្ឋាននគរបាលជាតិ និងមជ្ឈមណ្ឌលប្រចាំបញ្ជា នៃស្នងការដ្ឋាននគរបាលរាជធានី-ខេត្ត កិច្ចសហការរក្សាសន្តិសុខ សណ្តាប់ធ្នាប់ និងបង្ការទប់ស្កាត់ បទល្មើសទទួលបានលទ្ធផលជាច្រើនផងដែរ»។
ដោយក្នុងនោះ លោក TAKEHARU ក៏បានអះអាងដែរថា ក្រុមហ៊ុន ESS ដែលកំពុងមានវត្តមាននៅកម្ពុជា និងបានអនុវត្តនីតិវិធីសុពលភាព MoU កន្លងមក បានសហការយ៉ាងជិតស្និទ្ធជាមួយអាជ្ញាធរកម្ពុជា និងបានផ្តល់សេវាកម្មជូនដល់អតិថិជនកម្ពុជាបានជាច្រើន ដែលក្នុងនោះរួមមានដូចជា ករណីចោរកម្ម អគ្គិភ័យ គ្រោះទឹកជំនន់ សង្គ្រោះបន្ទាន់ជាដើម។
ក្រុមហ៊ុនប្រព័ន្ធសុវត្តិភាព ESS គឺជាក្រុមហ៊ុនមួយដែលអាចការពារសុវត្ថិភាពទីតាំងរបស់អស់លោកអ្នក ទោះបីជាទីតាំងគ្មានអ្នកយាមក៏ដោយ ដោយក្រុមហ៊ុននេះ អាចការពារបានយ៉ាងមានប្រសិទ្ឋភាពជាមួយនឹងប្រព័ន្ធសុវត្ថិភាពទំនើបចុងក្រោយរបស់ Japan ពី E-Security Services-ESS ដែលធ្វើការត្រួតពិនិត្យឃ្លាំមើល២៤ម៉ោងពី ESS Control Room រាមរយៈការបំពាក់ប្រព័ន្ធប្រកាសអាសន្ន Alarm System និងមានក្រុមចុះអន្តរាគមន៍បានរហ័សភ្លាមៗ ក្នុងកិច្ចសហការពីខាងកងកម្លាំងប៉ូលិសប្រចាំមូលដ្ធាន។
លោក ស ខេង រដ្ឋមន្ត្រីក្រសួងមហាផ្ទៃ បានថ្លែងក្នុងឱកាសនោះ ដោយបានកោតសរសើរចំពោះសមិទ្ធផលរបស់ក្រុមហ៊ុន ESS ដែលសម្រេចបានក្នុងរយៈពេល១០ឆ្នាំ នៃការអនុវត្ត MoU កន្លងមក។ លោក បានចាត់ទុកក្រុមហ៊ុនមួយនេះថា បានដើរតួជាផ្នែកមួយសំខាន់ក្នុងការរក្សាសន្តិសុខ សណ្ដាប់ធ្នាប់នៅកម្ពុជា តាមរយៈកិច្ចសហការជិតស្និទ្ធជាមួយអាជ្ញាធរប៉ូលិស។
លោក សង្ឃឹមថា៖«ក្រុមហ៊ុននេះ នឹងបន្តផ្សព្វផ្សាយដល់ប្រជាពលរដ្ឋដើម្បីជំរុញឱ្យពួកគាត់ប្រើប្រាស់ប្រព័ន្ធសេវាកម្មព័ត៌មានសន្តិសុខនេះឱ្យបានកាន់តែច្រើន ហើយក្រសួងមហាផ្ទៃ ស្វាគមន៍ចំពោះកិច្ចសហការជាមួយក្រុមហ៊ុននេះជាមួយអគ្គស្នងការដ្ឋាននគរបាលជាតិ ក្នុងការបន្តសុពលភាពរយៈពេល១០ឆ្នាំទៀត»៕
