.jpg)
មន្ត្រីនគរបាលកម្ពុជា និងមន្ត្រីជំនាញអាល្លឺម៉ង់ថតរូបអនុស្សាវរីយ៍។ រូបថត ក្រសួងយុត្តិធម៌
ភ្នំពេញៈ មន្ត្រីជាន់ខ្ពស់នៃក្រសួងយុត្តិធម៌ មន្ត្រីនគរបាលជំនាញកម្ពុជា និងមន្ត្រីជំនាញពីប្រទេសអាល្លឺម៉ង់ ជាង ៤០ នាក់ បានពិភាក្សានិងផ្លាស់ប្ដូរបទពិសោធន៍គ្នា នៅក្នុងសិក្ខាសាលាស្តីពីឧក្រិដ្ឋកម្មដែលមានការចាត់តាំងដោយមានគោលដៅច្បាស់លាស់ដោយផ្តោតលើការប្រឆាំងនឹងការសម្អាតប្រាក់ ដែលជាកិច្ចចាប់ផ្តើមរួមគ្នារវាងរដ្ឋាភិបាល-អាល្លឺម៉ង់ និងកម្ពុជា ដើម្បីទប់ស្កាត់ និងបង្ក្រាបឧក្រិដ្ឋកម្មសម្អាតប្រាក់នៅកម្ពុជា។
សិក្ខាសាលាស្តីពីឧក្រិដ្ឋកម្មដែលមានការចាត់តាំងដោយមានគោលដៅច្បាស់លាស់ ដោយផ្តោតលើការប្រឆាំងនឹងការសម្អាតប្រាក់ ត្រូវបានប្រារព្ធធ្វើឡើងរយៈពេល ៣ ថ្ងៃ ចាប់ពីថ្ងៃទី ៥ ដល់ថ្ងៃទី ៧ ខែធ្នូ ឆ្នាំ ២០២២ នៅសណ្ឋាគារ Tribe ក្រោមការឧបត្ថម្ភគាំទ្រពីអង្គការខុនរ៉ាតប្រចាំតំបន់ KAS Regional in Singapore។
លោក ជិន ម៉ាលីន រដ្ឋលេខាធិការក្រសួងយុត្តិធម៌ និងជាអ្នកនាំពាក្យក្រសួងយុត្តិធម៌ បានប្រាប់ភ្នំពេញប៉ុស្តិ៍នៅថ្ងៃទី ៦ ខែធ្នូថា សិក្ខាសាលានេះ មានគោលបំណងផ្លាស់ប្តូរបទពិសោធន៍ពីប្រទេសអាល្លឺម៉ង់ លើឧក្រិដ្ឋកម្មដែលមានការចាត់តាំងដោយមានគោលដៅច្បាស់លាស់ ដោយផ្តោតលើការប្រឆាំងនឹងការសម្អាតប្រាក់ ដោយមានវាគ្មិនជាអ្នកជំនាញការមកពីប្រទេសអាល្លឺម៉ង់ និងកម្ពុជា។
លោកបាននិយាយថា កិច្ចសហប្រតិបត្តិការលើវិស័យយុត្តិធម៌ព្រហ្មទណ្ឌនេះ គឺចាប់ផ្តើមពីការធ្វើសិក្ខាសាលា និងកិច្ចប្រជុំរួមគ្នា រវាងអ្នកជំនាញការ និងមន្ត្រីអនុវត្តន៍ច្បាប់កម្ពុជា ជាមួយអ្នកជំនាញការ និងមន្ត្រីអនុវត្តន៍ច្បាប់របស់ប្រទេសអាល្លឺម៉ង់ ដើម្បីចែករំលែកបទពិសោធន៍គ្នាទៅវិញទៅមក។
លោកបានបញ្ជាក់ថា៖ «កិច្ចពិភាក្សានេះ គឺដើម្បីជជែករកបញ្ហា និងធ្វើការដោះស្រាយដែលប្រធានបទដំបូងដែលយើងបានរៀបចំគឺការសម្អាតប្រាក់ ដោយសារតែកម្ពុជាកំពុងតែប្រយុទ្ធប្រឆាំងនឹងការសម្អាតប្រាក់ ដើម្បីរំដោះខ្លួនពីបញ្ជីប្រផេះ។ អ៊ីចឹងការកសាងសមត្ថភាពមន្ត្រីអនុវត្តន៍ច្បាប់ក្នុងការប្រយុទ្ធប្រឆាំងការសម្អាតប្រាក់ គឺជារឿងសំខាន់»។
លោក ជិន ម៉ាលីន បានឱ្យដឹងទៀតថា ក្នុងរយៈពេល ៣ ថ្ងៃនេះ មន្ត្រីកម្ពុជា និងមន្ត្រីមកពីប្រទេសអាល្លឺម៉ង់ នឹងជួបជជែកគ្នា ដោយធ្វើការផ្លាស់ប្តូរបទពិសោធន៍ ជាពិសេសគឺរៀនសូត្រពីគ្នាទៅវិញទៅមក ដើម្បីធ្វើយ៉ាងណារួមគ្នាដោះស្រាយបញ្ហាប្រឈម ដែលកម្ពុជាកំពុងប្រឈមនឹងការលាងលុយកខ្វក់ ឬការសម្អាតប្រាក់។
លោកបានបញ្ជាក់ថា៖ «ការផ្លាស់ប្តូរ និងរៀនសូត្រពីគ្នាទៅវិញទៅមកនេះ គឺផ្តោតទៅលើគ្រប់ទិដ្ឋភាពទាំងអស់ទៅនឹងការប្រយុទ្ធប្រឆាំងបទល្មើសសម្អាតប្រាក់ រួមទាំងការរៀបចំក្របខ័ណ្ឌច្បាប់ និងគោលនយោបាយ រួមទាំងវិធានការយន្តការដែលកម្ពុជាបានដាក់ចេញនានា ព្រមទាំងជជែកពីប្រសិទ្ធភាពនៃការអនុវត្តច្បាប់ និងជំនាញបច្ចេកទេសផ្សេងៗក្នុងការប្រយុទ្ធប្រឆាំងទប់ស្កាត់នឹងឧក្រិដ្ឋកម្មនៃការសម្អាតប្រាក់នេះ»។
លោក ជិន ម៉ាលីន បានឱ្យដឹងថា មន្ត្រីនគរបាលយុត្តិធម៌ ចៅក្រម ព្រះរាជអាជ្ញា និងមន្ត្រីដែលធ្វើការងារពាក់ព័ន្ធនឹងក្របខ័ណ្ឌច្បាប់ និងគោលនយោបាយនៅក្រសួងយុត្តិធម៌ប្រមាណជាង ៤០ នាក់ បានចូលរួមក្នុងសិក្ខាសាលានេះ ហើយតាមរយៈកិច្ចសហប្រតិបត្តិការនេះ នៅដើមឆ្នាំ ២០២៣ មន្ត្រីកម្ពុជានឹងទៅធ្វើទស្សនកិច្ច និងផ្លាស់ប្តូរបទពិសោធន៍ដោយផ្ទាល់នៅប្រទេសអាល្លឺម៉ង់ ដើម្បីបន្តកិច្ចការរួមគ្នារវាងប្រទេស ទាំងក្នុងការទប់ស្កាត់ និងបង្ក្រាបបទល្មើសសម្អាតប្រាក់នៅកម្ពុជា។
កាលពីថ្ងៃទី ៥ ធ្នូ លោក ជិនម៉ាលីន ក៏បានដឹកនាំក្រុមការងារក្រសួងយុត្តិធម៌ ចូលរួមកិច្ចសន្ទនាជាន់ខ្ពស់ស្តីពីផែនការសកម្មភាពរបស់អង្គការសហប្រជាជាតិស្តីពីសុវត្ថិភាពអ្នកសារព័ត៌មាន និងបញ្ហាប្រឈម ដែលរៀបចំឡើងដោយអង្គការអប់រំវិទ្យាសាស្ត្រ និងវប្បធម៌របស់អង្គការសហប្រជាជាតិ។
លោក ជិន ម៉ាលីន បានប្រាប់ថា កិច្ចសន្ទនានេះ ត្រូវបានរៀបចំឡើងក្នុងគោលបំណង លើកកម្ពស់យល់ដឹងអំពីផែនការសកម្មភាព និងកំណត់ស្តង់ដានៃការរៀបចំគោលនយោបាយ និងច្បាប់ពាក់ព័ន្ធនឹងសុវត្ថិភាពអ្នកសារ
ព័ត៌មាន និងបញ្ហាប្រឈម។
លោកថ្លែងថា កិច្ចសន្ទនានេះ ក៏ដើម្បីរៀបចំយន្តការតាមដាន រាយការណ៍ និងកសាងសមត្ថភាពមន្ត្រីអនុវត្តន៍ច្បាប់ ព្រមទាំងធ្វើការសិក្សាស្រាវជ្រាវ និងកសាងសម្ព័ន្ធភាព ដែលជាជំហានបន្តបន្ទាប់ឱ្យស្របនឹងចំណុចទី ១០ នៃគោលដៅទី ១៦ នៃគោលដៅអភិវឌ្ឍន៍ប្រកបដោយចីរភាពដើម្បីធ្វើឱ្យតួនាទីនៃការបញ្ចេញមតិដោយសេរី និងការទទួលបានព័ត៌មានជាបុរេលក្ខខណ្ឌ និងកត្តាដែលមានលក្ខណៈអំណោយផលសម្រាប់ការអភិវឌ្ឍ និងការគោរពសិទ្ធិមនុស្សនៅកម្ពុជា៕
