.jpg)
ការប្រកួតវគ្គចុងក្រោយកាលពីខែមីនា ឆ្នាំ២០២២ កន្លងទៅ ។ រូបថត BMC
ភ្នំពេញ: ការប្រកួតប្រជែងគំរូអាជីវកម្ម(BMCCambodia)ដែលជាការប្រកួតរបស់សិស្ស-និស្សិតថ្នាក់ជាតិពេលនេះបានត្រឡប់មកវិញហើយក្នុងការបើកឱកាសឱ្យបេក្ខជនដាក់ពាក្យបង្ហាញពីគំនិតអាជីវកម្មឬអាជីវកម្មសង្គមហើយមានបំណងចង់ឈ្នះដំណើរកម្សាន្តទៅកាន់ទីក្រុងតូក្យូប្រទេសជប៉ុន។
លោក Stephen Paterson អ្នកសម្របសម្រួលកម្មវិធី BMC បាននិយាយថា៖ «កម្មវិធីនេះបើកស្វាគមន៍ដល់និស្សិតទាំងអស់នៅសាកលវិទ្យាល័យរដ្ឋ និងឯកជនទូទាំងប្រទេសកម្ពុជា ហើយសិស្សវិទ្យាល័យក៏មានសិទ្ធិដាក់ពាក្យផងដែរ»។
BMC Cambodia ត្រូវបានបង្កើតឡើងក្នុងឆ្នាំ២០០៩ ជាផែនការអាជីវកម្មហើយបានចាប់ផ្តើមកម្មវិធីប្រកួតប្រជែងនៅក្នុងឆ្នាំ២០១១ ជាមួយនឹង៥ប្រភេទវិញ្ញាសា រួមមាន កសិកម្ម ថាមពលស្អាត វេជ្ជសាស្ត្រ បច្ចេកវិទ្យា និងអាជីវកម្មទូទៅ។
កម្មវិធីនេះមានគោលបំណងលើកកម្ពស់សហគ្រិនភាព និងផ្នត់គំនិតសហគ្រិនភាពក្នុងចំណោមយុវជនកម្ពុជា។
ក្នុងឆ្នាំទី១៣នៃដំណើរការប្រកួតដែលបានបើកទទួលពាក្យសុំពីពេលនេះរហូតដល់ថ្ងៃទី២៩ ខែធ្នូ លោក Paterson បាននិយាយថា ជាធម្មតា BMC Cambodia ទទួលបានការដាក់ប្រកួតវីដេអូអាជីវកម្មរហូតដល់១០០ក្រុម ក្នុង១ឆ្នាំ ដែលមកពីចន្លោះ២០ ទៅ២៥គ្រឹះស្ថានសិក្សា ទូទាំងប្រទេស។
ដើម្បីចូលរួមការប្រកួត សិស្សានុសិស្ស ត្រូវអនុវត្តតាមជំហានមួយចំនួន មុននឹងបញ្ជូនវីដេអូអាជីវកម្មគំរូរបស់ខ្លួនមកកាន់ BMC Cambodia។
សិស្សានុសិស្សបង្កើតជាក្រុមដែលមានសមាជិក៣នាក់ ហើយបង្កើតវីដេអូរយៈពេល៣នាទី រួចបង្ហោះវាលើបណ្ដាញសង្គម YouTube។ឥឡូវនេះពួកគេទាញយកទម្រង់ពាក្យស្នើសុំដោយប្រើលេខកូដQRនៅលើសេចក្តីប្រកាស។ជាចុងក្រោយសិស្សានុសិស្សអាចដាក់ទម្រង់ពាក្យសុំរបស់ពួកគេតាមអ៊ីមែល។នេះបើតាមសេចក្តីប្រកាសរបស់ BMC Cambodia។
លោកPatersonប្រធានផ្នែកច្នៃប្រឌិត និងសហគ្រិនភាព(CIEO)នៅឯសាកលវិទ្យាល័យជាតិគ្រប់គ្រង(NUM)បាននិយាយថា៖«ក្រុមប្រកួតប្រជែងប្រហែល២០ក្រុម ត្រូវបានជ្រើសរើសសម្រាប់កម្មវិធីបណ្តុះបណ្តាលរយៈពេល៣ខែបន្ទាប់មក ដោយការប្រកួតប្រជែងពាក់កណ្តាលផ្តាច់ព្រ័ត្រ»។
លោកបានប្រាប់ភ្នំពេញប៉ុស្តិ៍ថា៖ «ក្រុមកំពូលទាំង១០នឹងឆ្ពោះទៅវគ្គផ្តាច់ព្រ័ត្រដែលធ្វើឡើងនៅខែឧសភា ឆ្នាំ២០២៣។យើងកំពុងស្វែងរកគំរូអាជីវកម្ម និងសង្គមតែមួយគត់ ដែលដោះស្រាយបញ្ហាអតិថិជន ឬសង្គមពិតប្រាកដ»។
លោក Paterson បានឱ្យដឹងថា គណៈកម្មាធិការវិនិច្ឆ័យមានទាំងសហគ្រិន និងនាយកប្រតិបត្តិអាជីវកម្មមកពីក្រុមហ៊ុនអន្តរជាតិឈានមុខគេនានា។
លោកបានបន្ដថាគោលបំណងសំខាន់នៃកម្មវិធីគឺបង្រៀននូវយុទ្ធសាស្ដ្រអាជីវកម្មសាកល្បងដើម្បីឱ្យសិស្សរៀនពីរបៀបបង្កើតគំនិតអាជីវកម្ម និងសាកល្បងដំណើរការគំនិតរបស់ពួកគេ។គោលដៅគឺដើម្បីអភិវឌ្ឍគំនិតសហគ្រិន។
អ្នកសម្របសម្រួលកម្មវិធីរូបនេះបានបន្ថែមថា៖ «ជារៀងរាល់ឆ្នាំ ក្រុម១ ឬ២អាចនឹងបន្ដអនុវត្តអាជីវកម្មរបស់ពួកគេ។ក្នុងរយៈពេលជាច្រើនឆ្នាំ យើងឃើញថា ក្រុមជាច្រើននឹងអនុវត្តគំនិតអាជីវកម្មផ្សេងទៀតដែលមិនមែនជាគំនិតទទួលបានជ័យលាភីនោះទេ»។
ដូច្នេះPaterson និយាយថា គោលដៅគឺដើម្បីបង្រៀននូវយុទ្ធសាស្ដ្រអាជីវកម្មសាកល្បង ដែលក្រុមនីមួយៗអាចប្រើប្រាស់វិធីសាស្ត្រដូចគ្នានេះទាក់ទងនឹងឱកាសសហគ្រិនផ្សេងទៀតនាពេលអនាគត។ដូច្នេះហើយគំនិតអាជីវកម្មដែលឈ្នះគឺមិនមែនតែងតែអនុវត្តជាអាជីវកម្មប្រចាំថ្ងៃបាននោះទេ។
ដោយភាពជាដៃគូជាមួយសាកលវិទ្យាល័យកាលីហ្វ័រនីញ៉ាBerkeley វិទ្យាស្ថានអប់រំនឹងបម្រើជាដៃគូចំណេះដឹងដែលសាស្ត្រាចារ្យមួយចំនួននឹងចូលរួមក្នុងកម្មវិធីបណ្តុះបណ្តាលទាំងដោយផ្ទាល់និងតាមរយៈវីដេអូនិម្មិត។
ម្ចាស់ជយលាភីមេដាយមាស BMC Cambodia ឆ្នាំ២០២២ ដែលទទួលបានប្រាក់រង្វាន់៥ពាន់ដុល្លារបានផលិតផលិតផលSugarpadsប្រើប្លាស្ទិកតិចតួចបំផុតជាបន្ទះទ្រនាប់រដូវដែលមិនប៉ះពាល់ដល់បរិស្ថានសម្រាប់ស្ត្រី។SugarPadsគឺជាការច្នៃប្រឌិតថ្មីដែលអាចរលាយ ផលិតចេញពីកាកសំណល់កសិផល។
ចាប់តាំងពីឆ្នាំ២០០៩ មក BMC Cambodia ទទួលពាក្យប្រកួតប្រជែងជាង ១ ៥០០ ដោយមានជាង ៣០០ក្រុមមកពីសាកលវិទ្យាល័យជាង២០។
សម្រាប់ព័ត៌មានបន្ថែមទាក់ទងនឹងពេលវេលានៃការប្រកួតសូមចូលទៅកាន់គេហទំព័រhttps://bmccambodia.com៕
