The Phnom Penh Post Search

Search form

Logo of Phnom Penh Post newspaper Phnom Penh Post - លោកស្រី Ann Mills-Griffiths សរសើរ​កម្ពុជា​លើកិច្ចសហប្រតិបត្តិការPOW/MIAល្អ​ជាងគេ ក្នុងចំណោម​ប្រទេស​ដែលមាន​កម្មវិធីស្វែងរក​អដ្ឋិធាតុ​ទាហាន​អាមេរិក

លោកស្រី Ann Mills-Griffiths សរសើរ​កម្ពុជា​លើកិច្ចសហប្រតិបត្តិការPOW/MIAល្អ​ជាងគេ ក្នុងចំណោម​ប្រទេស​ដែលមាន​កម្មវិធីស្វែងរក​អដ្ឋិធាតុ​ទាហាន​អាមេរិក

Content image - Phnom Penh Post
​លោក ឧបនាយករដ្ឋមន្ដ្រី ស ខេង រដ្ឋមន្ដ្រី​ក្រសួងមហាផ្ទៃ និងលោកស្រី Ann Mills-Griffiths ពិភក្សាលើកិច្ចសហប្រតិបត្តិការPOW/MIA។ រូបថត Sar Kheng page

លោកស្រី Ann Mills-Griffiths សរសើរ​កម្ពុជា​លើកិច្ចសហប្រតិបត្តិការPOW/MIAល្អ​ជាងគេ ក្នុងចំណោម​ប្រទេស​ដែលមាន​កម្មវិធីស្វែងរក​អដ្ឋិធាតុ​ទាហាន​អាមេរិក

​ភ្នំពេញៈ​ ប្រធាន​សម្ព័ន្ធជាតិ​នៃ​គ្រួសារ​ឈ្លើយសឹក និង​ទាហាន​អាមេរិក​បាត់​ខ្លួន​ក្នុង​អាស៊ីអាគ្នេយ៍ ដែល​ហៅ​កាត់​ថា (POW/MIA) លោកស្រី Ann Mills-Griffiths បាន​លើកសរសើរ​កម្ពុជា​ថា ជា​ប្រទេសមួយ​ដែល​ផ្តល់​កិច្ចសហប្រតិបត្តិការ​ល្អ​ជាងគេ ក្នុងចំណោម​ប្រទេស​ដែលមាន​កម្មវិធី ស្វែងរក​អដ្ឋិធាតុ​ទាហាន​អាមេរិក​ដែល​បាន​បាត់​ខ្លួន​ក្នុងសម័យ​សង្គ្រាម​កំពុងមាន​ប្រតិបត្តិការ​។

​ លោកស្រី Ann Mills-Griffiths បានលើកឡើង​បែបនេះ​ក្នុងពេល​ជួប​សម្តែង​ការគួរសម​ជាមួយ​លោក ឧបនាយករដ្ឋមន្ដ្រី ស ខេង រដ្ឋមន្ដ្រី​ក្រសួងមហាផ្ទៃ នៅ​វិមាន​រដ្ឋសភា នៅ​រសៀល​ថ្ងៃទី​៦ ខែធ្នូ ឆ្នាំ​២០២២​។

​ លោកស្រី​ថ្លែងថា​៖ «​ទោះ​ក្នុងស្ថានភាព​កូ​វីដ​១៩ ក្តី​ប្រ​ទស​កម្ពុជា​បានបង្ហាញ​ថា មិនមាន​ភាព​ថមថយ​ក្នុងការ​រុករ​កនូវ​អដ្ឋិធាតុ​ទាហាន​អាមេរិក​ដែល​បាន​បាត់​ខ្លួន​នេះ​ទេ ថែមទាំង​មាន​វឌ្ឍនភាព​ទៅមុខ​ជានិច្ច​។ ជាងនេះទៅទៀត ប្រទេស​កម្ពុជា​ក៏​ធ្លាប់បាន​ធ្វើការ​ជាមួយ​អង្គភាព​ដៃគូ​របស់​សហរដ្ឋអាមេរិក​»​។​

​ ក្នុងជំនួប​នោះ លោកស្រី Ann Mills-Griffiths បាន​សម្តែង​សេចក្តី​រីករាយ​ក្រៃលែង ដែល​បាន​ជួប​លោក ស ខេង សាជាថ្មី និង​បាន​ជម្រាបជូន​លោក ស ខេង ថា មកដល់ពេលនេះ​លោកស្រី បានមក​បំពេញ​ទស្សនកិច្ច​នៅ​កម្ពុជា ជា​ច្រើនដង​មកហើយ ដែល​លើក​នេះ​អាចជា​ពេល​ចុងក្រោយ​សម្រាប់​លោកស្រី ដែល​បានមក​ទស្សនកិច្ច​នៅ​កម្ពុជា​។

​ ហេតុនេះ​លោកស្រី​មានបំណង​ចូលជួប​សម្តែង​ការគួរសម ដើម្បី​ថ្លែងអំណរគុណ លោក ស ខេង ព្រះមហាក្សត្រ ក៏ដូចជា​រាជរដ្ឋាភិបាល​កម្ពុជា ព្រមទាំង​មន្ត្រី​ពាក់ព័ន្ធ​ដទៃទៀត​ដែល​បាន​ចូលរួម​សហការ​ក្នុងនាម​មនុស្សធម៌​ជួយ​ដល់​ការងារ​ស្វែងរក​អដ្ឋិធាតុ​ទាហាន​អាមេរិក​ដែល​បាន​បាត់​ខ្លួន​ក្នុងសម័យ​សង្គ្រាម​។​

​ លោកស្រី Ann Mills-Griffiths លើកឡើងថា​៖«​ខ្ញុំ​បានមក​បំពេញ​ទស្សនកិច្ច​ជា​លើកដំបូង​នៅក្នុង​ឆ្នាំ​១៩៩២ ហើយ​ចាប់តាំងពី​ពេល​នោះមក ខ្ញុំ​បានធ្វើ​ដំណើរ​ទៅ​ផ្នែក​ជាច្រើន​នៃ​ប្រទេស​កម្ពុជា​»​។

​លោក ស ខេង បាន​ថ្លែងអំណរគុណ​ចំពោះ​ការវាយតម្លៃ​ខ្ពស់​របស់​លោកស្រី Ann Mills-Griffiths ចំពោះ​ប្រមុខរដ្ឋ និង​ថ្នាក់ដឹកនាំ​របស់​រាជរ​ដ្ឋា​ភិ​បាល​។ គោលនយោបាយ​របស់​រា​ជ​រដ្ឋាភិបាល​កម្ពុជា មិនមាន​ការប្រែប្រួល​ទេ​គឺ​នៅតែ​បន្ត ផ្តល់​ការគាំទ្រ​ដល់​ការងារ​ស្វែងរក​អដ្ឋិធាតុ​ទាហាន​អាមេរិក​ដែល​បច្ចុប្បន្ន​នៅសល់​៤៨​រូប​ទៀត​។

​ លោ​កស ខេង ថ្លែងថា​៖«​យន្តការ​ទាំងអស់​រប​ស់​ប្រទេស​កម្ពុជា នឹង​ត្រៀមខ្លួន​សហការ​ជាមួយ​គម្រោង​របស់លោក​ស្រី ពាក់ព័ន្ធ​នឹង​ការងារ​ស្វែងរក​អដ្ឋិធាតុ​នេះ សម្រាប់​ឆ្នាំ​២០២២ និង​ឆ្នាំ​២០២៣​ទៅមុខទៀត​»​។

​ ជាមួយគ្នា​នោះ លោក ឧបនាយករដ្ឋមន្ដ្រី បាន​ជូនពរ​ដល់ លោកស្រី Ann Mills-Griffiths ប្រធាន​សម្ព័ន្ធជាតិ​នៃ​គ្រួសារ​ឈ្លើយសឹក និង​ទាហាន​អាមេរិក​បាត់​ខ្លួន​ក្នុង​អាស៊ីអាគ្នេយ៍ ឱ្យ​ទទួលបាន​ជោគជ័យ​ក្នុង​ដំណើរ​ទស្សនកិច្ច​របស់​លោកស្រី​នៅពេលនេះ ហើយ​សង្ឃឹមថា កិច្ចការ​ស្វែងរក​អដ្ឋិធាតុ​ទាហាន​អាមេរិក​ដែល​បាន​បាត់​ខ្លួន​ក្នុងសម័យ​សង្គ្រាម និង​ដំណើរការ​ទៅ​ឈានដល់​ការបិទ​បញ្ចប់​ប្រកបដោយ​លទ្ធផល​គួរ​ជាទី​គាប់ចិត្ត​។

​ លោក គិ​ន ភា ប្រធាន​វិទ្យាស្ថាន​ទំនាក់ទំនង​អន្តរជាតិ នៃ​រាជបណ្ឌិត្យសភាកម្ពុជា ថ្លែង​នៅ​ថ្ងៃទី​៧ ខែធ្នូ​ថា លោក​ឯកភាព​ចំពោះ​ការលើកឡើង​របស់លោក​ស្រី Ann Mills-Griffiths ក៏ដូចជា​ការលើកឡើង​របស់លោក​ឧបនាយករដ្ឋមន្ត្រី ស ខេង ពាក់ព័ន្ធ​ជាមួយនឹង​កិច្ចសហប្រតិបត្តិការ​រ​វាង​កម្ពុជា និង​សហរដ្ឋអាមេរិក ដែល​រួមគ្នា​ក្នុងការ​ស្វែងរក​អដ្ឋិធាតុ​ទាហាន​សហរដ្ឋអាមេរិក​ដែល​បាត់​ខ្លួន​នៅ​កម្ពុជា​ក្នុងសម័យ​សង្គ្រាម​។​

​ លោក​បន្តថា ជាក់ស្តែង​រាជរដ្ឋាភិបាល​កម្ពុជា​ជានិច្ចកាល​តែងតែ​ផ្តល់នូវ​កិច្ចសហប្រតិបត្តិការ ពេញលេញ​ប្រកបដោយ​ភាពស្មោះត្រង់​និង​ការផ្តល់​តម្លៃ​ដល់​គ្នា​ទៅវិញទៅមក​ចំពោះ​ប្រតិបត្តិ​ការស្វែងរក​អដ្ឋិធាតុ​ទាហាន​សហរដ្ឋអាមេរិក ដែល​បាត់​ខ្លួន​នៅ​កម្ពុជា​។

​ លោក​ថ្លែងថា​៖«​កម្ពុជា​តែងតែ​បំពេញ​កាតព្វកិច្ច និង​ករណីយកិច្ច​រប​ស់​ខ្លួន​ដោយ​មិត្តភាព ភាពស្មោះត្រង់ ប៉ុន្តែ​ជាការ​កត់សម្គាល់​របស់​ខ្ញុំ​កន្លងមក​រដ្ឋាភិបាល​ស​ហ​រដ្ឋ​អាមេរិក​ហាក់ដូចជា​មិនទាន់​បានផ្តល់​តម្លៃ​ខ្ពស់​គ្រប់គ្រាន់​សម្រាប់​កម្ពុជា​ក្នុង​ក្របខ័ណ្ឌ​នៃ កិច្ចសហប្រតិបត្តិការ​ជាមួយ​សហរដ្ឋអាមេរិក​លើ​បញ្ហា​ហ្នឹង​»​។

​ លោក​បានលើកឡើង​ទៀតថា ភាគី​ទាំង​២​គួរតែ​បង្កើន​នូវ​កិច្ចសហប្រតិបត្តិការ និង​បង្កើន​ការយល់​គ្នា ព្រោះ​ជានិច្ច​ជា​កាល​កម្ពុជា​តែងមាន​សុច្ឆន្ទៈ ទាំង​ក្របខ័ណ្ឌ​កិច្ចសហប្រតិបត្តិការ​ស្វែងរក​អ​ដិ្ឋ​ធាតុ​ទាហាន​អាមេរិក​បាត់​ខ្លួន និង​ក្របខ័ណ្ឌ​នៃ​កិច្ចសហប្រតិបត្តិការ​ផ្សេងៗ​ទៀត​ជាមួយ​សហរដ្ឋអាមេរិក​៕

អត្ថបទគួរចាប់អារម្មណ៍