.jpg)
ក្រុមយុវជនបើកយុទ្ធនាការជិះកង់ពីខេត្តសៀមរាប មកកាន់រាជធានីភ្នំពេញ ដើម្បីចូលរួមអបអរសាទរទិវាសិទ្ធិមនុស្សអន្តរជាតិថ្ងៃទី១០ ធ្នូ។ រូបថត CYN
សៀមរាបៈ ក្រុមយុវជនប្រមាណជិត៣០នាក់ ធ្វើយុទ្ធនាការជិះកង់ពីខេត្តសៀមរាប ចេញពីប្រាសាទអង្គរវត្ត ទៅកាន់ទីលានប្រជាធិបតេយ្យ រាជធានីភ្នំពេញ ដើម្បីចូលរួមអបអរសាទរទិវាសិទ្ធិមនុស្សអន្តរជាតិថ្ងៃទី១០ ខែធ្នូ ឆ្នាំ២០២២ ដោយពួកគេអំពាវនាវឱ្យរដ្ឋាភិបាលកម្ពុជា ប្តេជ្ញាពង្រឹងការគោរព ការផ្តល់លម្ហពេញលេញ និងការការពារសិទ្ធិមនុស្សនៅកម្ពុជា។
យុទ្ធនាការជិះកង់នេះ រៀបចំឡើង ដោយសមាគមបណ្តាញយុវជនកម្ពុជា(CYN) និងមានការចូលរួមពីយុវជនមកពីតំបន់ព្រៃឡង់ តំបន់ព្រៃព្រះរកា សិស្ស និស្សិត និងបុគ្គលិកសមាគមអង្គការមែនមែនរដ្ឋាភិបាលមួយចំនួន ដែលមានរយៈពេល៥ថ្ងៃ ចាប់ពីថ្ងៃទី៦ ដល់ថ្ងៃទី១០ ខែធ្នូ ឆ្នាំ២០២២។
CYN បញ្ជាក់ថា យុទ្ធនាការជិះកង់ដើម្បីសិទ្ធិមនុស្សនេះ គឺរៀបចំឡើងដោយមានព្រឹត្តិការណ៍សំខាន់២ គឺព្រឹត្តិការណ៍ជិះកង់ដើម្បីសិទ្ធិមនុស្ស ដែលមានយុវជនជិត៣០នាក់ ជិះកង់ពីខេត្តសៀមរាប ចេញពីប្រាសាទអង្គរវត្ត មកកាន់ទីលានប្រជាធិបតេយ្យ នៅរាជធានីភ្នំពេញ។ ចំពោះព្រឹត្តិការណ៍ទី២ គឺការជិះកង់១០ ធ្នូ ចម្ងាយ ៣០គីឡូម៉ែត្រ នៅថ្ងៃទី១០ ខែធ្នូ ឆ្នាំ២០២២។
CYN ឱ្យដឹងថា៖«ក្រុមយុវជនចំនួន៣០នាក់ បានធ្វើដំណើរមកជួបជុំគ្នានៅមុខប្រាសាទអង្គរវត្ត នៅក្នុងខេត្តសៀមរាប ដើម្បីបួងសួងដល់វិញ្ញាណក្ខន្ធបុព្វបុរសខ្មែរ ព្រមទាំងជាចំណុចចាប់ផ្តើមនៃយុទ្ធនាការជិះកង់ដើម្បីសិទ្ធិមនុស្ស ដែលនឹងជិះពីទីក្រុងអង្គរអតីតរាជធានី នៃបុព្វកាលនៃភាពរុងរឿង របស់ប្រទេសកម្ពុជា»។
លោកអូត ឡាទីន មន្ត្រីសម្របសម្រួលគម្រោង នៃ CYN និងជាអ្នកសម្របសម្រួលព្រឹត្តិការណ៍ជិះកង់នេះ ប្រាប់ភ្នំពេញប៉ុស្តិ៍នៅថ្ងៃទី៧ ធ្នូ ថា យុទ្ធនាការនេះ ធ្វើឡើង ក្នុងគោលបំណងសំខាន់ចំនួន៤ គឺ ដើម្បីចូលរួមអបអរសាទរ និងប្រារព្ធទិវាសិទ្ធិមនុស្សអន្តរជាតិ ឆ្នាំ២០២២ ខួបលើកទី៧៤។ គោលបំណងទី២ ដើម្បីជំរុញឱ្យរដ្ឋាភិបាលកម្ពុជា ប្តេជ្ញាពង្រឹងការគោរព ការផ្តល់លម្ហពេញលេញ និងការការពារសិទ្ធិមនុស្ស ជាពិសេសសិទ្ធិមនុស្សជាមូលដ្ឋាន ដែលបានកំណត់ដោយរដ្ឋធម្មនុញ្ញកម្ពុជា សេចក្តីប្រកាសជាសកលស្តីពីសិទ្ធិមនុស្ស កតិកាសញ្ញាស្តីពីសិទ្ធិពលរដ្ឋ និងនយោបាយ ព្រមទាំងកតិកាសញ្ញាស្តីពីសិទ្ធិសេដ្ឋកិច្ច សង្គម និងវប្បធម៌។
លោកបន្ថែមថា គោលបំណងទី៣ ដើម្បីជំរុញឱ្យរដ្ឋាភិបាលកម្ពុជា ត្រូវផ្តល់លម្ហសិទ្ធិសេរីភាពពេញលេញ ដល់សហគមន៍មូលដ្ឋាន និងប្រជាពលរដ្ឋខ្មែរក្នុងការអនុវត្តសិទ្ធិសេរីភាពបញ្ចេញមតិ សិទ្ធិខាងសមាគម សិទ្ធិធ្វើបាតុកម្ម ដោយសន្តិវិធី សិទ្ធិជួបជុំ សិទ្ធិផ្នែកវិជ្ជាជីវៈការចូលរួមកិច្ចការពារបរិស្ថាន និងធនធានធម្មជាតិ ព្រមទាំងការសម្រេចចិត្តក្នុងការចូលរួមការបោះឆ្នោតដោយពុំមានការបង្ខិតបង្ខំគ្រប់ទម្រង់។
គោលបំណងចុងក្រោយ លោកបញ្ជាក់ថា៖«ដើម្បីផ្តល់លម្ហសេរីភាព និងលើកទឹកចិត្តដល់យុវជន ក្នុងការចូលរួមសកម្មភាពស្ម័គ្រចិត្ត ជួយកិច្ចការសហគមន៍មូលដ្ឋាន សិទ្ធិសេរីភាពបញ្ចេញមតិ ការបង្កើតក្រុម ឬក្លិបដើម្បីចូលរួមកិច្ចការងារសង្គម បើកចំហឱ្យមានការពិភាក្សា និងការជជែកដេញដោលពីបញ្ហានយោបាយសង្គម ដែលជាផ្នែកមួយយ៉ាងសំខាន់ក្នុងការពង្រីកវិសាលភាព ការចូលរួមរបស់ពលរដ្ឋក្នុងកិច្ចការសង្គមឱ្យកាន់តែសកម្មលើគ្រប់វិស័យ»។
លោកអូត ឡាទីន ឱ្យដឹងដែរថា នៅថ្ងៃទី៧ ធ្នូនេះ ក្រុមយុវជនបានធ្វើធ្វើដំណើរមកដល់ព្រំប្រទល់ឃុំប្រឡាយ ស្រុកស្ទោង ខេត្តកំពង់ធំហើយ។ ក្រុមយុវជននឹងធ្វើដំណើរឱ្យដល់ភ្នំពេញ ឱ្យបានមុនថ្ងៃទី១០ ធ្នូ ដើម្បីជួបជុំគ្នានៅទីលានប្រជាធិបតេយ្យ។
លោកបញ្ជាក់ថា៖«តាមផែនការ កម្មវិធីនេះ យើងជិះចេញ[ពីមុខ]ប្រាសាទអង្គរវត្ត ខេត្តសៀមរាប ឆ្ពោះមកកាន់ទីលានប្រជាធិបតេយ្យ រាជធានីភ្នំពេញ ដើម្បីប្រារព្ធទិវាសិទ្ធិមនុស្សអន្តរជាតិ ខួបទី៧៤ ជាមួយអង្គការដៃគូពាក់ព័ន្ធផ្សេងៗទៀត។ ដំណើរការជិះកង់១ថ្ងៃកន្លះមកនេះ មិនមានការរារាំងពីអាជ្ញាធរនោះទេ តែមានការមកសួរនាំ និងថតរូបភាព តាមមូលដ្ឋានដែលក្រុមយុវជនយើងបានធ្វើដំណើរទៅដល់»។
លោកជិន ម៉ាលីន អ្នកនាំពាក្យក្រសួងយុត្តិធម៌ និយាយថា ក្រុមយុវជន គឺអាចជួបជុំគ្នា ដើម្បីរៀបចំយុទ្ធនាការនេះ។ ប៉ុន្តែដើម្បីអនុវត្តសិទ្ធិឱ្យកាន់តែពេញលេញ លោកជំរុញឱ្យក្រុមយុវជនទាំងនេះ គួរធ្វើការជូនដំណឹងទៅអាជ្ញាធរពាក់ព័ន្ធ ឱ្យស្របតាមច្បាប់កម្ពុជា។
លោកបញ្ជាក់ថា៖«ពួកគាត់គួរតែមានការសហការជាមួយអាជ្ញាធរ ដែលពាក់ព័ន្ធ ដូចជា ការជូនដំណឹង ការរៀបចំសណ្ដាប់ធ្នាប់ ចៀសវាងការធ្វើសកម្មភាពនៃការអនុវត្តសិទ្ធិនេះ ប៉ះពាល់ទៅដល់សិទ្ធិសេរីភាពរបស់អ្នកដទៃ សណ្ដាប់ធ្នាប់សង្គម ដែលការពារដោយច្បាប់»៕
