ភ្នំពេញៈមន្ត្រីរដ្ឋាភិបាលបានបដិសេធរបាយការណ៍របស់អង្គការលីកាដូអំពីការឃុំខ្លួនមិនត្រឹមត្រូវនៅមណ្ឌលព្រៃស្ពឺនិងបានស្នើឱ្យបិទមណ្ឌលនេះបន្ទាប់ពីមានមនុស្ស២នាក់ថ្មីទៀតបានស្លាប់ក្នុងមណ្ឌលនៅសីហា ឆ្នាំ២០២២ កន្លងទៅ។
តាមសេចក្តីថ្លែងការណ៍របស់អង្គការលីកាដូនៅថ្ងៃទី៧ ខែធ្នូ ឆ្នាំ២០២២ ថា មានភ័ស្តុតាងបង្ហាញថា មនុស្សជាង ១០នាក់បានស្លាប់ក្នុងចំណោមអ្នកជាប់ឃុំទាំងអស់ក្នុងមណ្ឌលនេះចន្លោះខែកក្កដានិងខែសីហាឆ្នាំ២០២២នេះ។ការស្លាប់ចុងក្រោយកើតឡើងអំឡុងពេលមានការកើនឡើងអ្នកជាប់ឃុំក្នុងមណ្ឌលឃុំខ្លួននេះលើបុរសនិងស្ត្រី២នាក់ដែលមិនត្រូវបានគេអើពើក្នុងមណ្ឌលមួយដែលមានមនុស្សជាង៤០០នាក់ គិតត្រឹមខែសីហា ឆ្នាំ២០២២។
សេចក្តីថ្លែងការណ៍បានលើកឡើងថា «អង្គការលីកាដូ បានចងក្រងឯកសារស្ដីពីការរំលោភបំពាននៅមណ្ឌលព្រៃស្ពឺ ចាប់តាំងពីមណ្ឌលនេះបានបើកដំណើរការក្នុងឆ្នាំ២០០៤ និងបានស្នើសុំជាសាធារណៈឱ្យបិទមណ្ឌលនេះវិញ តាំងពីឆ្នាំ២០០៨ មក។ នៅថ្ងៃនេះ យើងខ្ញុំ សូមធ្វើការស្នើសុំជាថ្មីម្ដងទៀត សូមឱ្យបិទមណ្ឌលព្រៃស្ពឺ និងបញ្ចប់ស្ថានភាពអាក្រក់ដែលប្រឈមដោយមនុស្សជាប់ឃុំនៅទីនោះ»។
ការស្លាប់ថ្មីៗនេះទៅលើស្ត្រីម្នាក់ និងបុរសម្នាក់ ត្រូវបានបញ្ជាក់ដោយអង្គការលីកាដូថាកើតឡើងក្រោយពីអ្នកជាប់ឃុំឈឺនៅក្នុងមណ្ឌលហើយមិនត្រូវបានផ្ដល់ការព្យាបាលឱ្យបានគ្រប់គ្រាន់។សាក្សីដែលបានឃើញការស្លាប់របស់អ្នកជាប់ឃុំទាំង២នាក់ បានរៀបរាប់ថា អ្នកជាប់ឃុំដែលមានជំងឺធ្ងន់ធ្ងរត្រូវបានទុកចោល ។
ប្រភពដដែលបានបន្តថា សាក្សីក្នុងវត្តមួយដែលទទួលខុសត្រូវក្នុងការបូជាសាកសពមកពីមណ្ឌលព្រៃស្ពឺបានបញ្ជាក់ពីការកើនឡើងនៃចំនួនសាកសពដែលមណ្ឌលព្រៃស្ពឺបញ្ជូនឱ្យបូជាកាលពីអំឡុងខែសីហា ឆ្នាំ២០២២។
បើតាមអង្គការលីកាដូ មានការស្លាប់អ្នកជាប់ឃុំជាង១០នាក់ នៅចន្លោះខែកក្កដា និងខែសីហា ឆ្នាំ២០២២ ប៉ុន្តែការរឹតត្បិតក្នុងការចូលទៅកាន់មណ្ឌលធ្វើឱ្យមានភាពលំបាកដើម្បីបញ្ជាក់ពីការរាយការណ៍ទាំងនេះ ។
នាយិកាទទួលបន្ទុកកិច្ចការក្រៅតំបន់នៃអង្គការលីកាដូ អ្នកនាង ណាលី ពីឡូក បានថ្លែងថា ការស្លាប់របស់មនុស្ស២នាក់នេះជាបញ្ហាបន្ថែមលើការរំលោភបំពាន ការធ្វើទារុណកម្ម និងការបាត់បង់ជីវិតដែលមិនគួរកើតមាន អស់រយៈពេលជិត២ទសវត្សរ៍មកនេះ នៅក្នុងមណ្ឌលព្រៃស្ពឺ។
អ្នកនាងបានបន្ថែមថា៖«ជារៀងរាល់ថ្ងៃមណ្ឌលព្រៃស្ពឺនៅតែបើកដំណើរការបង្កឱ្យមានការរំលោភបំពានបន្ថែមទៀត និងហានិភ័យនៃការស្លាប់ជាច្រើនទៀត។ រាជរដ្ឋាភិបាល គួរតែបិទមណ្ឌលនេះតែម្ដង ហើយបញ្ចប់ភាពរងគ្រោះយ៉ាងអាក្រក់ដែលមិនគួរកើតមាននេះ»។
ទោះជាយ៉ាងណា លោកស្រីមុំ ចាន់ដានី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ បានបដិសេធទាំងស្រុងនូវខ្លឹមសារនៃសេចក្តីថ្លែងការណ៍របស់អង្គការមួយនេះ។
លោកស្រីបានប្រាប់នៅល្ងាចថ្ងៃទី៧ ខែធ្នូថា ការចោទប្រកាន់ថាមានការមើលថែមិនដិតដល់និងទុកមនុស្សចោលដល់ស្លាប់នោះ ខាងអង្គការលីកាដូ មិនមានភ័ស្តុតាងនិងហេតុផលច្បាស់លាស់នោះឡើយ។
លោកស្រី មុំ ចាន់ដានី បានថ្លែងថា៖«គាត់[លីកាដូ]ចោទប្រកាន់នោះសួរថាគាត់យកអីមកអះអាង សូមជម្រាបថា សិទ្ធិមានដូចគ្នា ខ្ញុំក៏មានសិទ្ធិ គាត់ក៏មានសិទ្ធិដែរ តែឱ្យគាត់ប្រើសិទ្ធិគោរពគេកុំចេះតែលើកឡើងគ្មានមូលដ្ឋាន»។
លោកស្រីបានបន្តថា៖«មានការអ្វីខ្ញុំជម្រាបជូនគាត់[លីកាដូ] ថ្ងៃមុនរួចហើយថាដាក់ឯកសារមក។ គេអ្នកធ្វើការ គេមានការហត់នឿយក្នុងការបម្រើប្រជាពលរដ្ឋដូចគ្នាសួរថាបាក់ទឹកចិត្តអត់ចំពោះអ្នកខំប្រឹងធ្វើការមើលថែបងប្អូននេះ បើមិនបានលើកទឹកចិត្តគេ សូមកុំវាយប្រហារបំបាក់ទឹកចិត្តគេ»។
ជាការឆ្លើយតបលោកអំ សំអាត នាយកទទួលបន្ទុកកិច្ចការទូទៅនៃអង្គការលីកាដូបានអះអាងថា សេចក្តីថ្លែងការណ៍ដែលស្នើសុំបិទមណ្ឌលសង្គមកិច្ចព្រៃស្ពឺនេះ អង្គការលីកាដូធ្វើឡើងដោយត្រឹមត្រូវតាមបទដ្ឋានដោយមានការស្រាវជ្រាវ ភ័ស្តុតាង និងសាក្សីច្បាស់លាស់ ។
លោកបានថ្លែងថា ៖«យើងមើលឃើញពីការរំលោភបំពាន ការធ្វើទុក្ខបុកម្នេញនៅតែបន្ត ហើយចុងក្រោយនេះមានករណីស្លាប់ និងឃុំមនុស្សដោយមិនត្រឹមត្រូវតាមច្បាប់ ហើយយើងមើលឃើញមណ្ឌលហ្នឹង[ព្រៃស្ពឺ] ហាក់គ្មានការកែប្រែ ។
ពាក់ព័ន្ធនឹងបញ្ហានេះដែរ លោកមាស នី អ្នកស្រាវជ្រាវការអភិវឌ្ឍន៍សង្គមបានថ្លែងថា រដ្ឋាភិបាលនិងអាជ្ញាធរពាក់ព័ន្ធគួរចាត់វិធានការស៊ើបអង្កេតជុំវិញករណីដែលអង្គការលីកាដូបានផ្តល់សក្ខីកម្មនេះដើម្បីស្វែងរកការពិត ។
លោកថាបើសិនជាករណីរាយការណ៍ថាទុកជនឃុំខ្លួនឱ្យស្លាប់នេះជាការពិតនោះនឹងជះឥទ្ធិពលអាក្រក់ដល់មុខមាត់រដ្ឋាភិបាលខ្លួនឯង។ការប្រមូលជនអនាថា អ្នកសុំទាន ជនគ្មានទីពឹងទៅរស់នៅម្តុំដោយទទួលសេវាថែទាំ និងការបណ្តុះបណ្តាលវាជារឿងល្អមួយ ប៉ុន្ដែបើគ្មានការមើលថែទាំត្រឹមត្រូវវិញ វាមិនមែនជារឿងល្អឡើយ ។
លោកថា៖«ពេលខ្លះខ្ញុំមានការព្រួយបារម្ភដែរចំពោះវិធានការរបស់រដ្ឋាភិបាលដើម្បីបំបាត់អ្នកក្រគឺយកអ្នកក្រចេញពីទីក្រុងឱ្យអស់ទៅនោះលែងមានអ្នកក្រហើយសម្រាប់រដ្ឋាភិបាល»។
អ្នកស្រាវជ្រាវការអភិវឌ្ឍន៍សង្គមរូបនេះចង់ឱ្យរដ្ឋាភិបាលអន្តរាគមន៍បើកការស៊ើបអង្កេតជុំវិញករណីនេះ ហើយស្នើឱ្យរដ្ឋាភិបាលគិតគូរយន្តការប្រមូលអ្នកសុំទាន ជនអនាថា ជនអត់ទីពឹងនេះ ទៅកាន់ទីកន្លែងមួយដែលមានផាសុកភាព ទទួលបានការមើលថែទាំ និងទទួលបានការអប់រំបណ្តុះបណ្តាលនានា៕