លោក សាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋាន (GDP)។ ហុង មិនា
ភ្នំពេញៈ បន្ទាប់ពីមានការចាកចេញរបស់សមាជិកស្នូល ២ រូប ពីគណបក្សប្រជាធិបតេយ្យមូលដ្ឋាន (GDP) គឺលោកយ៉ង សាំងកុមារ ជាប្រធានគណៈកម្មាធិការនាយកគណបក្ស និងជាសហស្ថាបនិកសំខាន់របស់បក្ស ព្រមទាំងលោក ឡឹក សុធារ អ្នកនាំពាក្យគណបក្សទៅចូលរួមគណបក្សប្រជាជនកម្ពុជា ក្រោមហេតុផលចូលជួយរដ្ឋាភិបាល លើវិស័យកសិកម្មក្នុងស្រុក បក្ស GDP ត្រូវបានមតិសាធារណៈ និងអ្នកតាមដានស្ថានការណ៍នយោបាយ មើលឃើញពីជោគវាសនាអាក្រក់របស់បក្សនេះអាចប្រឈមនឹងការរលំរំលាយ។
ជុំវិញរឿងនេះ លោកសាម អ៊ីន អគ្គលេខាធិការគណបក្សប្រជាធិបតេយ្យមូលដ្ឋាន បានផ្តល់បទសម្ភាសន៍ពាក់ព័ន្ធនឹងដំណើរការបន្តរបស់គណបក្ស ព្រមទាំងគោលជំហរបក្សបន្តក្នុងសង្វៀននយោបាយកម្ពុជា ខណៈគណបក្ស នេះមានអាយុកាលប្រមាណ ៧ ឆ្នាំ។ បន្ទាប់ពីការចាកចេញនៃបុគ្គលសំខាន់ក្នុងបក្សទៅចូលរួមជាមួយ បក្សកាន់អំណាច GDP រងការទិតៀនមួយចំនួនជុំវិញការចាកចេញនេះ។
បន្ទាប់ពីការចាកចេញរបស់លោកយ៉ង សាំងកុមារ និងលោកឡឹក សុធារ តើផ្ទៃក្នុងបក្សបានរៀបចំសេណារីយោដូចម្តេចដែរ?
យើងបានបញ្ជាក់រួចហើយថា ការចាកចេញរបស់លោកបណ្ឌិតយ៉ង សាំងកុមារ និងលោកឡឹក សុធារ នេះ គឺមានការផ្តល់ព័ត៌មាន ជាមុន ដោយមានការពិគ្រោះយោបល់ជាមួយនឹងថ្នាក់ដឹកនាំគណបក្សប្រជាធិបតេយ្យមូលដ្ឋាន ជាពិសេសជាមួយលោកប្រធានយ៉េង វីរៈ អ្នកគ្រូ ប្រុប វន្នី ជាមួយខ្លួនខ្ញុំផ្ទាល់។
បន្ទាប់ពីការចាកចេញនេះ យើងមានវិធានការដើម្បីជ្រើសតាំងសមាសភាពជំនួសលោកទាំង ២ ដែលយើងនឹងប្រើយន្តការផ្ទៃក្នុងបក្សរបស់យើងក្នុងការជ្រើសរើសមនុស្សជំនួសផ្ទៃក្នុងបក្សដែលយើងមានលក្ខន្តិកៈ និងយន្តការបក្សផ្ទាល់ក្នុងពេលឆាប់ៗនេះ ដោយមិនលើសពី ២ សប្តាហ៍ទៀតនោះទេ។ យើងប្រើយន្តការប្រជាធិបតេយ្យ ក្នុងនោះមានការប្រជុំគណៈកម្មការប្រតិបត្តិ និងគណៈកម្មាធិការនាយកជាដើម ក្នុងការជ្រើសរើសប្រធានគណៈកម្មាធិការនាយក និងអគ្គលេខាធិការរង។
បន្ទាប់ពីការចាកចេញរបស់សហស្ថាបនិកសំខាន់ តើគណបក្ស អាចនឹងមានការផ្លាស់ប្តូរ លក្ខន្តិកៈ និងរចនាសម្ព័ន្ធផ្ទៃក្នុងបក្ស ឬទេ?
គណបក្សប្រជាធិបតេយ្យមូលដ្ឋាន នឹងពុំមានការផ្លាស់ប្តូរលក្ខន្តិកៈ ណាមួយឡើយ ព្រមទាំងរចនាសម្ព័ន្ធ ផ្ទៃក្នុងបក្សជាដើម ដោយយើងនៅ រក្សាការប្រើប្រាស់យន្តការ ដែលគណបក្សបានកំណត់ក្នុងសុពលភាពរួចទៅហើយនោះដដែល ដោយ គ្រាន់តែជ្រើសរើសមនុស្សថ្មីមកជំនួសអ្នកចាកចេញប៉ុណ្ណោះ។
មានការលើកឡើងពីសាធារណមតិ និងអ្នកវិភាគនយោបាយថា គណបក្សប្រជាធិបតេយ្យមូលដ្ឋាន អាចមានជោគវាសនាអាក្រក់អស្ថិរភាពបក្ស បន្ទាប់ពីការចាកចេញរបស់លោកយ៉ង សាំងកុមារ តើលោកមានអ្វីជាការឆ្លើយតបទេ?
ជាធម្មតា អ្នកវិភាគ ពួកគាត់តែង នៅឈរតាមទីតាំងរបស់ពួកគាត់ ដោយធ្វើការប៉ាន់ប្រមាណផ្ទាល់ខ្លួន ដោយពួកគាត់មិនបានយល់ដឹងស៊ីជម្រៅអំពីស្ថានការណ៍ជាក់ស្តែង របស់ផ្ទៃក្នុងបក្សប្រជាធិបតេយ្យមូលដ្ឋាននោះទេ។ ពួកគាត់មានសិទ្ធិវិភាគ បញ្ចេញយោបល់ ប៉ុន្តែគណបក្សប្រជាធិបតេយ្យមូលដ្ឋាន យើងមានយន្តការផ្ទៃក្នុងរបស់យើងក្នុងការដោះស្រាយបញ្ហានេះ ហើយយើងនឹងចាត់វិធានការឆាប់ៗ ដោយរើសយកមនុស្ស ដែលមានសមត្ថភាពមកជំនួសលោកបណ្ឌិត យ៉ង សាំងកុមារ ដើម្បីបន្តដំណើររបស់បក្សយើងជាបន្តទៀត។ ដូច្នេះ សូមអំពាវនាវដល់អ្នកវិភាគធ្វើការ តាមដានជាបន្តទៀត ព្រមទាំងទទួលព័ត៌មានឱ្យគ្រប់ជ្រុងជ្រោយ ដើម្បីធ្វើការវិភាគឱ្យកាន់តែត្រឹមត្រូវជូនដល់មហាជន។
បន្ទាប់ពីនេះ តើគណបក្សប្រជាធិបតេយ្យមូលដ្ឋាននឹងធ្វើអ្វីជាបន្តទៀត ហើយថា តើគណបក្សនេះនឹងប្រកាន់ជំហរមោះមុតក្នុងឆាកនយោបាយខ្មែរឬយ៉ាងណា?
ខ្ញុំសូមធ្វើការបញ្ជាក់ថា តាំងពីការកកើតគណបក្សប្រជាធិបតេយ្យមូលដ្ឋាន ពីថ្ងៃទី ២ ខែសីហា ឆ្នាំ ២០១៥ រហូតមកដល់ពេលនេះ គណបក្សយើងបានជួបប្រទះ និង ប្រឈមជាមួយនឹងបញ្ហាលំបាកៗ ជាច្រើនរួចទៅហើយ។ រាប់ចាប់តាំងពីការជេរប្រមាថ ការលាបពណ៌ ការមើលស្រាល កង្វះខាតផ្នែកហិរញ្ញវត្ថុ ការចាកចេញពីសំណាក់ សមាជិកបក្សមួយចំនួន ជាពិសេស ក្នុងឆ្នាំ ២០១៦ គឺការបាត់បង់បិតាស្ថាបនិកគណបក្ស គឺលោកបណ្ឌិតកែម ឡី និងនាពេលថ្មីៗនេះទៀត ក៏មានការចាកចេញពីសហស្ថាបនិក ១ រូបទៀត គឺលោក បណ្ឌិត យ៉ង សាំងកុមារ។
យើងធ្លាប់បានឆ្លងកាត់ឧបសគ្គ ជាច្រើនជំពូកទៅហើយ ប៉ុន្តែគណបក្សយើងនឹងបន្តដំណើរទៅមុខបន្តទៀត ជាមួយភាពស្វាហាប់ និង ប្រកបដោយក្តីសង្ឃឹមដើម្បីចូលរួមចំណែកលើកស្ទួយលទ្ធិប្រជាធិបតេយ្យនៅកម្ពុជា និងដំណើរសំដៅទៅរកគោលដៅវែងឆ្ងាយរបស់យើងដើម្បីពលរដ្ឋកម្ពុជារស់នៅក្នុងជីវភាពមួយដែលថ្លៃថ្នូរ។ ប្រទេសជាតិមានអធិបតេយ្យភាព ពេញលេញ ហើយយើងនៅបន្តគោរពគោលការណ៍សាមគ្គីជាតិ យុត្តិធម៌ អហិង្សាក្នុងការបន្តដំណើរ តស៊ូនយោបាយរបស់យើងបន្តទៀត ដែលសូមអំពាវនាវដល់សមាជិក អ្នកគាំទ្រយើង សាធារណជនទាំងអស់ ជ្រាបជាព័ត៌មាន។
សារចុងក្រោយ ខ្ញុំសាម អ៊ីន សូម បញ្ជាក់ថា ដើមឈើ ១ ដើម រីកលូតលាស់ចាក់ឫសរឹងមាំ តែងតែជួបប្រទះព្យុះភ្លៀងជាច្រើនដែលនេះជា រឿងធម្មតាក្នុងច្បាប់ធម្មជាតិ៕
.jpg)
