ភ្នំពេញៈ យុវជនប្រមាណ ២០០ នាក់ ចូលរួមទិវាប្រយុទ្ធប្រឆាំងអំពើពុករលួយឆ្នាំ ២០២២ ក្រោមមូលបទរួមគ្នាប្រយុទ្ធប្រឆាំងអំពើពុករលួយដើម្បីរួមគ្នាពិភាក្សាស៊ីជម្រៅអំពីបញ្ហាអំពើពុករលួយ និងរួមគ្នាស្វែងរកដំណោះស្រាយ ខណៈសង្គមស៊ីវិលថា ការចូលរួមរបស់យុវជនគឺជាកត្តារួមចំណែកកាត់បន្ថយអំពើពុករលួយនៅក្នុងប្រទេស។
នៅថ្ងៃទី៨ ខែធ្នូ ឆ្នាំ ២០២២ អង្គការតម្លាភាពកម្ពុជា សហការជាមួយបណ្តាអង្គការសង្គមស៊ីវិលចំនួន ៧ ស្ថាប័ន បានរៀបចំវេទិកា «ទិវាប្រយុទ្ធប្រឆាំងអំពើពុករលួយ ឆ្នាំ ២០២២» ដែលមានការចូលរួមពីមន្ត្រីរដ្ឋាភិបាល អង្គការសង្គមស៊ីវិល សហជីព ជាពិសេសយុវជននៅសណ្ឋាគារ ហ៊ីម៉ាវ៉ារីភ្នំពេញ។
អង្គការតម្លាភាពកម្ពុជា បានឱ្យដឹងថា វេទិកានេះ រៀបចំឡើងជាផ្នែកមួយនៃការប្រារព្ធទិវាប្រយុទ្ធប្រឆាំងអំពើពុករលួយឆ្នាំ ២០២២ ក្នុងគោលបំណងកៀរគរភាគីពាក់ព័ន្ធ និងសង្គមស៊ីវិល ដើម្បីពិភាក្សាស៊ីជម្រៅអំពីអំពើពុករលួយ ផលប៉ះពាល់ និងដំណោះស្រាយ និងអបអរសាទរទិវាប្រឆាំងអំពើពុករលួយអន្តរជាតិ។
អង្គការតម្លាភាពកម្ពុជា បានបញ្ជាក់ថា៖ «នៅថ្ងៃទី ៣១ ខែតុលា ឆ្នាំ ២០០៣ មហាសន្និបាត នៃអង្គការសហប្រជាជាតិ បានអនុម័តអនុសញ្ញាប្រឆាំងនឹងអំពើពុករលួយ។ មហាសន្និបាតក៏បានកំណត់យកថ្ងៃទី ៩ ខែធ្នូ ជាទិវាប្រឆាំងអំពើពុករលួយអន្តរជាតិ ដើម្បីលើកកម្ពស់ការយល់ដឹង និងតួនាទីនៃអនុសញ្ញាក្នុងការប្រយុទ្ធប្រឆាំង និងទប់ស្កាត់អំពីអំពើពុករលួយ»។
លោក រ៉ូ វណ្ណៈ តំណាងអង្គការតម្លាភាពកម្ពុជា និងជាក្រុមការងារប្រឆាំងអំពើពុករលួយ បាននិយាយថា អំពើពុករលួយ គឺជាការរំលោភអំណាចដែលប្រគល់ឱ្យដើម្បីផលប្រយោជន៍ផ្ទាល់ខ្លួន ដែលបានបំផ្លាញការជឿទុកចិត្តរបស់ពលរដ្ឋ និងធ្វើឱ្យលទ្ធិប្រជាធិបតេយ្យធ្លាក់ចុះខ្សោយ ព្រមទាំងបង្កើតឱ្យមានភាពក្រីក្រផងដែរ។
អំពើពុករលួយ ក៏បានធ្វើឱ្យអស់ជំនឿជឿទុកចិត្តមកលើការដឹកនាំរបស់រដ្ឋាភិបាលពីសំណាក់មហាជន ដែលទាមទារឱ្យមានរួមគ្នាដើម្បីប្រយុទ្ធប្រឆាំងនឹងអំពើពុករលួយ ហើយភាគីពាក់ព័ន្ធ ជាពិសេសយុវជន គឺសុទ្ធតែជាផ្នែកសំខាន់ដើម្បីចូលរួមលុបបំបាត់អំពើពុករលួយនៅក្នុងប្រទេសកម្ពុជា។
លោកថា៖ «សេរីភាពនៃការរាយការណ៍ពីអំពើពុករលួយ ជាកត្តាចម្បងនៃការកាត់បន្ថយអំពើពុករលួយ ហើយអំពើពុករលួយគឺជាឧបសគ្គចម្បងចំពោះការអភិវឌ្ឍប្រទេស។ ខ្ញុំរំពឹងថា ធាតុចូលពីអ្នកពាក់ព័ន្ធ ជាកត្តាចម្បងជំរុញការយល់ដឹង និងចូលរួមចំណែកទប់ស្កាត់អំពើពុករលួយ»។
អង្គភាពប្រឆាំងអំពើពុករលួយ (ACU) នៅថ្ងៃទី ៨ ខែធ្នូ នេះ ក៏បានរៀបចំពិធីអបអរសាទរ ទិវាជាតិ អន្តរជាតិ ប្រឆាំងអំពើពុករលួយ ៩ ធ្នូ នៅក្នុងសាកលវិទ្យាល័យភូមិន្ទភ្នំពេញ ដែលមានសិស្សានុសិស្សរាប់រយនាក់ចូលរួមផងដែរ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែងថា៖ «ការគោរពនីតិរដ្ឋ គឺជាការរួមចំណែកប្រឆាំងអំពើពុករលួយនៅកម្ពុជា»។
កញ្ញា ឡាយ ហ្គួចស៊ាន ជាយុវនារីមកពីខេត្តកំពត បាននិយាយថា ការយល់ដឹងកាន់តែច្បាស់អំពីអំពើពុករលួយ គឺនាំឱ្យការប្រយុទ្ធប្រឆាំងអំពើពុករលួយ កាន់តែមានប្រសិទ្ធភាព ហើយការជជែកគ្នាក្នុងពេលនេះ គឺបានផ្តល់ឱកាសដល់យុវជនកាន់តែច្រើន បានយល់ដឹង និងចូលរួមនៅក្នុងការប្រយុទ្ធប្រឆាំងអំពើពុករលួយ។
កញ្ញា ថ្លែងថា៖ «ប្រទេសកម្ពុជា គឺនៅតែមានអំពើពុករលួយទៅតាមបុគ្គល និងតាមតំបន់ ដែលសម្រាប់យើងជាយុវជន គួរតែចូលរួមក្នុងការទប់ស្កាត់អំពើពុករលួយ ដើម្បីឱ្យប្រទេសកម្ពុជាកាន់តែមានការអភិវឌ្ឍ និងលែងមានអំពើពុករលួយ។ នៅពេលយើងឃើញអំពើពុករលួយ យើងត្រូវចូលរួមរាយការណ៍ ហើយផ្តើមចេញពីយើង មិនប្រព្រឹត្តអំពើពុករលួយ»។
ការស្រាវជ្រាវនៅឆ្នាំ ២០២១ មានយុវជន៣៣ភាគរយ បាននិយាយថា អំពើពុករលួយ គឺជាបញ្ហាធំសម្រាប់ប្រទេសជាតិ៕