The Phnom Penh Post Search

Search form

Logo of Phnom Penh Post newspaper Phnom Penh Post - លោក តុ​ន ច័ន្ទ​រិ​ទ្ធិ​៖ ការប្រឡង​ធ្លាក់ មិនមែន​ស្នាដៃ​យើង​អន់​ទេ គ្រាន់តែ​យើង​ស្វែងរក​អ្វីដែល​គេ​ចង់បាន​មិនទាន់​ឃើញ​

លោក តុ​ន ច័ន្ទ​រិ​ទ្ធិ​៖ ការប្រឡង​ធ្លាក់ មិនមែន​ស្នាដៃ​យើង​អន់​ទេ គ្រាន់តែ​យើង​ស្វែងរក​អ្វីដែល​គេ​ចង់បាន​មិនទាន់​ឃើញ​

Content image - Phnom Penh Post
រូបភាព តុន ច័ន្ទរិទ្ធិ

លោក តុ​ន ច័ន្ទ​រិ​ទ្ធិ​៖ ការប្រឡង​ធ្លាក់ មិនមែន​ស្នាដៃ​យើង​អន់​ទេ គ្រាន់តែ​យើង​ស្វែងរក​អ្វីដែល​គេ​ចង់បាន​មិនទាន់​ឃើញ​

ជា​កូន​ទី​២ ក្នុង​គ្រួសារ​ដែលមាន​បងប្អូន​២​នាក់ លោក តុ​ន ច័ន្ទ​រិ​ទ្ធិ កើត​នៅ​ភូមិ​ព្រៃ​ព្រាល ឃុំ​ព្រៃ​ស្វាយ ស្រុក​មោងឫស្សី ខេត្តបាត់ដំបង​។ លោកឪពុក​ឈ្មោះ ទុំ សុផល (​ស្លាប់​) និង​ម្ដាយ​ឈ្មោះ ហង្ស សា​មាន មានមុខរ​បរជាកសិក​រ​និង​អាជីវករ​។ កាលពី​បឋមសិក្សា កុមារ តុ​ន ច័ន្ទ​រិ​ទ្ធិ រៀន​នៅ​សាលាបឋមសិក្សា​ព្រៃ​ស្វាយ ហើយ​លោក​បាន​បន្ត​រៀន​អនុវិទ្យាល័យ​និង​វិទ្យាល័យ​នៅ​សាលា​វិទ្យាល័យ​មោងឫស្សី ក្នុងស្រុក​កំណើត​របស់​លោក​។ ដោយ​សេចក្ដីស្រឡាញ់​និង​ជាប់ចិត្ត​លើ​អក្សរសាស្ត្រ​ខ្មែរ ក្រោយ​ប្រឡង​បាក់​ឌុប​ចប់ លោក​បាន​បន្ត​ថ្នាក់​ឧ​ត្ត​ម​សិក្សា​បរិ​ញ្ញា​អក្សរសាស្ត្រ​ខ្មែរ​ក្នុង​រាជធានី​ភ្នំពេញ និង​បានបញ្ចប់​ដោយ​ជោគជ័យ​។​

​ជុំវិញ​វិស័យ​តែង​និពន្ធ​លោក​បានឱ្យដឹងថា​៖ «​ខ្ញុំ​ធ្លាប់ជា​ម្ចាស់​ជយលាភី​លេខ ២​ល្ខោន​វិទ្យុ រឿង​ខ្ញុំ​ខុស​អី ក្នុង ២០២០​។ ជា​ម្ចាស់​ជយលាភី​លេខ ២​ប្រកួត​សំណេរ និង​និយាយ​សាធារណៈ​ប្រធានបទ ហាមឃាត់ និង​ដំឡើង​ពន្ធ​ថ្នាំជក់ នៅ​ឆ្នាំ​២០២១​។ ជា​ម្ចាស់​ជយលាភី​លេខ​១ ពានរង្វាន់​ពុទ្ធសាសនបណ្ឌិត្យ​ឆ្នាំ​២០២២ រឿង​សង្គម​នេះ​។ ជា​ម្ចាស់​ជយលាភី​លេខ​១ ពានរង្វាន់​ប្រកួត​សំណេរ និង​និយាយ​សាធារណៈ ក្រសួង​អប់រំ​ប្រធានបទ ហាមឃាត់​គ្រឿង​ស្រវឹង​។ ជា​ម្ចាស់​ជយលាភី​លេខ​៤ ពានរង្វាន់​ឥន្ទ្រ​ទេវី​ឆ្នាំ​២០២២ ប្រលោមលោក​ខ្លី រឿង​បាសាក់​»​។​

​ជយលាភី​ដែល​ទទួលបាន​នេះ​មិនមែន​កើតឡើង​ដោយ​ភាព​ចៃដន្យ​នោះទេ ជាការ​កើតចេញពី​សេចក្ដី​ព្យាយាម និង​ប្រឹងប្រែង​មិន​ចុះចាញ់​រាល់​ភាពលំបាក ក៏ដូចជា​បញ្ហា​ស្មុគស្មាញ​នានា​។ លោក​បានបញ្ជាក់​ថែមថា​៖ «​ដើម្បី​ទទួលបាន​ពានរង្វាន់​ទី​១ មិន​បោះបង់ ពីព្រោះ​ខ្ញុំ​ដាក់​ប្រកួត​មិនមែន​ម្តង​ឡើយ គឺ​ពីរ​បី​ដង​ហើយ​ទើប​សម្រេច​។ ទី​២ សិក្សា​ពី​កម្មវិធី តើ​គេ​ចង់បាន​អ្វី​ពិតប្រាកដ​? និង​ទី​៣ ព្យាយាម​ធ្វើឱ្យ​ល្អ​បំផុត​ជាមួយ​សាច់រឿង​ទាំង​អត្ថន័យ អត្ថរូប អត្ថរស​»​។​

​លោក​បាន​បញ្ជាក់បន្ថែម​យ៉ាងនេះ​ថា​៖ «​បើ​ចង់បាន​ពានរង្វាន់​ត្រូវតែ​មិន​បោះបង់ ព្យាយាម​អភិវឌ្ឍ​សមត្ថភាព និង​ព្យាយាម​ធ្វើឱ្យ​ល្អ​អស់ពី​ចិត្ត ពីព្រោះ​គ្រប់​ស្នាដៃ​ដែល​គេ​ដាក់​សុទ្ធ​តែមាន​អ្វីដែល​ពិសេស​។ តែបើ​ធ្លាក់​ក៏​កុំ​អន់ចិត្ត មិនមែន​ស្នាដៃ​យើង​អន់​នោះទេ តែ​គ្រាន់តែ​ស្វែងរក​អ្វីដែល​កម្មវិធី​ចង់បាន​មិនទាន់​ឃើញ ត្រូវ​ស្វែងយល់​និង​រៀន​ពី​កម្មវិធី​មួយៗ​ឱ្យ​ច្បាស់​»​។​

​រឿង «​បាសាក់​» ដែលជា​ស្នាដៃ​លោក តុ​ន ច័ន្ទ​រិ​ទ្ធិ ដាក់​ប្រកួតប្រជែង​ក្នុង​ឆ្នាំ​២០២២ ថ្មីៗ​នេះ ជា​រឿង​ដែល​និយាយ​ពី​ដំណើរ​ជីវិត​របស់​កូន​ខ្មែរក្រោម​មួយរូប​ដែល​មនសិការ រស់នៅ​ដោយ​ប្រកាន់​ភាពត្រឹមត្រូវ និង​សច្ចធម៌​។ គាត់​បាន​ប្រើ​វិជ្ជាជីវៈ​គាត់​ជា​អ្នកព័ត៌មាន​គាត់​ផ្សព្វផ្សាយ​ពី​វប្បធម៌​ជាតិ ដោយ​ឆ្លុះបញ្ចាំង​ថា​វប្បធម៌​រស់ គឺ​ត្រូវតែមាន​អភិរក្ស អភិវឌ្ឍន៍ និង​ផ្សាយ​បន្ត​។
​ទាក់ទិន​នឹង​ការប្រឡងប្រជែង​យក​ពានរង្វាន់​អក្សរសិល្ប៍​ក្នុង​ឆ្នាំ​២០២៣ ខាងមុខនេះ លោក​បានឱ្យដឹង​ដែរ​ថា «​ខ្ញុំ​អត់​ទាន់​ច្បាស់​ទេ​! តែ​នៅតែ​មានចិត្ត​ចង់​ចូលរួម តែ​ក៏​ចង់​អភិវឌ្ឍ​ស្នាដៃ​ខ្លួនឯង​ឱ្យ​កាន់តែ​ល្អប្រសើរ​ដែរ​មុន​នឹងដាក់​»​។

​សូមបញ្ជាក់ថា ក្រៅពី​ស្នាដៃ​ដែល​ដាក់​ប្រឡង​ប្រកួតប្រជែង លោក តុ​ន ច័ន្ទ​រិ​ទ្ធិ មាន​ស្នាដៃ​បោះពុម្ព​ជា​សៀវភៅ​សម្រាប់​អ្នកអាន​ទូទៅ​ផងដែរ​។ ស្នាដៃ​ជា​សៀវភៅ​ទាំងនោះ​រួមមាន​៖ ទី​១- «​អ្នក​ពិតជា​ពិសេស តោះ​ទៅមុខទៀត​» និយាយ​អំពី​តម្លៃ​នៃ​ជិវិត និង​ការដើរទៅ​រកក្តី​ស្រមៃ​។ ទី​២- «​និទាន​ម៉ែ​» អត្ថន័យ​សំខាន់​បង្រៀន​អំពី​ដំណើរ​ជីវិត​តាំងពី​កើត​រហូតដល់​ស្លាប់ ក្នុងនោះ​មាន​បង្ហាញ​ទាក់ទង​នឹង​ទំនាក់ទំនង ស្នេហា ការងារ ប្រទេសជាតិ​ជាដើម​៕

អត្ថបទគួរចាប់អារម្មណ៍