.jpg)
លោកនាយករដ្ឋមន្រ្តី ហ៊ុន សែន នាឱកាសអញ្ជើញជាអធិបតីបើកមហាសន្និបាត លើកទី១៦ របស់ក្លិបឆ្នេរសមុទ្រដែលស្អាតបំផុតលើសកលលោក ដែលបានប្រារព្ធឡើងនៅខេត្តព្រះសីហនុ នៅថ្ងៃទី១០ ខែធ្នូនេះ។ SPM
លោកនាយករដ្ឋមន្រ្តី ហ៊ុន សែន បង្ហាញសុទិដ្ឋិនិយមថា សមាជិកភាពរបស់ក្លិបឆ្នេរសមុទ្រដែលស្អាតបំផុតលើសកលលោកនេះ នឹងបន្តផ្តល់ប្រយោជន៍ជាច្រើនដល់កម្ពុជា ទាំងប្រយោជន៍សេដ្ឋកិច្ច និងការផ្លាស់ប្តូរបទពិសោធន៍ល្អៗរវាងគ្នាទៅវិញទៅមកក្នុងការអភិវឌ្ឍ និង អភិរក្សតំបន់ឆ្នេរសមុទ្រលើ។
នាឱកាសអញ្ជើញជាអធិបតីបើកមហាសន្និបាត លើកទី១៦ របស់ក្លិបឆ្នេរសមុទ្រដែលស្អាតបំផុតលើសកលលោក ដែលបានប្រារព្ធឡើងនៅខេត្តព្រះសីហនុ នៅថ្ងៃទី១០ ខែធ្នូនេះ លោកនាយករដ្ឋមន្រ្តី ហ៊ុន សែន បានលើកឡើងថា ការចូលជាសមាជិកក្លិបនេះ ពិតជាបានស្ដែងឱ្យឃើញពីរបត់ថ្មីនៃការប្រែប្រួល មុខមាត់ជាបន្តបន្ទាប់របស់តំបន់សមុទ្រកម្ពុជា ទាំងលើទិដ្ឋភាពសង្គម សេដ្ឋកិច្ច ទេសចរណ៍ នគរូបនីយកម្ម និងបរិស្ថាន ដែលជាកត្តាកំណត់លើការទទួលស្គាល់ជាអន្តរជាតិនៃឆ្នេរសមុទ្រកម្ពុជា។
លោកថ្លែងថា៖ «កិច្ចការនេះ បានធ្វើឱ្យតំបន់ឆ្នេរកម្ពុជាអាចដើរតួនាទីយ៉ាងសំខាន់ ក្នុងការទាក់ទាញវិនិយោគសម្រាប់ជំរុញកំណើនសេដ្ឋកិច្ចជាតិ និងត្រូវបានចាត់ទុកថា ជាគោលដៅទេសចរណ៍ធម្មជាតិ ដ៏មានភាពទាក់ទាញ និងប្រកបដោយភាពប្រកួតប្រជែងខ្ពស់នៅកម្ពុជា និងក្នុងតំបន់ ព្រមទាំងជាគោលដៅទេសចរណ៍ដ៏ធំ បន្ទាប់ពីតំបន់បេតិកភណ្ឌវប្បធម៌ប្រវត្តិសាស្ត្រ សៀមរាប-អង្គរ និង រាជធានីភ្នំពេញ»។
លោកបានបន្តថា ឈរលើកត្តាអំណោយផលទាំងអស់នេះ និងក្រោមចក្ខុវិស័យហ្មត់ចត់ វែងឆ្ងាយ ទូលំទូលាយ និងគ្រប់ជ្រុងជ្រោយ កម្ពុជាបានផ្ដល់អាទិភាពខ្ពស់ដល់ការអភិវឌ្ឍតំបន់ឆ្នេរសមុទ្រដែលត្រូវបានចាត់ទុកជាប៉ូលសេដ្ឋកិច្ចទី ២ របស់ប្រទេស ជាពិសេស ខេត្តព្រះសីហនុ ដែលត្រូវបានរាជរដ្ឋាភិបាលកំណត់គោលដៅអភិវឌ្ឍ «ជាតំបន់សេដ្ឋកិច្ចពិសេសពហុបំណង»។ ជាក់ស្ដែង រាជរដ្ឋាភិបាល បានសម្រេចកសាងបណ្តាញផ្លូវ ៣៧ខ្សែ និង ហេដ្ឋារចនាសម្ព័ន្ធផ្សេងៗ ដូចជា អាងប្រព្រឹត្តិកម្ម ទឹកកខ្វក់ និង ការអភិវឌ្ឍឆ្នេរខ្សាច់កម្សាន្តសាធារណៈ ដែលចំណាយថវិការបស់ជាតិសរុបប្រមាណជាង ៣០០ លានដុល្លារអាមេរិក និង ដែលបានសម្ពោធដាក់ឱ្យប្រើប្រាស់ជាផ្លូវការកាលពីខែធ្នូ ឆ្នាំ២០២១។
លោក ហ៊ុន សែន បានលើកឡើងថា ក្នុងនាមជាម្ចាស់ផ្ទះរៀបចំមហាសន្និបាតក្លិបលើកទី ១៦ នេះ កម្ពុជារំពឹងចែករំលែកនូវបទពិសោធ និងការអនុវត្តល្អៗរបស់ខ្លួន ទៅកាន់សមាជិកក្លិបទាំងអស់ និងពិភពលោកទាំងមូល ទាំងលើការគ្រប់គ្រង និងអភិវឌ្ឍតំបន់ឆ្នេរសមុទ្រ។
ជាមួយគ្នានេះដែរ លោក ហ៊ុន សែន បានផ្តល់អនុសាសន៍មួយចំនួន ដោយត្រូវរក្សាវត្តមានជាអចិន្ត្រៃយ៍នៃសន្តិភាព ដែលនេះជាចំណុចធំជាងគេក្នុងចំណោមចំណុចដែលទាក់ទងជាមួយការអភិវឌ្ឍនៃបណ្តាប្រជាជាតិនៅលើសកលលោក ព្រោះគ្មានទេសចរណាប្រថុយប្រថានគ្រោះថ្នាក់ ធ្វើដំណើរទៅកាន់ប្រទេសដែលមានសង្គ្រាមនោះទេ។ កម្ពុជា ប្តេជ្ញារក្សាឱ្យបាននូវសមាជិកភាពក្នុងក្លិប ហើយខេត្តតំបន់ឆ្នេរសមុទ្ររបស់កម្ពុជាទាំង ៤ ក៏ត្រូវរក្សាឱ្យបាននូវខ្សែក្រវាត់ និងកិត្តិនាមជាសមាជិកក្លិបឆ្នេរសមុទ្រដែលស្អាតបំផុតលើសកលលោក។
ស្នើឱ្យមានការរៀបចំវេទិកាជាតិតំបន់ឆ្នេរប្រចាំឆ្នាំដើម្បីជួបជុំ ពិភាក្សា និង ផ្លាស់ប្ដូរ យោបល់ជុំវិញការអភិវឌ្ឍតំបន់ឆ្នេរសមុទ្រកម្ពុជា ដោយយើងអាចកំណត់ថ្ងៃទី២៦ ខែ ឧសភា ជារៀងរាល់ឆ្នាំ ដែលជាថ្ងៃកម្ពុជាបានក្លាយជាសមាជិកក្លិប ដើម្បីរៀបចំវេទិកា ជាតិនេះ ដោយអាចឆ្លាស់វេនគ្នានៅតាមបណ្ដាខេត្តតំបន់ឆ្នេរទាំង ៤។ ស្នើឱ្យក្រសួងទេសចរណ៍ និងអាជ្ញាធរខេត្តព្រះសីហនុ ពិនិត្យលទ្ធភាពរៀបចំ សារមន្ទីរឆ្នេរ (Maison de le Baie) និងស្នើឱ្យក្រសួងទេសចរណ៍ សហការជាមួយក្លិបឆ្នេរសមុទ្រដែលស្អាតបំផុតលើ សកលលោក សិក្សារៀបចំឱ្យមាននូវស្ថាប័នអង្កេតទេសចរណ៍ សម្រាប់ឆ្នេរដើម្បីជាយន្តការស្ថាប័នមួយបន្ថែមទៀត ក្នុងការជំរុញការអភិវឌ្ឍវិស័យទេសចរណ៍តំបន់ឆ្នេរស។
លោក ហ៊ុន សែន គូសបញ្ជាក់ថា៖ «ខ្ញុំសង្ឃឹមជឿជាក់យ៉ាងមុតមាំថា តាមរយៈកិច្ចពិភាក្សានៅក្នុងមហាសន្និបាត លើកទី១៦ នេះ យើងនឹងអាចទាញយកនូវទស្សនាទានល្អៗបន្ថែមទៀតយកមកធ្វើជាមូលដ្ឋាន ក្នុងការរៀបចំបទដ្ឋានគតិយុត្តចាំបាច់នានា ដើម្បីជំរុញការគ្រប់គ្រង និង អភិវឌ្ឍតំបន់ឆ្នេរប្រកបដោយការទទួលខុសត្រូវ»៕
