The Phnom Penh Post Search

Search form

Logo of Phnom Penh Post newspaper Phnom Penh Post - តំណាង​ កយកា អះអាង​ថា វិស័យ​អាទិភាព​របស់ កយកា គឺ​វិស័យ​សុខាភិបាល​របស់​ប្រទេស​កម្ពុជា

តំណាង​ កយកា អះអាង​ថា វិស័យ​អាទិភាព​របស់ កយកា គឺ​វិស័យ​សុខាភិបាល​របស់​ប្រទេស​កម្ពុជា

Content image - Phnom Penh Post
សន្និបាត​សមាគម​គិលានុបដ្ឋាក​កម្ពុជា ឆ្នាំ ២០២២ ធ្វើ​ឡើង​នៅ​ថ្ងៃទី​៩ ខែ​ធ្នូ នៅ​សណ្ឋាគារ ភ្នំពេញ ដែល​រៀបចំ​ដោយ ទីភ្នាក់ងារ​សហប្រតិបត្តិការ​អន្តរជាតិ​កូរ៉េ (កយកា-KOICA) និង​សមាគម​គិលានុបដ្ឋាក​កម្ពុជា (CAN)។ រូបថត​កយកា

តំណាង​ កយកា អះអាង​ថា វិស័យ​អាទិភាព​របស់ កយកា គឺ​វិស័យ​សុខាភិបាល​របស់​ប្រទេស​កម្ពុជា

ភ្នំពេញៈ លោក នោ ហ្យន់ជូន (Rho Hyunjun) ប្រធាន​តំណាង​ទីភ្នាក់ងារ​សហប្រតិបត្តិការ​អន្តរជាតិ​កូរ៉េ (កយកា-KOICA) ប្រចាំ​នៅកម្ពុជា​ថ្លែង​ថា វិស័យ​អាទិភាព​របស់ កយកា-KOICA គឺ​វិស័យ​សុខាភិបាល​របស់​ប្រទេស​កម្ពុជា ពីព្រោះ​ការ​កែលម្អ​សុខភាព​ប្រជាជន​មានអាទិភាព​ខ្ពស់​ក្នុង​ប្រទេស​នេះ។

លោក នោ ហ្យន់ជូន ថ្លែង​បែបនេះ​ក្នុង​សន្និបាត​សមាគម​គិលានុបដ្ឋាក​កម្ពុជា ឆ្នាំ ២០២២ ធ្វើ​ឡើង​នៅ​ថ្ងៃទី​៩ ខែ​ធ្នូ នៅ​សណ្ឋាគារ ភ្នំពេញ ដែល​រៀបចំ​ដោយ ទីភ្នាក់ងារ​សហប្រតិបត្តិការ​អន្តរជាតិ​កូរ៉េ (កយកា-KOICA) និង​សមាគម​គិលានុបដ្ឋាក​កម្ពុជា (CAN)។

លោក នោ ហ្យន់ជូន ថ្លែងថា កយកា-KOICA បាន​និង​កំពុង​ផ្តល់​គម្រោង និង​កម្មវិធី​ជាច្រើន​ក្នុង​វិស័យ​គ្រប់គ្រង​ធនធាន​ទឹក និង​សុខភាព​សាធារណៈ ការ​អប់រំ កសិកម្ម និង​ការ​អភិវឌ្ឍ​ជនបទ និង​ការ​ដឹក​ជញ្ជូន ដែល​មាន​តម្លៃ​ប្រហែល ៣៣៦,៧ លាន​ដុល្លារ​អាមេរិក ចាប់​ពី​ឆ្នាំ ១៩៩១-២០២២។

លោក​បញ្ជាក់​ថា៖ «ក្នុង​ចំណោម​គម្រោង និង​កម្មវិធី​ទាំង​នោះ វិស័យ​អាទិភាព​របស់ កយកា-KOICA គឺ​វិស័យ​សុខាភិបាល​របស់​ប្រទេស កម្ពុជា ពីព្រោះ​ការ​កែលម្អ​សុខភាព​ប្រជាជន​មាន​អាទិភាព​ខ្ពស់​ក្នុង​ប្រទេស​កម្ពុជា»។

លោកបន្ថែមថា៖ «ក្នុង​ឆ្នាំ ២០២២ នេះ កយកា-KOICA មាន​គម្រោង​សាងសង់​អគារ​មួយទៀត​នៅ​ក្នុង​មន្ទីរពេទ្យ​កុមារជាតិ ហើយ កយកា-KOICA បាន​ពិចារណា​ថា នឹង​សាងសង់​អគារ​មួយ​បន្ថែម​ទៀត​នៅ​ក្នុង​មន្ទីរពេទ្យ​បង្អែក ដង្កោ ចាប់​ពី​ឆ្នាំ ២០២៤ តទៅ»។

ទីភ្នាក់ងារ​សហប្រតិបត្តិការ​អន្តរជាតិ​កូរ៉េ បាន​រំឭក​ថា ដើម្បី​ជា​ផ្នែកមួយ​នៃ​កិច្ច​ខិតខំ​ប្រឹងប្រែង​របស់ កយកា-KOICA ក្នុង​ការ​លើក​កម្ពស់គុណភាព និង​លទ្ធភាព​ទទួល​បាន​សេវា​ថែទាំ​សុខភាព​សាធារណៈ កយកា-KOICA បាន​សាងសង់​នូវ​អគារ​ចំនួន ៣ នៃ​មន្ទីរពេទ្យជាតិ​ចំនួន​២ គឺ អគារមិត្តភាព កម្ពុជា-កូរ៉េ នៅ​មន្ទីរពេទ្យ​កុមារជាតិ និង អគារភ្នែក និង អគារ​ត្រចៀក​ច្រមុះ បំពង់ ក នៅ​មន្ទីរពេទ្យ​ព្រះ​អង្គឌួង និង​អគារ​មន្ទីរពេទ្យ​បង្អែក ខេត្ត​ចំនួន​៣ រួមមាន មន្ទីរពេទ្យ​មាតា និង​ទារក ក្នុង​មន្ទីរពេទ្យ​ខេត្ត​សៀមរាប, មន្ទីរពេទ្យ​បង្អែក បាធាយ និង មន្ទីរពេទ្យ​មិត្តភាព កម្ពុជា-កូរ៉េ កំពង់ឆ្នាំង និង​ក៏​បាន​សាងសង់​មណ្ឌល​សុខភាព​មាតា​និង​ទារក​ចំនួន​៥ នៅ​ខេត្ត​មណ្ឌលគិរី និង​រតនគិរី ផងដែរ។

ថ្លែង​ក្នុង​ឱកាស​នោះ លោក ម៉ម ប៊ុនហេង បាន​ថ្លែង​អំណរគុណ​ចំពោះ កយកា-KOICA រដ្ឋាភិបាល និង​ប្រជាជន​នៃ​សាធារណរដ្ឋ​កូរ៉េ ដែល​បាន​ជួយ​ឧបត្ថម្ភ​ផ្នែក​បច្ចេកទេស សម្ភារ​និង​ហិរញ្ញ​វត្ថុ​សម្រាប់​វិស័យ​សុខាភិបាល​កម្ពុជា។

លោក​រដ្ឋមន្ត្រី​ក្រសួង សុខាភិបាល ថ្លែងថា គិលានុបដ្ឋាក ជា​អ្នក​ធ្វើ​ការ​ជួរមុខ និង​នៅ​ជាប់​ជាមួយ​អ្នក​ជំងឺ ចាំ​មើល​ការ​ថែទាំ អប់រំ និង​ផ្ដល់ការ​ពិគ្រោះ​យោបល់ ដូច្នេះ ត្រូវ​ទាមទារ​ទទួល​បាន​ការ​បណ្ដុះបណ្ដាល​ជា​បន្ដបន្ទាប់ ជា​ចាំបាច់ ដើម្បី​ផ្ដល់​គុណភាព​សេវា និង​សុវត្ថិភាព​ជូន​ដល់​អ្នកជំងឺ និង​អតិថិជន។

លោក​រដ្ឋមន្ដ្រី​សុខាភិបាល បាន​ស្នើឱ្យ​សមាគម​ខិតខំ​ប្រឹងប្រែង​ធ្វើ​ការងារ​រួមគ្នា​ជាក្រុម ជា​បណ្ដាញ ដោយ​រៀបចំ​ឱ្យ​មាន​ប្រព័ន្ធ​គ្រប់គ្រង​ដោយ​ប្រើប្រាស់​នូវ​បច្ចេក​វិទ្យា​ទំនើប​ដើម្បី​បំពេញ​តម្រូវ​ការ​ជូន​ប្រជាពលរដ្ឋ​បាន​កាន់តែ​ប្រសើរ។

លោកថ្លែងថា៖ «គិលានុដ្ឋាក​ត្រូវ​ទទួល​ការ​បណ្ដុះ​បណ្ដាល​ជា​បន្ដបន្ទាប់​ជា​ចាំចាច់ ព្រោះ​គិលានុដ្ឋាក​មាន​ទំនាក់ទំនង​ជាប់​ជាមួយ​អ្នក​ជំងឺ និងនៅ​ក្នុង​សហគមន៍។ លើស​ពី​នោះ ត្រូវ​មាន​សន្ដានចិត្ដ រួសរាយ​រាក់ទាក់ និង​ចាត់​ទុក​អ្នក​ជំងឺ​ដូចជា​បងប្អូន​ក្រុម​គ្រួសារ​របស់​ខ្លួន»៕

អត្ថបទគួរចាប់អារម្មណ៍