.jpg)
តំណាងស្ថាប័នរដ្ឋាភិបាលកម្ពុជា និងអង្គការសង្គមស៊ីវិល រួមទាំងសហជីព បានប្រារព្ធទិវាសិទ្ធិមនុស្ស ១០ ធ្នូ ទៅតាមមធ្យោបាយ និងទីតាំងផ្សេងៗគ្នា ដើម្បីលើកម្ពស់សេរីភាពជាមូលដ្ឋាន ដែលនឹងនាំមកនូវសុខសន្តិភាព និងការអភិវឌ្ឍប្រកបដោយចីរភាព។
ទិវាសិទ្ធិមនុស្សអន្តរជាតិ ១០ ធ្នូ គឺជាថ្ងៃរំឭកព្រឹត្តិការណ៍ប្រវត្តិសាស្ត្រ ដែលមហាសន្និបាតរបស់អង្គការសហប្រជាជាតិ (UN) បានអនុម័តសេចក្តីប្រកាសជាសកលស្តីពីសិទ្ធិមនុស្ស (Universal Declaration of Human Rights) នៅថ្ងៃទី១០ ខែធ្នូ ឆ្នាំ ១៩៤៨។ គិតត្រឹមថ្ងៃទី១០ ខែធ្នូ ឆ្នាំ ២០២២ គឺជាខួបលើកទី៧៤ នៃការប្រារព្ធទិវាសិទ្ធិមនុស្សអន្តរជាតិ។
ជាមួយគ្នានេះដែរ គណៈកម្មាធិការសិទ្ធិមនុស្សកម្ពុជា បានផលិតជាខ្សែវីដេអូ ចាក់បញ្ចាំងនៅបណ្តាញសង្គមស្តីពីសិទ្ធិមនុស្ស ដើម្បីចូលរួមអបអរទិវាសិទ្ធិមនុស្ស។ តាមរយៈវីដេអូដែលមានរយៈពេលជាង ៥នាទី ត្រូវបានដកស្រង់ប្រសាសន៍របស់លោកនាយករដ្ឋមន្រ្តី ហ៊ុន សែន ដែលបានថ្លែងនៅក្នុងកិច្ចប្រជុំលើកទី ៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី៤ ខែមិថុនា ឆ្នាំ ២០១៩ លោកនាយករដ្ឋមន្ត្រី ហ៊ុន សែន បានលើកឡើងថា កម្ពុជាគឺជាប្រទេសមួយធ្លាប់ហែលឆ្លងកាត់នូវរបបមួយដែលមិនផ្តល់សិទ្ធិអ្វីទាំងអស់ដល់ប្រជាជន ហើយកម្ពុជាពិតជាត្រូវការណាស់នូវសិទ្ធិគ្រប់យ៉ាង។
លោកបន្តថា ជាមួយហេតុផលនេះ រាជរដ្ឋាភិបាលកម្ពុជា មានការប្តេជ្ញាខ្ពស់ក្នុងការលើកកម្ពស់ និងការពារសិទ្ធិមនុស្ស។
លោកថ្លែងថា៖ «កម្ពុជាយល់ច្បាស់ថា ការគោរពសិទ្ធិមនុស្ស ការលើកកម្ពស់សេរីភាពជាមូលដ្ឋាន ការប្រកាន់ខ្ជាប់នូវលទ្ធិប្រជាធិបតេយ្យ សេរីពហុបក្ស និងការលើកកម្ពស់នីតិរដ្ឋ ក៏ដូចជា ការកសាងមូលដ្ឋានទាំងនេះ នៅក្នុងសង្គមជាតិនឹងនាំមកនូវសុខសន្តិភាព ស្ថិរភាព ភាពសុខុដមរមនា និងយុត្តិធម៌សង្គមជានិរន្ត ក៏ដូចជា រួមចំណែកនឹងការអភិវឌ្ឍប្រកបដោយចីរភាព និងបរិយាប័ន្នផងដែរ»។
ដោយឡែកតំណាង សមាគម សហគមន៍ និងសហព័ន្ធសហជីព និងអង្គការមិនមែនរដ្ឋាភិបាល បានរៀបចំប្រារព្ធពិធីអបអរខួបលើកទី ៧៤ នៃទិវាសិទ្ធិមនុស្សអន្តរជាតិ ១០ ធ្នូ ដែលមានទីតាំងស្ថិតនៅក្នុងបរិវេណទីលានប្រជាធិបតេយ្យថ្មី នៅសង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ។
ការរៀបចំសិទ្ធិមនុស្សឆ្នាំ ២០២២នេះ ធ្វើឡើងក្រោមប្រធានបទ «ធានាសិទ្ធិនយោបាយដើម្បីលើកកម្ពស់ការចូលរួមរបស់ពលរដ្ឋក្នុងការកំណត់ជោគវាសនាប្រទេសជាតិ តាមគោលការណ៍លទ្ធិប្រជាធិបតេយ្យសេរីពហុបក្ស និងនីតិរដ្ឋ»។
មជ្ឈមណ្ឌលសិទ្ធិមនុស្សកម្ពុជា (CCHR) នៅក្នុងឱកាសសិទ្ធិមនុស្សនេះដែរ បានបង្ហាញពីព្រឹត្តិការណ៍សំខាន់ៗនៃកាលប្បវត្តិសិទ្ធិមនុស្សឆ្នាំ២០២២នេះ ដោយបានចេញផ្សាយនូវកម្រងខិត្តប័ណ្ណព័ត៌មានអំពីកាលប្បវត្តិសិទ្ធិមនុស្សជាសង្ខេបចាប់ពីខែមករា ដល់ខែធ្នូ ឆ្នាំ ២០២២។
CCHR បានលើកឡើងថា៖ «កាលប្បវត្តិសិទ្ធិមនុស្សដែលបង្ហាញនូវករណីរំលោភសិទ្ធិមនុស្សមួយចំនួនដែលបានកើតឡើងក្នុងប្រទេសកម្ពុជា ហើយកាលប្បវត្តិនេះបានចងក្រងករណីចាប់ពីចន្លោះឆ្នាំ ២០១៣ រហូតមកទល់នឹងបច្ចុប្បន្ន»៕
