ព្រះសីហនុៈ លោក អ៊ាង សុផល្លែត ជំនួយការផ្ទាល់លោកនាយករដ្ឋមន្ត្រី ហ៊ុន សែន បានឱ្យដឹងថា ក្នុងជំនួបរវាងលោកនាយករដ្ឋមន្ត្រី ហ៊ុន សែន និងលោក មីឆែល ប៊ូសូល (Michel Bujold) ប្រធានក្លិបឆ្នេរសមុទ្រដែលស្អាតបំផុត នៅព្រឹកថ្ងៃទី១០ ខែធ្នូនេះ លោកមីឆែល ប៊ូសូល បានសរសើរលោកនាយករដ្ឋមន្ត្រីកម្ពុជាថា គ្រប់គ្រងទប់ស្កាត់ការរីករាលដាលជំងឺកូវីដ ១៩ បានយ៉ាងល្អ នាំទៅដល់ការបើកប្រទេស និងបើកសេដ្ឋកិច្ចឡើងវិញ។
លោក អ៊ាង សុផល្លែត បានឱ្យដឹងថា ក្នុងជំនួបនោះ លោក មីឆែល ប៊ូសូល តំណាងឱ្យប្រតិភូក្លិបឆ្នេរសមុទ្រដែលស្អាតបំផុតលើសកលលោកវាយតម្លៃខ្ពស់ ចំពោះការដឹកនាំ របស់លោកនាយករដ្ឋមន្ត្រីកម្ពុជា ក្នុងការគ្រប់គ្រងទប់ស្កាត់ ការរីករាលដាលជំងឺកូវីដ១៩ បានយ៉ាងល្អនាំទៅដល់ការបើកប្រទេសឡើងវិញ បើកសេដ្ឋកិច្ចឡើងវិញ ការទទួលថ្នាក់ដឹកនាំកំពូលៗ មកពីតំបន់និងពិភពលោក មកប្រជុំកំពូលនៅរាជធានីភ្នំពេញ និងនៅពេលនេះរៀបចំដឹកនាំមហាសន្និបាតលើកទី១៦ ក្លិបឆ្នេរសមុទ្រដែលស្អាតបំផុតលើសកលលោកនៅខេត្តព្រះសីហនុ។
លោក មីឆែល ប៊ូសូល ថ្លែងថា៖«អ្វីជាគំរូ ដែលប្រតិភូ បានកត់សម្គាល់ឃើញនោះគឺ សម្តេចតេជោបានប្រែក្លាយវិបត្តិជំងឺកូវីដ១៩ ឱ្យទៅជាសក្តានុពល។ ជាមួយគ្នានោះ សម្តេចបានឆ្លៀតឱកាសកូវីដ១៩ កសាងហេដ្ឋារចនាសម្ព័ន្ធផ្លូវថ្នល់ ប្រព័ន្ធលូ អាងប្រព្រឹត្តិកម្មទឹកកខ្វក់ លម្អទីក្រុងធ្វើឱ្យចរាចរណ៍ធ្វើដំណើរបានយ៉ាងរលូន បានយ៉ាងល្អ និងធ្វើឱ្យភ្លើងភ្លឺចិញ្ចាចដែលអាចនិយាយបានថា ទីក្រុងព្រះសីហនុ ជាទីក្រុងភ្លឺចិញ្ចាចដ៏ស្រស់បំព្រង»។
លោក មីឆែល ប៊ូសូល បានជម្រាបជូនលោកនាយករដ្ឋមន្ត្រី ហ៊ុន សែន ថា លោកមានសេចក្តីរីករាយ ដែលបានទទួលដំណឹងថា នាយករដ្ឋមន្ត្រីកម្ពុជា នឹងធ្វើដំណើរទៅអឺរ៉ុប ក្នុងការពិភាក្សាការស្វែងរកសន្តិភាព ដែលប្រទេសនៅអឺរ៉ុបត្រូវការបំផុត ជាពិសេស នៅប្រទេស អ៊ុយក្រែន។
ជាការឆ្លើយតប លោកនាយករដ្ឋមន្ត្រី ហ៊ុន សែន បានថ្លែងអំណរគុណ លោក មីឆែល ប៊ូសូល ហើយបានមានប្រសាសន៍ថា កូវីដ១៩ ពិតជាបាននាំមកនូវផលវិបាកដល់យើងមែន ប៉ុន្តែយើងបានគ្រប់គ្រងបានល្អ បានជួយសង្គ្រោះជីវិតមនុស្សប្រមាណ ៤ពាន់នាក់ មកពីប្រមាណ ៧០ប្រទេស ដែលជាប់គ្មានកន្លែងចុះចតលើកប៉ាល់ វ៉េស្ទើដាម ហើយថ្ងៃនេះ ជាថ្ងៃទិវា សិទ្ធិមនុស្ស ប្រសិនបើគ្មានសន្តិភាពទេ វាសនាប្រជាជនលើ កប៉ាល់មិនដឹងជាយ៉ាងម៉េច។
លោកនាយករដ្ឋមន្ត្រីគូសបញ្ជាក់ថា៖ «សន្តិភាព ផ្ដល់នូវការរស់រានមានជីវិត និងសិទ្ធិដទៃទៀត ដែលបន្តផ្ដើមចេញពីសន្តិភាព មានសន្តិភាពទើបមានការអភិវឌ្ឍ ការកសាងហេដ្ឋារចនាសម្ព័ន្ធ រៀបចំបុណ្យសមុទ្រប្រចាំឆ្នាំ តាមខេត្តដែលមានឆ្នេរសមុទ្រជារៀងរាល់ឆ្នាំ ដើម្បីអភិរក្ស ការពារ អភិវឌ្ឍន៍និងទាក់ទាញទេសចរណ៍ ទ្រទ្រង់សេដ្ឋកិច្ចជាតិកម្ពុជា»។
លោកបន្តថា កម្ពុជាប្រកាន់ខ្ជាប់នូវការគោរពរាល់លក្ខខណ្ឌជាសមាជិកភាពក្លិបឆ្នេរសមុទ្រដែលស្អាតបំផុតលើសកលលោក ទោះស្ថិតនៅក្នុងកាល:ទេស:ណាក៏ដោយ ហើយក៏បានស្នើសុំឱ្យមានការពិចារណាដាក់លក្ខខណ្ឌមួយបន្ថែមទៀតនោះ គឺកុំឱ្យមានការប្រើប្រាស់ថង់ប្លាស្ទិកនៅតាមឆ្នេរសមុទ្រស្អាតបំផុតលើសកលលោក៕