ភ្នំពេញៈ លោក ចន ណារិទ្ធ អនុរដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ និង​ជា​អគ្គលេខាធិការ​ក្រុម​ប្រឹក្សាជាតិ​គាំពារ​សង្គម បាន​លើកឡើង​ថា ប្រជាពលរដ្ឋ​ដែល​ជា​គ្រួសារ​ងាយ​រង​ហានិភ័យ ដែល​រង​ផល​ប៉ះពាល់​ក្នុង​អំឡុងពេល​មាន​សម្ពាធ​អតិផរណា និង រង​ផល​ប៉ះពាល់​ដោយសារ​ទឹក​ជំនន់​នេះ និង​អាច​ទទួល​បាន​ជា​សាច់ប្រាក់​ពី​រាជរដ្ឋាភិបាល​កម្ពុជា ជា​មធ្យម​ប្រមាណ​ជាង ១៦​ម៉ឺន​រៀល អាស្រ័យ​ទៅ​តាមសមាជិក​គ្រួសារ ចាប់​ពីថ្ងៃ​ទី១០ ខែធ្នូ ឆ្នាំ២០២២ នេះតទៅ។

លោក​ថ្លែង​បែបនេះ​ក្នុង​សន្និសីទ​សារព័ត៌មាន ស្តីពី​យន្តការ​និង​នីតិវិធី នៃ​ការ​អនុវត្ត​កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ងាយ​រង​ហានិភ័យ និងដាក់​ឱ្យ​ដំណើរការ “កម្មវិធី​ឧបត្ថម្ភ​សាច់ប្រាក់​ជូន​គ្រួសារ​ងាយ​រង​ហានិភ័យ ក្នុង​អំឡុង​ពេល​មាន​សម្ពាធ អតិផរណា” នៅ​ព្រឹក​ថ្ងៃ​ទី ១០ ធ្នូ ឆ្នាំ ២០២២​នេះ នៅ​ទីស្តីការ​ក្រសួង សេដ្ឋកិច្ច និង​ហិរញ្ញវត្ថុ។

លោក​បាន​លើក​ឡើង​ថា ក្រុម​គ្រួសារ​ដែល​ងាយ​រង​ហានិភ័យ​ដោយ​សម្ពាធ​អតិផរណា និង​ប៉ះពាល់​ធ្ងន់ធ្ងរ​ពីគ្រោះ​ទឹកជំនន់ ហើយ​ត្រូវ​បានកំណត់​អត្តសញ្ញាណ​រួច ដែល​ត្រូវ​បើក​ផ្តល់​ប្រាក់​ឧបត្ថម្ភ​លើក​ដំបូង មាន​ចំនួន​ជិត ៣៦​ម៉ឺន​គ្រួសារ ស្មើ​នឹង​ប្រជាពលរដ្ឋ ១,៣​លាន​នាក់ ដែល​រាជរដ្ឋាភិបាល​ត្រូវ​ចំណាយ​ការ​ឧបត្ថម្ភ​ប្រមាណ ១៥ លាន​ដុល្លារ សម្រាប់​ការ​បើក​ផ្តល់​លើក​ដំបូង។

លោក​បាន​គូស​បញ្ជាក់ថា ក្នុង​ចំណោម​ប្រជាពលរដ្ឋ ដែល​បាន​កំណត់​អត្តសញ្ញាណ​រួច​ទាំង​ជិត ៣៦​ម៉ឺន​គ្រួសារ ក្នុង​នោះ​មាន​ក្រុម​គ្រួសារ ដែល​រង​នូវ​គ្រោះ​ទឹកជំនន់​ធ្ងន់ធ្ងរ​មាន​ចំនួន​ជិត ១០ ម៉ឺន​គ្រួសារ ដោយ​ទទួល​បាន​ការ​ឧបត្ថម្ភ​ទឹក​ប្រាក់​សរុប​លើក​ដំបូង​ប្រមាណ ៥​លាន​ដុល្លារ។

លោក​បញ្ជាក់​បន្ថែម​ថា តួលេខ​ចំនួន​ប្រជាជន និង​ទឹក​ប្រាក់​ឧបត្ថម្ភ ជូន​បងប្អូន​ប្រជាពលរដ្ឋ ដែល​ជា​គ្រួសារ​ងាយ​រង​ហានិភ័យ ដោយ​សម្ពាធអតិផរណា និង​ប៉ះពាល់​ធ្ងន់ធ្ងរ​ពីគ្រោះ​ទឹក​ជំនន់ នេះ​គ្រាន់​ជា​ការ​កំណត់​អត្តសញ្ញាណ​លើក​ដំបូង​ប៉ុណ្ណោះ ហើយ​ការ​កំណត់​អត្តសញ្ញាណ​ពលរដ្ឋ​រង​ហានិភ័យ​បន្ថែម​ទៀត នឹង​ត្រូវ​ធ្វើឡើង​នៅ​ឆ្នាំ ២០២៣​ខាងមុខ។

លោក​ថ្លែង​ថា៖ «ទោះ​ជា​យ៉ាង​ណា​ក្នុង​ដំណើរ​នៃ​ការ​កំណត់​អត្តសញ្ញាណ​ក្តី ក្នុង​ដំណើរ​នៃ​ការ​បើក​ផ្តល់ ដែល​មូលនិធិ​ជាតិ​ជំនួយ​សង្គម សហការ​ជាមួយ​វីង ចាប់​ផ្តើម​ពី​ថ្ងៃនេះ​ត​ទៅក្តី យើង​មាន​យន្តការ​ដែល​ធានា​នូវ​ប្រតិតុល្យការ ដែល​ធ្វើឡើង​តាម​ប្រព័ន្ធ​បច្ចេកវិទ្យា ឌីជីថល ព្យាយាម​ធានា​ឱ្យ​មាន​ជា​អតិបរមា​នូវ​សុក្រឹតភាព»។

លោក​អនុរដ្ឋលេខាធិការ​រូបនេះ​បាន​លើក​ឡើង​ថា កម្មវិធី​នេះ​ ជា​កម្មវិធី​ជំនួយ​សង្គមថ្មី​ដែល​ឧបត្ថម្ភ​ជា​សាច់ប្រាក់ ជូន​គ្រួសារ​ងាយ​រង​ហានិភ័យ ដែល​រង​ផល​ប៉ះពាល់​ធ្ងន់ធ្ងរ​ពីគ្រោះ​ទឹកជំនន់, មាន​វិសាលភាព​នៅ​ក្នុង​តំបន់​ភូមិសាស្ត្រ​គោលដៅ​នៃ​រាជធានីភ្នំពេញ, ខេត្តកណ្តាល, ខេត្តតាកែវ, ខេត្តពោធិ៍សាត់, ខេត្តបាត់ដំបង, ខេត្តបន្ទាយមានជ័យ, ខេត្តសៀមរាប, ខេត្តកំពង់ធំ, ខេត្តកំពង់ចាម, ខេត្តត្បូងឃ្មុំ, ខេត្តក្រចេះ, ខេត្តកំពង់ឆ្នាំង, ខេត្តព្រៃវែង, ខេត្តកំពត, ខេត្តស្វាយរៀង, និងខេត្តឧត្តរមានជ័យ។

កម្មវិធីឧបត្ថម្ភ​សាច់ប្រាក់ ជូន​គ្រួសារ​ងាយ​រង​ហានិភ័យ ក្នុង​អំឡុង​ពេល​មាន​សម្ពាធ​អតិផរណា និង​ការ​អនុវត្ត​កម្មវិធី​ជំនួយ​សង្គម​ជា​សាច់​ប្រាក់ ជូន​គ្រួសារ​ងាយរង​ហានិភ័យ ដែល​រងផល​ប៉ះពាល់​ធ្ងន់ធ្ងរ​ពីគ្រោះ​ទឹក​ជំនន់ ត្រូវ​បាន​លោក​នាយក​រដ្ឋមន្ត្រី ហ៊ុន សែន ប្រមុខ​រាជរដ្ឋាភិបាលកម្ពុជា បាន​ប្រកាស​ដាក់​ឱ្យ​អនុវត្ត​តាម​សារ​លិខិត​លេខ ៣៣ សលខ ចុះ​ថ្ងៃទី​៣ ខែ​ធ្នូ ឆ្នាំ២០២២។

បើ​តាម​សារ​លិខិត​របស់​រាជរដ្ឋាភិបាល គ្រួសារ​ដែល​រងគ្រោះ​ត្រូវ​បាន​កំណត់​អត្តសញ្ញាណ​ដោយ​ក្រសួង​ផែនការ នឹង​ត្រូវ​ទទួល​បាន​ការ​ឧបត្ដម្ត​សាច់​ប្រាក់​ចំនួន ៣លើក៖ លើកទី១ ចាប់​ពី​ថ្ងៃ​ទី១០ ខែ​ធ្នូ ឆ្នាំ២០២២, លើក​ទី២ នៅ​ថ្ងៃ​ទី ១០ ​ខែ​មេសា ឆ្នាំ​២០២៣ និង​លើក​ទី៣ នៅថ្ងៃទី ១០ ខែកក្កដា ឆ្នាំ២០២៣៕