តាកែវៈចៅក្រមស៊ើបសួរនៃតុលាការខេត្តតាកែវនៅថ្ងៃទី១១ធ្នូ ឆ្នាំ២០២២ បានចេញដីកាឃុំខ្លួនបុរសម្នាក់បន្ទាប់ពីកម្លាំងកងរាជអាវុធហត្ថខេត្តតាកែវឃាត់ខ្លួនបាន៣ថ្ងៃ ពាក់ព័ន្ធករណីជួញដូរកញ្ជាក្រៀមជាង២គីឡូក្រាម។
លោក ង៉ែត ដាវុធ អ្នកនាំពាក្យតុលាការខេត្តតាកែវបានប្រាប់ភ្នំពេញប៉ុស្តិ៍នៅថ្ងៃទី១១ធ្នូ ថា បុរសឈ្មោះ ញ៉ែម សីហសិត អាយុ៣៩ឆ្នាំ ត្រូវបានចៅក្រមស៊ើបសួរ សម្រេចចេញដីកាឃុំខ្លួនបណ្តោះអាសន្នក្នុងពន្ធនាគារខេត្តតាកែវហើយ កាលពីព្រឹកថ្ងៃទី១១ធ្នូ។
លោកថ្លែងថា៖«ជននេះ ត្រូវចោទពីបទរក្សាទុក ដឹកជញ្ជូនឬជួញដូរដោយខុសច្បាប់នូវសារធាតុញៀនតាមមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន»។
យោងមាត្រា៤០នៃច្បាប់ស្តីពីការត្រួតពិនិត្យគ្រឿងញៀន ប្រសិនបើតុលាការរកឃើញថា ជនត្រូវចោទពិតជាបានប្រព្រឹត្តមែននោះ នឹងត្រូវផ្តន្ទាទោសដាក់ពន្ធនាគារពី(ពីរ)ឆ្នាំទៅ៥(ប្រាំ)ឆ្នាំ។
បើតាមលោក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ ប្រាប់ភ្នំពេញប៉ុស្តិ៍នៅថ្ងៃទី១១ធ្នូថា ដោយមានការស្រាវជ្រាវ និងស៊ើបអង្កេតយ៉ាងដិតដល់ពីកម្លាំងជំនាញ និងដោយមានការបញ្ជាពីលោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ កម្លាំងសមត្ថកិច្ចរបស់លោកបានចុះឃាត់ខ្លួនជនសង្ស័យម្នាក់ឈ្មោះ ញ៉ែម សីហសិត អាយុ៣៩ឆ្នាំ កាលពីថ្ងៃទី៩ ធ្នូ ។
លោកបញ្ជាក់ថា ជនសង្ស័យ ជាកសិករស់នៅក្នុងភូមិពោធិ៍រោង ឃុំព្រះបាទជាន់ជុំ ស្រុកគិរីវង់ ខេត្តតាកែវ។
ក្រោយឃាត់ខ្លួនកម្លាំងសមត្ថកិច្ចរបស់លោក បានធ្វើតេស្តទឹកនោម និងពិនិត្យឃើញមានផ្ទុកសារធាតុញៀន វិជ្ជមានផងដែរ។
ចំពោះវត្ថុតាងដែលរឹបអូសបានពីជនសង្ស័យមាន កញ្ឆាក្រៀមចំនួន១ថង់ស្មើទម្ងន់ ២គីឡូ និង៧ក្រាម៕