ភ្នំពេញៈ លោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃជំរុញដល់ថ្នាក់ដឹកនាំ មន្ត្រីរាជការ អាជ្ញាធរកម្លាំងសមត្ថកិច្ចគ្រប់លំដាប់ថ្នាក់គ្រប់គ្រងព្រំដែនឱ្យបានគត់មត់ដើម្បីទប់ស្កាត់មូលហេតុផ្សំនាំឱ្យមានអំពើជួញដូរមនុស្សនិងរួមគ្នាលុបបំបាត់ជនទេសន្តរប្រវេសន៍ខុសច្បាប់ចូលមកកម្ពុជា។
ការថ្លែងរបស់លោកស ខេង ដូចនេះ ធ្វើឡើងពិធីអបអរទិវាជាតិ១២ ធ្នូ ប្រឆាំងការជួញដូរមនុស្ស ឆ្នាំ២០២២ ក្រោមប្រធានបទ«រួមគ្នាលុបបំបាត់អំពើជួញដូរមនុស្សឆ្ពោះទៅសម្រេចគោលដៅអភិវឌ្ឍន៍ប្រកបដោយចីរភាព»ប្រារព្ធនៅមជ្ឈមណ្ឌលកោះពេជ្រ នៅរសៀលថ្ងៃទី១២ ខែធ្នូ ឆ្នាំ២០២២។
លោកថ្លែងថា៖«ថ្នាក់ដឹកនាំ មន្ត្រីរាជការ អាជ្ញាធរ កម្លាំងសមត្ថកិច្ច និងមន្ត្រីរាជការគ្រប់លំដាប់ថ្នាក់ សូមខិតខំតាមដានបាតុភាព និងបទល្មើសផ្សេងៗ និងគ្រប់គ្រងព្រំដែនឱ្យបានគត់មត់ដើម្បីទប់ស្កាត់មូលហេតុរួមផ្សំដែលនាំឱ្យមានអំពើជួញដូរមនុស្សនិងការរំលោភបំពានផ្សេងៗ រួមគ្នាលុបបំបាត់ការធ្វើទេសន្តរប្រវេសន៍ដែលគ្មានសុវត្ថិភាព ខុសច្បាប់ និងការងារខុសច្បាប់»។
ជាមួយគ្នានោះលោក ស ខេង ក៏បានស្នើថ្នាក់ដឹកនាំគ្រប់និកាយសាសនាបន្តផ្សព្វផ្សាយខ្លឹមសារពាក់ព័ន្ធនឹងការប្រយុទ្ធប្រឆាំងអំពើជួញដូរមនុស្សដល់សាសនិកទាំងឡាយនៅតាមសហគមន៍ទូទាំងប្រទេសឱ្យបានយល់ជ្រួតជ្រាប ខ្លឹមសារពាក់ព័ន្ធនឹងអំពើជួញដូរមនុស្សតាមវិធានការ។
បន្ថែមលើនេះលោកឧបនាយករដ្ឋមន្ត្រីបានលើកទឹកចិត្តដល់គ្រប់វិស័យពាក់ព័ន្ធជាតិនិងអន្តរជាតិឱ្យបន្តរិះរកនូវវិធានការជាគន្លឹះនានា និងរួមសហការគ្នាជាធ្លុងមួយ ធ្វើសកម្មភាពឱ្យកាន់តែខ្លាំងក្លាក្នុងការ«បង្ការបង្ក្រាប ផ្តន្ទាទោស សង្គ្រោះ ការពារ ដើម្បី ព្រះរាជាណាចក្រកម្ពុជាគ្មានអំពើជួញដូរមនុស្ស»។
លោកបានលើកឡើងថា ចរន្តនៃការវិលត្រឡប់មកវិញដោយឥតគ្រោងទុករបស់ពលករកម្ពុជាពីក្រៅប្រទេសក្នុងអំឡុងពេលរីករាលដាលខ្លាំងនៃជំងឺកូវីដ១៩ធ្វើឱ្យការគ្រប់គ្រងព្រំដែនមានភាពប្រឈមស្មុគស្មាញនិងមានជនទេសន្តរប្រវេសន៍បរទេសខុសច្បាប់ជាច្រើនឆ្លៀតឱកាសបន្លំខ្លួនចូលមកកម្ពុជាសម្ងំលាក់ខ្លួនធ្វើការងារទុច្ចរិតមួយចំនួនបង្កើតបានជាបទល្មើសយ៉ាងអនាធិបតេយ្យលើទឹកដីកម្ពុជា ប៉ុន្តែសកម្មភាពនោះ ត្រូវបានរាជរដ្ឋាភិបាលកម្ពុជាដាក់ចេញវិធានការរុករក បង្ក្រាប និងបោសសម្អាតដោយជោគជ័យ។
លោកថ្លែងថា៖«ស្ថិតក្នុងស្ថានភាពបែបនេះ រាជរដ្ឋាភិបាលកម្ពុជា មិនបានព្រងើយកន្តើយឡើយ បានដាក់ចេញនូវវិធានការ ប្រតិបត្តិការ ដើម្បីរុករក បង្ក្រាប និងបោសសម្អាតបទល្មើសជួញដូរមនុស្សគ្រប់ទម្រង់ និងបទល្មើសពាក់ព័ន្ធដទៃទៀតយ៉ាងសកម្មតាមវិធានការច្បាប់រហូតធ្វើឱ្យកម្ពុជាវិលត្រឡប់មករកស្ថានភាពសុវត្ថិភាព និងសន្តិសុខជាប្រក្រតីឡើងវិញនៅទូទាំងផ្ទៃប្រទេស»។
លោក ស ខេង លើកឡើងថា កម្ពុជាបានចូលរួមយ៉ាងសកម្មនៅក្នុងដំណើរការនៃការរៀបចំ អនុម័ត អនុសញ្ញាអាស៊ានប្រឆាំងការជួញដូរមនុស្ស កតិកាសញ្ញាពិភពលោក ស្តីពីទេសន្តរប្រវេសន៍ ដោយសុវត្ថិភាព រៀបរយ និងស្របច្បាប់ ដែលហៅកាត់ថា GCM រហូតត្រូវបានការទទួលស្គាល់ពីអង្គការសហប្រជាជាតិផ្នែកទេសន្តរប្រវេសន៍ថាជា«ប្រទេសជយលាភីនៃគំនិតផ្តួចផ្តើមរបស់កតិកាសញ្ញាពិភពលោកស្តីពីទេសន្តរប្រវេសន៍»ក្នុងការប្តេជ្ញាចិត្តខ្ពស់ការពារផលប្រយោជន៍និងសិទ្ធិស្របច្បាប់របស់ពលករទេសន្តរប្រវេសន៍ និងការពារពួកគេពីភាពរងគ្រោះ ដោយការរំលោភបំពាន និងកេងប្រវ័ញ្ចគ្រប់រូបភាព ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ហៅកាត់ថា គ.ជ.ប.ជ បានឱ្យដឹងថា ក្នុងឆមាសទី១នៃឆ្នាំ២០២២ ស្ថានភាពនៃអំពើជួញដូរមនុស្សមានភាពល្អប្រសើរ ដោយអត្រានៃបទល្មើសបានថយចុះ គួរឱ្យកត់សម្គាល់ បើប្រៀបធៀបទៅនឹងឆ្នាំ២០២១។
លោកស្រីបន្តថា នៅពេលដែលស្ថានភាពទូទៅបានរៀបរយល្អប្រសើរហើយ ចំពោះសកម្មភាពបង្ការ ទប់ស្កាត់ និងបង្ក្រាបបទល្មើសជួញដូរមនុស្ស ជួញដូរពលកម្ម និងអាជីវកម្មផ្លូវភេទ បែរជាកើតមានបទល្មើសថ្មីលើទឹកដីកម្ពុជាដែលបង្កឡើងដោយឧក្រិដ្ឋជនមួយចំនួនដែលសម្ងំលាក់ខ្លួនប្រព្រឹត្តបទល្មើសក្នុងអាជីវកម្មបន្លំភ្នែកដោយប្រើប្រាស់ឱកាសដ៏ល្អដែលរាជរដ្ឋាភិបាលកម្ពុជា បាន និងកំពុងផ្តល់ឱ្យសម្រាប់ការវិនិយោគដើម្បីការអភិវឌ្ឍនៅក្នុងតំបន់ប៉ូលសេដ្ឋកិច្ចធំៗ ដូចជា ខេត្តព្រះសីហនុ រាជធានីភ្នំពេញ ជាដើម និងបណ្តាខេត្តមួយចំនួនទៀត ទៅធ្វើសកម្មភាពឧក្រិដ្ឋប្រឆាំងនឹងសិទ្ធិមនុស្ស ។
លោកស្រី ជូ ប៊ុនអេង បានឱ្យដឹងទៀតថា គិតចាប់ពីថ្ងៃទី១៨ ខែសីហា មកដល់ខែវិច្ឆិកា ឆ្នាំ២០២២ គឺក្នុងចំណោមអ្នកដែលបានប្រកាសថា ជាជនរងគ្រោះ សុំឱ្យធ្វើអន្តរាគមន៍ជួយសង្គ្រោះ គ.ជ.ប.ជ បានរកឃើញមនុស្សចំនួន ១ ១២២នាក់ ស្រី១២១នាក់ ហើយ។
លោកស្រីបញ្ជាក់ថា៖«ក្នុងចំណោមជនទាំងនោះអ្នកដែលត្រូវបានកំណត់អត្តសញ្ញាណថាជាជនរងគ្រោះដោយអំពើជួញដូរមនុស្ស ការបង្ខាំងខ្លួន និងពលកម្មដោយបង្ខំមាន១៥៣នាក់ ស្រី១៨នាក់ មាន៦សញ្ជាតិ ចំណែកជនក្រៅពីនេះបានបដិសេធថាខ្លួន មិនបានទទួលភាពរងគ្រោះទេ និងមានបំណងចង់ប្តូរទៅទីតាំងការងារថ្មីដែលមានប្រាក់ខែខ្ពស់ជាងនេះ ឬថា គ្រាន់តែជាការបារម្ភរបស់ក្រុមគ្រួសារតែប៉ុណ្ណោះ»។
លោកស្រី រដ្ឋលេខាធិការបន្តថា រាជរដ្ឋាភិបាលកម្ពុជាចាំបាច់ត្រូវតែនាំពលករចេញពីទីតាំងដែលពាក់ព័ន្ធនឹងបទល្មើសដើម្បីសុវត្ថិភាពពួកគេ និងមិនអនុញ្ញាតឱ្យវិលត្រឡប់ទៅកាន់ទីតាំងទាំងនោះវិញឡើយ។គិតពីចាប់ផ្តើមប្រតិបត្តិការដល់ត្រឹមថ្ងៃទី១៩ ខែតុលា ឆ្នាំ២០២២ មានជនសង្ស័យ២២នាក់ មាន៣សញ្ជាតិដែលសង្ស័យពាក់ព័ន្ធនឹងបទល្មើសជួញដូរមនុស្ស និងជនសង្ស័យពាក់ព័ន្ធនឹងអំពើជួញដូរផ្លូវភេទ៤នាក់មាន១សញ្ជាតិត្រូវ
បានកសាងសំណុំរឿងបញ្ជូនទៅតុលាការដើម្បីចាត់វិធានការតាមនីតិវិធី។ ទីតាំងសង្ស័យប្រព្រឹត្តបទល្មើសចំនួន៥ ត្រូវបានបិទជាស្ថាពរ និង៤ទីតាំង ត្រូវបានបិទជាបណ្តោះអាសន្នដើម្បីស្រាវជ្រាវរកបទល្មើស៕