.jpg)
លោក ឡុង ឌីម៉ង់ ក្នុងពិធីសម្ពោធដាក់ឱ្យប្រើប្រាស់សូឡាតាមថ្នល់ កាលពីថ្ងៃទី១២ ធ្នូ ។ រូបថត រដ្ឋបាលខេត្តព្រះសីហនុ
សីហនុៈ គម្រោង «គំនិតផ្ដួចផ្ដើមអគារបៃតងតាមរយៈវិធានការគាំទ្រសហគមន៍ងាយរងគ្រោះ»ឧបត្ថម្ភដោយប្រទេសជប៉ុន អនុវត្តដោយ UN-Habitat នៅខេត្តព្រះសីហនុ រួមចំណែកលើកកម្ពស់ជីវភាពសុខុមាលភាព និងកាត់បន្ថយការចំណាយទៅលើការប្រើប្រាស់អគ្គិសនី និងរួមចំណែកកាត់បន្ថយភាពក្រីក្ររបស់ប្រជាពលរដ្ឋក្នុងសហគមន៍ព្រមទាំងអាចរស់នៅប្រកបដោយភាពរីករាយ និងសុវត្ថិភាព។
នេះបើតាម លោក ឡុង ឌីម៉ង អភិបាលរងខេត្តព្រះសីហនុ ប្រាប់ភ្នំពេញប៉ុស្តិ៍តាមរយៈបណ្តាញសង្គមតេឡេក្រាមរសៀលថ្ងៃទី ១៣ ខែធ្នូ ឆ្នាំ២០២២ ។
លោកថ្លែងថា៖««គម្រោងនេះផ្តល់ជម្រើសថាមពលស្អាត ពិសេសចង្ក្រានដែលប្រើប្រាស់ថាមពលប្រកបដោយប្រសិទ្ធភាពក្នុងការកាត់បន្ថយភាពងាយរងគ្រោះ ចំពោះការឆ្លងមេរោគតាមផ្លូវដង្ហើមដែលអាចបណ្ដាលមកពីការចម្អិនអាហារ ប្រើប្រាស់ឥន្ធនៈបំពុល និងបច្ចេកវិទ្យាធ្វើឱ្យគុណភាពខ្យល់នៅក្នុងផ្ទះមិនល្អ»។
លោកអភិបាលរងខេត្តព្រះសីហនុបានឱ្យដឹងថា រដ្ឋបាលខេត្តព្រះសីហនុបានឯកភាពជាគោលការណ៍អនុញ្ញាតឱ្យUN-HABITAT អនុវត្តគម្រោងស្ដីពី«គំនិតផ្ដួចផ្ដើមអគារបៃតងតាមរយៈវិធានការគាំទ្រសហគមន៍ងាយរងគ្រោះ»ក្នុងសហគមន៍ក្រីក្រចំនួន២ រួមមាន តំបន់ទំនប់រលកភូមិ៣ និងតំបន់អភិវឌ្ឍន៍ថ្មី ភូមិ១ សង្កាត់១ ក្រុងព្រះសីហនុ តាមរយៈ ស.ជ.ណ.លេខ ២១១/២២ ចុះថ្ងៃ២៨ ខែកក្កដា ឆ្នាំ២០២២។
លោកបន្ថែមថា៖«គម្រោងនេះក៏បានរួមចំណែកផ្តល់ជម្រើសថាមពលជំនួសសម្រាប់បំភ្លឺ និងសន្សំសំចៃការប្រើប្រាស់អគ្គិសនី ដែលរួមចំណែកដោយផ្ទាល់ដល់ការកាត់បន្ថយការចំណាយរបស់គ្រួសារក្រីក្រក្នុងសហគមន៍ងាយរងគ្រោះផងដែរ»។
លោកអភិបាលរងខេត្តព្រះសីហនុរូបនេះប្រាប់ថា នៅព្រឹកថ្ងៃទី១២ ខែធ្នូ លោកទើបបានបើកសម្ពោធដាក់ឱ្យប្រើប្រាស់សូឡាតាមថ្នល់ ការបែងចែកសូឡាតាមផ្ទះ និងចង្ក្រានបរិស្ថាននៃគម្រោង«គំនិតផ្ដួចផ្ដើមអគារបៃតងតាមរយៈវិធានការគាំទ្រសហគមន៍ងាយរងគ្រោះ» នៅក្នុងសង្កាត់១ ក្រុងព្រះសីហនុ។
តាមរយៈគម្រោងនេះ UN-Habitat បានជួយផ្តល់ចង្ក្រានបរិស្ថាន កង្ហារសូឡា និងអំពូលសូឡាបាន២វគ្គមកហើយ ក្នុងនោះ វគ្គទី១ នៅថ្ងៃទី៤ ខែវិច្ឆិកា ឆ្នាំ២០២២ គម្រោងបានប្រគល់ជូននូវចង្ក្រានបរិស្ថានចំនួន ៣៧២ឈុត ដល់គ្រួសារក្រីក្រចំនួន១៨៦ គ្រួសារ (ក្នុង១គ្រួសារទទួលបាន២ឈុត)។
ចំណែកវគ្គទី២ នៅថ្ងៃទី១២ ខែធ្នូ ឆ្នាំ២០២២ គម្រោងបានប្រគល់ជូនគ្រួសារក្រីក្រចំនួន ១៨៦គ្រួសារ ក្នុង១គ្រួសារទទួលបាន កង្ហារសូឡា១ឈុត (ផ្តល់ជូន១៨៩ឈុត) អំពូលសូឡាតាមផ្ទះ ២ឈុត (ផ្ដល់ជូន៣៧៨ឈុត) ដោយឡែកគម្រោងបំពាក់អំពូលសូឡាតាមដងផ្លូវភូមិ១ ចំនួន ៣១ដើម និងភូមិ៣ ចំនួន១១០ដើម (សរុប ១៤១ដើម)។
លោក ឡុង ឌីម៉ង់ បានឱ្យដឹងថា UN-Habitat បានចូលជួយខេត្តព្រះសីហនុតាំងពីឆ្នាំ២០១១ រហូតមកដល់បច្ចុប្បន្ន ក្នុងនោះ UN-Habitat ក៏បានគាំទ្របច្ចេកទេសលើគម្រោង និងសកម្មភាពជាច្រើន ដូចជា គម្រោងបន្ស៊ាំក្នុងការប្រែប្រួលអាកាសធាតុ នៅខេត្តព្រះសីហនុ គម្រោងអប់រំអនាម័យបរិស្ថាន គម្រោង Smart City និងបច្ចុប្បន្នកំពុងអនុវត្តគម្រោងគំនិតផ្ដួចផ្ដើមអគារបៃតងតាមនេះ នៅក្នុងសង្កាត់១ ក្រុងព្រះសីហនុ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ប្រាប់ភ្នំពេញប៉ុស្តិ៍នៅថ្ងៃទី១៣ ខែធ្នូថា នេះគឺជាគម្រោងល្អមួយសម្រាប់មធ្យោបាយនៃការប្រើប្រាស់ ខណៈរាជរដ្ឋាភិបាលកម្ពុជាកំពុងជំរុញការប្រើប្រាស់ថាមពលស្អាត ដែលជាផ្នែកមួយនៃការចូលរួមការពារបរិស្ថាន ក៏ដូចជា ការអនុវត្តនូវផែនការអភិវឌ្ឍន៍រយៈពេលវែងសម្រាប់អព្យាក្រឹតកាបូនត្រឹមឆ្នាំ២០៥០។
លោកថ្លែងថា៖«ថាមពលស្អាត គឺជាផ្នែកមួយដែលនឹងចូលរួមក្នុងការធ្វើឱ្យមានអព្យាក្រឹតកាបូនដើម្បីកុំឱ្យមានការបំពុល។អ៊ីចឹងការប្រើប្រាស់ប្រព័ន្ធសូឡា ចង្ក្រានបរិស្ថាន ថាមពលដែលក៏កើតឡើងវិញ ឬប្រភេទដែលមានមេត្រីបរិស្ថានហ្នឹង ជាចំណុចល្អ ហើយយើងបន្តលើកទឹកចិត្តបន្ថែមទៀត ព្រោះនេះជាការអនុវត្តមួយដែលល្អហើយជំរុញការអនុវត្តជារួមដើម្បីបរិស្ថានកម្ពុជាល្អ»។
លោក នេត្រ ភក្ត្រា បន្ថែមថា នៅក្នុងការធ្វើអព្យាក្រឹតកាបូននៅឆ្នាំ២០៥០ គឺនៅក្នុងចំណោមវិស័យចំនួន៧ មានដូចជា កសិកម្ម ព្រៃឈើ ការប្រើប្រាស់ដី ថាមពល ការដឹកជញ្ជូន សំណង និងសំរាម។ ទាក់ទងនឹងបញ្ហាថាមពល ក្រសួងបរិស្ថានបានកំណត់ច្បាប់លាស់គឺទី១បញ្ឈប់ការសាងសង់អគ្គិសនីដើរដោយធ្យូងថ្មថ្មីលើសពីគម្រោងដែលបានអនុម័តរួចហើយ។ទី២ គឺការប្រើប្រាស់ឧស្ម័នធម្មជាតិជាឥន្ធនៈអន្តរកាលដែលងាយធ្វើនិយតកម្ម ទី៣ការវិនិយោគលើការនាំចូលLNG ការស្តុកទុក និងហេដ្ឋារចនាសម្ព័ន្ធ ទី៤ បង្កើនចំណែកថាមពលកកើតឡើងវិញពីពន្លឺព្រះអាទិត្យ វារីអគ្គិសនី និងជីវម៉ាស់នៅល្បាយថាមពលចំនួន៣៥ % នៅឆ្នាំ ២០៥០ ដែលក្នុងនោះ ១២% បានមកពីពន្លឺព្រះអាទិត្យជាដើម៕
