.jpg)
ប្រភេទថ្នាំផ្សះដែលត្រូវប្រើតាមវេជ្ជបញ្ជាឱ្យបានត្រឹមត្រូវ។ រូបថត WHO
ភ្នំពេញៈ ក្រសួងសុខាភិបាល និងអង្គការសុខភាពពិភពលោក (WHO) ប្រចាំកម្ពុជា បានអំពាវនាវឱ្យពលរដ្ឋរួមគ្នាប្រឆាំងភាពស៊ាំនឹងឱសថប្រឆាំងមេរោគ ឬថ្នាំផ្សះ ស្របពេលអង្គការសុខភាពពិភពលោកនៅតំបន់ប៉ាស៊ីហ្វិកភាគខាងលិច ធ្វើយុទ្ធនាការស្វែងរកការគាំទ្រឱ្យបាន ១ លាននាក់ដើម្បីប្តេជ្ញាបញ្ឈប់ការប្រើប្រាស់ថ្នាំផ្សះលើសកម្រិត និងមិនបានត្រឹមត្រូវ។
យុទ្ធនាការនៅតំបន់ប៉ាស៊ីហ្វិកភាគខាងលិចរបស់ WHO ប្រឆាំងនឹងថ្នាំផ្សះត្រូវបានធ្វើឡើងតាមរយៈបណ្តាញសង្គម ហើយគិតមកទល់ថ្ងៃទី ១៣ ធ្នូ ឆ្នាំ ២០២២ មានពលរដ្ឋនៅតំបន់ប៉ាស៊ីហ្វិកភាគខាងលិចក្នុងនោះមានទាំងកម្ពុជាផងប្រមាណជាង ២២ ម៉ឺននាក់ បានចុះឈ្មោះចូលរួមនៅក្នុងយុទ្ធនាការនេះ។
WHO បានឱ្យដឹងថា មនុស្សម្នាក់ៗអាចចាត់វិធានការងាយមួយចំនួន ដើម្បីជួយគាំទ្រដល់យុទ្ធនាការប្រឆាំងនឹងភាពស៊ាំរបស់ថ្នាំផ្សះ ដោយសន្យាថានឹងចាត់វិធានការ និងបញ្ឈប់ការប្រើប្រាស់ថ្នាំផ្សះលើសកម្រិត និងមិនត្រឹមត្រូវ។
អង្គការសុខភាពពិភពលោក បានឱ្យដឹងបន្តថា ការចូលរួមរបស់ពលរដ្ឋទូទៅ ក៏អាចធ្វើទៅបានតាមរយៈការស្វែងរកការណែនាំពីអ្នកជំនាញសុខាភិបាលត្រឹមត្រូវមុននឹងប្រើថ្នាំផ្សះ ហើយប្រសិនបើពេទ្យចេញវេជ្ជបញ្ជាឱ្យប្រើថ្នាំផ្សះ គឺត្រូវធ្វើតាមការណែនាំរបស់គ្រូពេទ្យអំពីរបៀបលេបថ្នាំ ណែនាំក្រុមគ្រួសារ និងមិត្តភក្តិអំពីភាពស៊ាំរបស់ថ្នាំផ្សះ។
WHO បានបញ្ជាក់ថា៖ «សូមអរគុណសម្រាប់ការសន្យាប្រយុទ្ធប្រឆាំងនឹងភាពស៊ាំនៃថ្នាំផ្សះតាមរយៈការការពារកុំឱ្យឆ្លងមេរោគ និងបញ្ឈប់ការប្រើថ្នាំផ្សះលើសកម្រិត និងមិនត្រឹមត្រូវ។ វិធានការផ្សេងៗដែលអ្នកបានសន្យាធ្វើ នឹងជួយឱ្យសហគមន៍មានសុវត្ថិភាព និងមានសុខភាពល្អ។ សូមជួយផ្សព្វផ្សាយដល់គ្រួសារ និងមិត្តភក្តិថា អ្នកបានសន្យារួចហើយ ហើយលើកទឹកចិត្តពួកគេឱ្យធ្វើដូចអ្នកដែរ»។
ជាមួយគ្នានេះ WHO ក៏បានណែនាំដល់ពលរដ្ឋឱ្យចូលរួមការការពារការរីករាលដាលនៃការឆ្លងមេរោគនានា ដើម្បីជាចំណែកនៃការកាត់បន្ថយភាពស៊ាំនឹងឱសថដោយត្រូវអនុវត្តសកម្មភាពប្រចាំថ្ងៃតាមរយៈលាងដៃខ្ញុំជាប្រចាំ ការរៀបចំអាហារប្រកបដោយអនាម័យ និងធានាឱ្យបានថា វ៉ាក់សាំងដែលគ្រប់គ្នាបានចាក់នៅមានប្រសិទ្ធភាពការពារបាន។
ភាពស៊ាំនៃថ្នាំផ្សះ កើតឡើងនៅពេលបាក់តេរី និងអតិសុខុមប្រាណផ្សេងៗ ផ្លាស់ប្តូរ បន្ទាប់ពីបាក់តេរី និងអតិសុខុមប្រាណប៉ះនឹងឱសថប្រឆាំងនឹងមេរោគ។ ថ្នាំផ្សះស្ថិតនៅក្នុងចំណោមឱសថប្រឆាំងមេរោគដែលគេប្រើជាញឹកញាប់បំផុត ហើយការប្រើថ្នាំផ្សះលើសកម្រិតនិងមិនត្រឹមត្រូវ ធ្វើឱ្យភាពស៊ាំកើតឡើងកាន់តែលឿន និងធ្វើឱ្យអ្នកប្រើមានគ្រោះថ្នាក់។
ក្រសួងសុខាភិបាលកម្ពុជាបានអះអាងថា ភាពស៊ាំនៃថ្នាំផ្សះអាចប៉ះពាល់អ្នករាល់គ្នា ទោះអាយុប៉ុន្មានក៏ដោយ នៅក្នុងប្រទេសណាក៏ដោយ ព្រោះវាជាការគំរាមកំហែងដល់សុខភាពមនុស្ស សន្តិសុខស្បៀង និងការអភិវឌ្ឍដោយចីរភាព។
ក្រសួងបានបន្តថា ការចូលរួមរបស់អ្នកគ្រប់គ្នាក្នុងការកាត់បន្ថយការប្រើថ្នាំផ្សះ គឺបានចូលរួមចំណែកជួយសង្គ្រោះជីវិតមនុស្ស និងជួយសង្គ្រោះអនាគតរបស់យើងទាំងអស់គ្នា ដោយក្រសួងអំពាវនាវឱ្យពលរដ្ឋចូលរួមកាត់បន្ថយភាពស៊ាំនឹងថ្នាំផ្សះបានតាមរយៈវិធីងាយៗ ២ យ៉ាង គឺកាបញ្ឈប់ការប្រើថ្នាំផ្សះលើសកម្រិត និងមិនត្រឹមត្រូវ និងការពារកុំឱ្យការឆ្លងមេរោគរីករាលដាល។
ក្រសួងសុខាភិបាលបានបញ្ជាក់ថា «រួមគ្នាប្រឆាំងភាពស៊ាំនឹងឱសថប្រឆាំងមេរោគឬថ្នាំផ្សះ។ ភាពស៊ាំនឹងឱសថប្រឆាំងមេរោគ កើតឡើងនៅពេលដែលបាក់តេរី វីរុសផ្សិត និងប៉ារ៉ាស៊ីតផ្លាស់ប្តូរទៅតាមពេលវេលា ហើយលែងឆ្លើយតបទៅនឹងឱសថប្រឆាំងមេរោគដែលយើងប្រើ។ សូមប្រើឱសថប្រឆាំងមេរោគ តាមការណែនាំរបស់គ្រូពេទ្យ ដើម្បីឱ្យឱសថទាំងនោះមានប្រសិទ្ធភាព»។
អង្គការសុខភាពពិភពលោកបានព្យាករថា បើគ្មានការសហការពហុវិស័យលើការគ្រប់គ្រងភាពស៊ាំនឹងឱសថប្រឆាំងមេរោគនោះទេ បញ្ហានេះនឹងធ្វើឱ្យមនុស្សស្លាប់រៀងរាល់ឆ្នាំ នឹងកើនឡើងដល់ ១០ លាននាក់ទូទាំងពិភពលោកនៅឆ្នាំ ២០៥០ ខណៈដែលការព្យាករបានបង្ហាញថា យ៉ាងហោចណាស់មានមនុស្សប្រមាណជាង ២៤ លាននាក់ ប្រឈមនឹងភាពក្រីក្រកាន់តែខ្លាំងនៅក្នុងឆ្នាំ ២០៣០៕
