រដ្ឋមន្ត្រីក្រសួងបរិស្ថានលោក សាយ សំអាល់ បានដឹកនាំគណៈប្រតិភូកម្ពុជាចំនួន ២០រូប មកពីអន្តរក្រសួងស្ថាប័ននានាចូលរួមពិធីបើកកិច្ចប្រជុំថ្នាក់ដឹកនាំជាន់ខ្ពស់ (High-Level Segment) នៃសន្និសីទកំពូលរដ្ឋជាភាគីលើកទី១៥។ រូបថត ក្រសួងបរិស្ថាន
ភ្នំពេញៈ រដ្ឋមន្ត្រីក្រសួងបរិស្ថានលោក សាយ សំអាល់ តំណាងលោកនាយករដ្ឋមន្រ្តី ហ៊ុន សែន បានដឹកនាំគណៈប្រតិភូកម្ពុជាចំនួន ២០រូប មកពីអន្តរក្រសួងស្ថាប័ននានាចូលរួមពិធីបើកកិច្ចប្រជុំថ្នាក់ដឹកនាំជាន់ខ្ពស់ (High-Level Segment) នៃសន្និសីទកំពូលរដ្ឋជាភាគីលើកទី១៥ នៃអនុសញ្ញាសហប្រជាជាតិស្តីពីជីវៈចម្រុះ (UNCBD COP-15)។
យោងតាមក្រសួងបរិស្ថាននៅថ្ងៃទី១៦ ខែធ្នូ នេះបានឱ្យដឹងថា កិច្ចប្រជុំនេះត្រូវបានធ្វើឡើងក្រោមប្រធានបទ «ការលើកកម្ពស់និរន្តរភាពប្រព័ន្ធអេកូឡូស៊ី៖ ការកសាងអនាគតរួមគ្នាសម្រាប់ជីវិតទាំងអស់នៅលើផែនដី" នៅទីក្រុងម៉ុងរ៉េអាល ប្រទេសកាណាដា»។
គោលបំណងនៃកិច្ចប្រជុំគឺដើម្បីធានាបាននូវការគាំទ្រកម្រិតនយោបាយពីបណ្តារដ្ឋមន្ត្រី និងថ្នាក់ដឹកនាំនៅលើពិភពលោក លើការរៀបចំ និងអនុម័តក្របខ័ណ្ឌការងារ ជីវៈចម្រុះសកល ក្រោយឆ្នាំ២០២០ (Post-2020 GBF) និងសេចក្តីសម្រេចនានារបស់សន្និសីទ UNCBD COP-15 និងពិធីសារពាក់ព័ន្ធ ដើម្បីឈានទៅសម្រេចបានតាមរបៀបវារៈឆ្នាំ២០៣០ និងចក្ខុវិស័យឆ្នាំ២០៥០ ស្តីពី«ការរស់នៅ ដោយសុខដុមរម្យនាជាមួយធម្មជាតិ»។
កិច្ចប្រជុំនេះ បានប្រព្រឹត្តទៅក្រោមអធិបតីភាពលោក Huang Runqiu រដ្ឋមន្រ្តីអេកូឡូស៊ី និងបរិស្ថាន នៃសាធារណរដ្ឋប្រជាមានិតចិន និងជាប្រធាន UNCBD COP-15 និងមានការចូលរួមពីបណ្តាថ្នាក់ដឹកនាំនៃប្រទេសជាសមាជិកទាំង១៩៣ និងអ្នកពាក់ព័ន្ធ សរុបប្រមាណជា១៨ ០០០នាក់។
ក្រៅពីនោះ លោករដ្ឋមន្ត្រីក្រសួងបរិស្ថាន ក៏បានជួបសម្តែងការគួរសមជាមួយលោក Huang Runqiu រដ្ឋមន្រ្តីអេកូឡូស៊ី និងបរិស្ថាន នៃសាធារណរដ្ឋប្រជាមានិតចិន និងជាប្រធាន UNCBD COP-15 នៅទីក្រុងម៉ុងរ៉េអាល ប្រទេសកាណាដា នោះផងដែរ៕
