.jpg)
មន្ត្រីអគ្គិសនីឡើងតបណ្ដាញខ្សែភ្លើង នៅក្នុងខេត្តព្រះសីហនុ។ ហុង មិនា
ព្រះសីហនុៈ ពលរដ្ឋប្រមាណ ១០០ គ្រួសារ រស់នៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ស្នើឱ្យអាជ្ញាធរជួយអន្តរាគមន៍ទៅអគ្គិសនីខេត្ដព្រះសីហនុ ដើម្បីជួយដោះស្រាយបញ្ហាខ្វះថាមពលអគ្គិសនី ប្រើប្រាស់ប្រចាំថ្ងៃនៅក្នុងមូលដ្ឋានរបស់ខ្លួន បន្ទាប់ពីអះអាងថា បានដាក់លិខិតចំនួន ២ ដងរួចមកហើយ ប៉ុន្តែមិនមានដំណោះស្រាយ ខណៈអគ្គិសនីខេត្ត បានអះអាងថា កំពុងសិក្សា។
ការស្នើសុំជាថ្មីនេះ បន្ទាប់ពីថ្ងៃទី ២៣ វិច្ឆិកា ប្រជាពលរដ្ឋជាង ១០០ នាក់ តំណាងឱ្យពលរដ្ឋជាង ១០០ គ្រួសារ បានផ្ដិតមេដៃរួមគ្នាក្នុងញត្តិ ដាក់ជូនប្រធានអគ្គិសនីខេត្តព្រះសីហនុជាលើកទី ២ ដើម្បីស្នើសុំភ្ជាប់ចរន្តអគ្គិសនីនៅតាមខ្នងផ្ទះរបស់ខ្លួន ដោយបានស្នើសុំទៅអាជ្ញាធរឃុំកាលពីថ្ងៃទី ១៤ វិច្ឆិកា ឆ្នាំ ២០២២ ឱ្យជួយអន្តរាគមន៍ក្នុងករណីនេះ។
អ្នកស្រី សេង ម៉េង ដែលរស់នៅក្នុងភូមិថ្មធំនេះជិត ១០ ឆ្នាំ ដោយអះអាងថា គាត់បានកាន់កាប់ដីនេះចាប់តាំងពីឆ្នាំ ១៩៩៧ ដើម្បីធ្វើស្រែចម្ការ បានប្រាប់ភ្នំពេញប៉ុស្តិ៍នៅថ្ងៃទី ១៩ ធ្នូថា ពលរដ្ឋជាង ១០០ គ្រួសារ បានដាក់សំណើទៅលោកប្រធានអគ្គិសនីខេត្តព្រះសីហនុ តាមរយៈអាជ្ញាធរមេឃុំរាមចំនួន ២ លើករួចមកហើយ ដើម្បីសុំភ្ជាប់ចរន្តអគ្គិសនី។
អ្នកស្រីបានឱ្យដឹងបន្តថា ប្រជាពលរដ្ឋប្រមាណ ១០០ គ្រួសារ រស់នៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ត្រង់ចំណុចខាងកើត មហាវិថីរាម នៅមិនទាន់មានបង្គោលភ្លើង រត់ទៅដល់ទីលំនៅរបស់ពួកខ្លួននៅឡើយទេ ខណៈ សព្វថ្ងៃ ពលរដ្ឋ បានតបណ្តាញភ្លើង ដោយអូសខ្សែចេញពីផ្លូវជាតិលេខ ៤៥ ដែលមានចម្ងាយឆ្ងាយ ដើម្បីប្រើប្រាស់រួមគ្នា ដែលធ្វើឱ្យចរន្តអគ្គិសនីប្រើប្រាស់មិនគ្រប់គ្រាន់។
អ្នកស្រីបានបញ្ជាក់ថា៖ «ការប្រើប្រាស់ចរន្ដនៅតំបន់នោះមានការរអាក់រអួល (ដាច់ភ្លើងញឹក) ដែលធ្វើឱ្យសម្ភារបរិក្ខារប្រើប្រាស់អគ្គិសនីរបស់ពួកខ្ញុំខូចញឹកញាប់ ពេលខ្លះរកតែប្រើទូទឹកកក ១ មិនបានផង។ ដូចផ្ទះខ្ញុំ បើកអាជីវកម្ម ដល់ពេលបើកដាច់ៗ ខូចសម្ភារស្ទើររាល់ថ្ងៃ។ ខ្ញុំសំណូមពរសុំមេត្តាជួយបោះបង្គោលភ្ជាប់ចរន្តអគ្គិសនី និងតភ្ជាប់ឱ្យទៅដល់ទីលំនៅរបស់ខ្ញុំ ដើម្បីបានភ្លើងប្រើប្រាស់គ្រប់គ្រាន់ផង»។
លោក សោ លីម ប្រធានអគ្គិសនីខេត្តព្រះសីហនុ បានប្រាប់ភ្នំពេញប៉ុស្តិ៍ថា អគ្គិសនីខេត្តបានចាត់មន្ត្រីឱ្យចុះសិក្សានៅក្នុងតំបន់នោះហើយ ដើម្បីធ្វើរបាយការណ៍ដាក់ស្នើបន្តទៅអាជ្ញាធរស្រុក មុននឹងធ្វើការចុះតភ្ជាប់ចរន្តអគ្គិសនីជូនពលរដ្ឋ។
លោកអះអាងបន្តថា ការដែលមានភាពយឺតយ៉ាវក្នុងការផ្តល់ជូនពលរដ្ឋ ដោយសារតែប្រជាពលរដ្ឋរស់នៅតំបន់នោះ មិនទាន់មានឯកសារបញ្ជាក់អត្តសញ្ញាណត្រឹមត្រូវ ខណៈដីដែលពលរដ្ឋកាន់កាប់ គឺពុំទាន់មានកម្មសិទ្ធិច្បាស់លាស់ទេ។
លោក សោ លីម បានបញ្ជាក់ទៀតថា អគ្គិសនីខេត្ត គ្រោងនឹងដាក់សំណើទៅអាជ្ញាធរខេត្ត ដើម្បីសុំការអនុញ្ញាត និងពិនិត្យសំណើរបស់ពលរដ្ឋក្នុងការតភ្ជាប់ចរន្តអគ្គិសនីប្រើប្រាស់ បន្ទាប់ពីក្រុមការងារ បានបញ្ចប់ការសិក្សានៅក្នុងតំបន់នេះចប់រួចរាល់។
លោកបានបញ្ជាក់ថា៖ «បើអតិថិជនយើងមានកម្មសិទ្ធិដីធ្លីជាក់លាក់ អត្តសញ្ញាណប័ណ្ណ សៀវភៅគ្រួសារ និងមានទីលំនៅត្រឹមត្រូវស្របច្បាប់ ខាងខ្ញុំមិនបាច់ទាក់ទងទៅអាជ្ញាធរទេ គឺខាងខ្ញុំចុះសិក្សាហើយ និងតភ្ជាប់ជូនគាត់ភ្លាមហើយ។ ប៉ុន្តែទីនេះ អតិថិជនយើងមួយចំនួន ពេលសួរទៅ គាត់អត់មានកម្មសិទ្ធិដីធ្លីពិតប្រាកដ អត់លិខិតបញ្ជាក់ជូនផង។អ៊ីចឹង ខាងខ្ញុំ ត្រូវការការបញ្ជាក់ពីអាជ្ញាធរដែនដីជាមុនសិនថា ទីតាំងនេះ អាចឱ្យខ្ញុំធ្វើការពង្រីកបណ្តាញបានអត់?»។
លោក សោ លីម និងពលរដ្ឋ បាននិយាយដូចគ្នាថា ក្នុងតំបន់ដែលពលរដ្ឋរស់នៅ គឺមានបង្គោលភ្លើងរួចជាស្រេចហើយ ដោយគ្រាន់តែការតចូលទៅកាន់ផ្ទះពលរដ្ឋនីមួយៗ គឺមានចម្ងាយឆ្ងាយ ដែលទាមទារ ឱ្យមានការបង្កើតបង្គោលភ្លើងថ្មីបន្ថែម ដើម្បីងាយស្រួលរត់ខ្សែចូលទៅកាន់ខ្នងផ្ទះពលរដ្ឋនីមួយៗ។
លោក អ៊ី ធារិន អភិបាលស្រុកព្រៃនប់ បានអះអាងថា លោកនឹងពិនិត្យលើករណីនេះ រួមទាំងសំណើដែលពលរដ្ឋបានស្នើមក ដើម្បីបានចរន្តអគ្គិសនីប្រើប្រាស់ជូនពលរដ្ឋ ក្រោយទទួលបានលិខិតជាផ្លូវការពីអគ្គិសនីខេត្ត ដើម្បីសិក្សា និងស្វែងរកដំណោះស្រាយជូនពលរដ្ឋ។ យ៉ាងណា លោកគាំទ្រឱ្យពលរដ្ឋនៅក្នុងខេត្តអាចទទួលបានចរន្តអគ្គិសនីប្រើប្រាស់គ្រប់គ្នា។
លោកបានបញ្ជាក់ថា៖ «ករណីនេះ ខាងរដ្ឋបាលឃុំ បានដាក់ទៅផ្ទាល់ជាមួយអគ្គិសនីតើ ទាល់តែអគ្គិសនីគាត់ សុំប្រជុំពិភាក្សាជាមួយស្រុកសិន។ ខ្ញុំមិនយល់ដែរ? តែសម្រាប់ប្រជាពលរដ្ឋយើងគាំទ្រគាត់ឱ្យមានភ្លើងប្រើអាហ្នឹងវាអ៊ីចឹង ហើយការពិនិត្យយ៉ាងម៉េច ទាល់តែមានឯកសារដាក់មកស្រុក នេះមិនឃើញផង»។
លោក លីម ថ្លែងថា បច្ចុប្បន្ន ពលរដ្ឋរស់នៅក្នុងខេត្តព្រះសីហនុទាំងមូល គឺទទួលបានចរន្តអគ្កិសនីប្រើប្រាស់ស្ទើរគ្រប់ខ្នងផ្ទះ ឱ្យតែពលរដ្ឋរស់នៅដោយស្របច្បាប់លើទីតាំងដីដែលមានការកាន់កាប់ត្រឹមត្រូវ ខណៈពលរដ្ឋមួយចំនួន ដែលមិនទទួលបានចរន្តអគ្គិសនីប្រើប្រាស់ ក៏ព្រោះតែពួកគេភាគច្រើន គឺរស់នៅលើដីដែលមិនស្របច្បាប់៕
