​សៀមរាបៈ​​យុវជន​ជិត​២០០​នាក់​ បាន​ចូលរួម​បោះជំរំ​យុវជន​ជា​សកល​លើក​ទី​៨ ឆ្នាំ​២០២២ ​ក្នុង​ទីតាំង​បោះ​ជំរំ​ស្ថិត​នៅ​ស្រុក​បន្ទាយ​ស្រី ខេត្ត​សៀម​រាប​ រយៈពេល​៦​ថ្ងៃ ខណៈ​ពួកគេ​បានរួម​គ្នា​ធ្វើ​សមាធិ​ និង​បង្កើត​សកម្មភាព​ផ្សេងៗ​មួយចំនួន​ក្នុងការ​ចែករំលែក​ចំណេះដឹង និង​កម្សាន្ត​។

​

​ការបោះ​ជំរំ​យុវជន​ជា​សកល​លើក​ទី​៨​នេះ គឺធ្វើឡើង​ក្រោម​ប្រធានបទ «​ការអភិវឌ្ឍ​យុវជន​ក្នុងសង្គម​ឌីជីថល​៖​តារា​រះ​នា​ទិសឧត្តរ (Youth Development in the Digital Society: The Rising star in the North)» ដោយ​ប្រព្រឹត្តទៅ​ចាប់ពី​ថ្ងៃទី​១៩ ដល់ ២៤ ខែធ្នូ ឆ្នាំ​២០២២​។

​កម្មវិធី​នេះ មានការ​ចូលរួម​ពី​យុវជន​មកពី​គ្រប់​២៥រាជធានី​ខេត្ត ​សរុប​ចំនួន១៨៣​នាក់ ក្រោម​កិច្ចសហការ​រៀបចំ​ពី​គណៈកម្មការ​អន្តរក្រសួង និង​រដ្ឋបាល​ខេត្តសៀមរាប ក្នុងនោះ​យុវជន​ជា​ប្រតិភូ​ចំនួន​១៥៣​នាក់(​ស្រី ៧០%) យុវជន​ស្ម័គ្រចិត្ត៣០​នាក់ មន្ត្រី​សម្របសម្រួល និង​ថ្នាក់ដឹកនាំ​អគ្គនាយកដ្ឋាន​យុវជន៥០​រូប និង​សមាជិក​គណៈកម្មការ​អន្តរក្រសួង​ចំនួន​១១រូប​។​

​ទំព័រ​ហ្វេ​ស​ប៊ុ​ករ​បស់ជំរំ​យុវជន​ជា​សកលបានឱ្យដឹង​ជា​បន្តបន្ទាប់​ថា យុវជន​ក្នុង​បរិបទ​ឌីជីថល​៖ តារា​រះ​នា​ទិសឧត្តរ គឺជា​ប្រធានបទ​ការបោះ​ជំរំ​យុវជន​ជា​សកល​លើក​ទី​៨ ខណៈ​កម្មវិធី​បានរៀបចំ​បាឋកថា​មួយចំនួន ដោយ​ក្នុងនោះ បាឋកថា អំពី​ការ​ឈ្វេងយល់​អំពី​អនុវិស័យ​ការអភិវឌ្ឍយុវជន (Understanding of Youth Development Sector) ត្រូវធ្វើ​បទ​បង្ហាញ​ដោយ​លោក ចឹក លីម អគ្គនាយករង នៃ​អគ្គនាយកដ្ឋាន​យុវជន​។​

​ចំណែក​បាឋកថា ស្តីអំពី ការ​ឈ្វេងយល់​អំពី​ការអភិវឌ្ឍ​យុវជនក្នុងសង្គម​ឌីជីថល(Understanding of Youth Development in Digital Society) ត្រូវបាន​ធ្វើឡើង​ដោយ លោក សាន វ​ឌ្ឍ​នា អនុរដ្ឋលេខាធិការនៃ​ក្រសួង​អប់រំ យុវជន និង​កីឡា ដើម្បី​ចែករំលែក​ចំណេះដឹង​ដល់​យុវជន​ដែល​បាន​ចូលរួម​។​

​ក្រៅពីនេះក៏មាន​ការ​ធ្វើបទ​បង្ហាញ​ស្តីពី រចនាសម្ព័ន្ធ និង​ការគ្រប់គ្រង​តំបន់​អង្គរ ដោយ​អ្នកជំនាញនៃ​អាជ្ញាធរ​ជាតិ​អប្សរា អំពី​កិច្ចការពារ និង​ថែរក្សា​សម្បត្តិ​វប្បធម៌​ក្នុង​តំបន់​អង្គរ និង​បទ​បង្ហាញ​ស្ដីពី​របៀប​គ្រប់គ្រង​ហិរញ្ញវត្ថុ​ប្រកបដោយ​ប្រសិទ្ធភាពដែល​ធ្វើឡើង​ដោយ​ធនាគារ​កាណាឌីយ៉ា ដែល​ជំរំ​យុវជន​ជា​សកល ជឿជាក់ថា បន្ទាប់ពី​ចប់​ជំរំ​នេះ យុវជន​នឹង​ទទួលបាន​ចំណេះដឹង​នានា ដើម្បី​ពង្រឹងសមត្ថភាព និង​អភិវឌ្ឍ​ខ្លួន​ឱ្យបាន​ល្អប្រសើរ​។​

​ជំរំ​យុវជន​ជា​សកលបាន​បញ្ជាក់ថា​«​ការ​ញាំ​អាហារ​ពេល​ល្ងាច​រួមគ្នា​ក្រោម​ពន្លឺ​ព្រះ​ចន្ទ រួមជាមួយ​អាកាសធាតុ​ត្រជាក់ៗ​បែបនេះ គឺ​ប្រាកដ​ណាស់​នឹង​អាចជួយ​រំសាយ​នូវ​រាល់​ទុក្ខ​កង្វល់​ទាំងឡាយ​របស់​អ្នកចូលរួម​គ្រប់ៗ​គ្នា​។ ជំរំ​យុវជន​ជា​សកល សង្ឃឹមថា អ្នក​ទាំងអស់គ្នា មាន​ពេលវេលា​ល្អៗ​ជាមួយគ្នា ស្វែងយល់​ពីគ្នា រៀន​ពីគ្នា​បន្ថែមទៀត ជាមួយ​យុវជន​ដទៃទៀត​ដែល​មកពី​២៥​ខេត្ត​ក្រុង​ ជុំវិញ​ប្រទេស​កម្ពុជា​»​។​

​លោកស្រី ស្រូ​យ សុជាតិ អគ្គនាយិនានៃ​អគ្គនាយកដ្ឋាន​យុវជននៃ​ក្រសួង​អប់រំ យុវជន និង​កីឡា បាន​ថ្លែងថា យុវជន​ចូលរួម​ទាំងអស់​ត្រូវ​ស្នាក់​ក្នុង​តង់ និង​ធើ្វ​សកម្មភាព​តាម​សាខា​ជំរំ​ចំនួន​៤ ក្នុងនោះ​មាន​សាខា​ជំរំ​អង្គរ សាខា​ជំរំ​បាយ័ន សាខា​ជំរំ​បន្ទាយស្រី និង​សាខា​ជំរំ​តា​ព្រហ្ម​។

​លោកស្រី បាន​បន្តថា យុវជន​ទាំងអស់​ត្រូវ​ចូលរួម​អនុវត្ត​ការងារ​តាម​កម្មវិធី​ដែលមាន​ដូចជា ការចេញដំណើរ​ពី​រាជធានី​ភ្នំពេញ ដោយ​រថយន្តក្រុង​រួមគ្នា មកដល់​ទីតាំង​ត្រូវ​បោះតង់​ដោយ​ខ្លួនឯង ចម្អិន​អាហារ​ដោយ​ខ្លួនឯង ការសិក្សា​ពី​បទបញ្ជាផ្ទៃក្នុង​នៃ​កម្មវិធី ការធ្វើ​សមាធិ ការសិក្សា​ពី​ការត្រៀមខ្លួន​រស់នៅក្នុង​សង្គម​ឌីជីថល​។​

​លោកស្រី បាន​បញ្ជាក់ថា​៖ «​ក្រុមយុវជន​ទាំងនេះ​ក៏មាន​ការសិក្សា​លើ​ការប្រើប្រាស់​ហិរញ្ញវត្ថុ​ប្រកបដោយ​ប្រសិទ្ធភាព រចនាសម្ព័ន្ធ ​និង​ការគ្រប់គ្រង​តំបន់​អង្គរ ការតម្រង់ទិស​សម្រាប់​ការប្រកួត​ថត​វីដេអូ​ផ្សព្វផ្សាយ​តារា​រះ​នា​ទិសឧត្តរ ការស្វែងយល់​ពី​ការអភិវឌ្ឍ និង​ការរស់នៅ​របស់​អ្នកស្រុក​បន្ទាយស្រី ស្វែងយល់​ពី​ជីវភាព​រស់នៅ​របស់​វីរ​កងទ័ព ការស្វែងយល់​ពី​តម្លៃ​សម្បត្តិ​បេតិកភណ្ឌ​ខ្មែរ អន្តរសកម្មភាព​នៅក្នុង​ម​ជ្ឈ​ម​ណ្ឌល​ជាតិ​យុវជន​កម្ពុជា និង​នំ​បញ្ចុក​សន្តិភាព ជាដើម​»​។

​ប្រតិភូ​យុវជន​តាម​ក្រុម​នីមួយៗ​ត្រូវយក​វីដេអូ​ខ្លី​របស់ខ្លួន​មក​ប្រកួតប្រជែងដើម្បី​ទទួលបាន​ជយលាភី​ពី​គណៈកម្មការ​រៀបចំ​។ក្រៅពីនេះ ប្រតិភូ​យុវជន​ចូលរួម​ចំនួន​១៥៣​នាក់ ត្រូវបាន​ជ្រើសរើស​ពី​គ្រប់​រាជធានី ខេត្ត និង​មកពី កាកបាទក្រហមកម្ពុជា កាយ​រឹ​ទិ្ធ​ជាតិ​កម្ពុជា សហភាព​សហព័ន្ធ​យុវជន​កម្ពុជា វិទ្យាស្ថាន​ជាតិ​អប់រំ​កាយ​ និង​កីឡា យុវជន​មូស្លីម មជ្ឈមណ្ឌល​ជាតិ​យុវជន​កម្ពុជា និង​ក្រុមយុវជន​ជយលាភី​កម្មវិធី​នានា​របស់​អគ្គនាយកដ្ឋាន​យុវជន​។ នេះ​ជាការ​រៀបរាប់​របស់លោក​ស្រី ស្រូ​យ សុជាតិ​។​

​លោកស្រី រំពឹងថា បន្ទាប់ពី​បាន​ចូលរួម​ក្នុងការ​បោះជំរំ​យុវជន​ជា​សកល​លើក​ទី​៨ ក្រោម​ប្រធានបទ​នេះហើយ​ យុវជន​ចូលរួម និង​យុវជន​អ្នកស្ម័គ្រចិត្ត នឹងមាន​ការកែប្រែ​ឥរិយាបថ ការគិត​បែប​វិជ្ជមាន និង​អភិវឌ្ឍ​សមត្ថភាព ដូចជា​ជំនាញ​វិទ្យាសាស្ត្រ​ច្នៃប្រឌិត ការបង្កើត​គំនិត​ថ្មី និង​សិល្បៈ​រចនាប័ទ្ម​តាមបែប​ឌីជីថល​ជំនាញ​ព័ត៌មាន​សង្គម ការផ្សព្វផ្សាយ និង​សុវត្ថិភាព​នៃ​ការប្រើប្រាស់​ព័ត៌មាន​សង្គម​ រួមទាំង​មាន​ជំនាញ​ភាពជា​អ្នកដឹកនាំ ក្នុងការ​បង្កើត​គម្រោង​ក្នុង​សហគមន៍ ហើយ​ និង​ជំនាញ​សិក្សា​តាម​ប្រព័ន្ធ​ឌីជីថល និង​ចំណេះដឹង​ក្នុង​បរិបទ​ឧស្សាហកម្ម ៤.០​។​

​លោកស្រី បញ្ជាក់ថា​៖ «​ដោយសារ​ការប្រែប្រួល​អាកាសធាតុ សម្ពាធ​ទាប​នាពេល​រាត្រី​ ត្រូវបាន​កំណត់​ជា​បញ្ហា និង​ជា​កត្តា​ប្រឈម​សម្រាប់​កម្មវិធី ដោយហេតុថា​សមាជិក​ស​មា​ជិ​កានៃ​កម្មវិធី​តម្រូវ​ឱ្យ​ស្នាក់នៅ​ក្នុង​តង់ ឱ្យ​សមស្រប​ទៅនឹង​គណៈ​បច្ចេកទេស និង​ក្បួនខ្នាត​សម្រាប់​កម្មវិធី​ការបោះ​ជំរំ​»​។

​ជំរំ​យុវជន​ជា​សកល​លើក​ទី​៨បានជ្រើសរើស​ស្រុក​បន្ទាយស្រីជាទី​តាំង​សម្រាប់​ការរៀបចំ​កម្មវិធីដោយសារតែ​ពិនិត្យឃើញ​ថា ទីតាំង​នេះ មាន​ភាពអនុគ្រោះ​លើ​ទីតាំង​ការបោះ​ជំរំ មាន​ទីតាំងនៅ​ជើងភ្នំ​គូលែន និង​មាន​ទីធ្លា​ធំ​ទូលាយ​លើ​ផ្ទៃដី​ប្រមាណ​ជាង៣០​ហិកតាដែលបង្ក​លក្ខណៈ​ងាយស្រួល​ចំពោះ​បច្ចេក​សម្រាប់​ការបោះ​ជំរំ និង​អនុ​កម្មវិធី​នានា​។

​បន្ថែម​ពីនេះ ស្រុក​បន្ទាយស្រី ក៏​ជា​ស្រុក​មួយ ក្នុងចំណោម​ស្រុក​ចំនួន​១២របស់​ខេត្តសៀមរាប ដែល​ត្រូវបាន​ដាក់ឈ្មោះ​ទៅតាម​ប្រាង្គ​ប្រាសាទ​ដ៏​តូច​ត្រ​ឡឹង និង​ល្អ​ឯក​លើ​សិល្បៈ​លម្អ​ប្រាសាទ និង​សម្គាល់ថា ជា​ស្រុក​ដែលមាន​បរិស្ថាន ធម្មជាតិ​ល្អ និង​ការរៀបចំ​ប្រកបដោយ​ភាព​ទាក់ទាញ និង​មួយវិញទៀត​ប្រជាពលរដ្ឋ​ស្រុក​បន្ទាយស្រី មាន​ភាព​រួសរាយ​រាក់ទាក់ និង​ស្នាមញញឹម​។​

​លោកស្រីបាន​បន្ថែមថា​៖«​ដោយបាន​ឃើញ​អំពី​កេរ្តិ៍ឈ្មោះ សក្តានុពល និង​គុណ​តម្លៃ និង​ភាពងាយស្រួល​ទាំងនេះហើយទើប​គណៈកម្មការ​ប្រតិបត្តិ​របស់​គណៈកម្មការ​អន្តរក្រសួង​សម្រាប់​ការបោះ​ជំរំ​យុវជន​ជា​សកល បានសម្រេច​ជ្រើសរើស ស្រុក​បន្ទាយស្រី នៃ​ខេត្តសៀមរាប​នេះ​»​។

​

​យុវជន ដន ដា ជា​វិស្វករ​ផ្នែក​ទឹក រស់នៅ​រាជធានី​ភ្នំពេញ ដែល​បាន​ចូលរួម​ក្នុងការ​បោះជំរំ​នេះ​ជា​លើកដំបូង បាន​និយាយថា កម្មវិធី​មួយ​នេះ ពិតជា​មាន​សាៈ​សំខាន់​សម្រាប់​យុវជន ដោយសារតែ​កម្មវិធី​មួយ​នេះ​បានធ្វើឱ្យ​យុវជន​២៥​ខេត្ត​ក្រុង បាន​ស្គាល់គ្នា និង​បង្រៀន​ពួកគេ​ឱ្យ​យល់​អំពី​របៀបរបប​នៃ​ការរស់នៅ​របស់​មនុស្ស​ផ្សេងគ្នា​។

​យុវជន​រូបនេះ បាន​បន្តថា ​ម្យ៉ាងវិញទៀត កម្មវិធី​មួយ​នេះ​មិន​ត្រឹមតែ​ទៅ​សម្រាប់តែ​បោះតង់​ប៉ុណ្ណោះ​ទេ គឹ​យើង​មានការ​បង្រៀន​អំពី​ប្រធានបទ​មួយ​ច្បាស់ ដោយមាន​លោកគ្រូ​អ្នកគ្រូ​មានចំណេះ​ច្បាស់លាស់ ដែល​ផ្តល់​ទាំង​ចំណេះដឹង និង​ការរួបរួម​។

​យុវជន​នេះ បាន​បញ្ជាក់ថា​៖«​ចំពោះ​រូបខ្ញុំ​ផ្ទាល់ ខ្ញុំ​មាន​អារម្មណ៍​សប្បាយចិត្ត ពីព្រោះ​កម្មវិធី​មួយ​នេះ​បានធ្វើឱ្យ​ខ្ញុំ​ស្គាល់​យុវជន​ផ្សេងទៀត​ដែល​មកពី​២៥​ខេត្ត​ក្រុងដែល​មិនដែល​ស្គាល់គ្នា​សោះ​ហើយ​មក​រស់នៅ​ជាមួយគ្នា​ចំនួន​៦​ថ្ងៃ​។ លើសពីនេះទៅទៀត​វា​ធ្វើឱ្យ​ខ្ញុំ​អាច​បង្កើន​នូវ​ការប្រាស្រ័យ​ទាក់ទង​ជាមួយ​មនុស្ស​ដទៃ និងបាន​ស្វែងយល់​ពី​ការគិត​របស់​មនុស្ស ដើម្បី​សម្រប​ខ្លួន​ជាមួយ​ពួកគាត់​»​។

​លោក ប៉ា ចន្ទ​រឿន ប្រធាន​វិទ្យាស្ថាន​ប្រជាធិបតេយ្យ​កម្ពុជា ក៏បាន​ថ្លែងថា នេះ​ជា​ឱកាស​មួយ​ដ៏​ល្អ​សម្រាប់​យុវជន ដែលមាន​ការរៀប​ចំប​ណ្ដុះ​បណ្ដាល និង​ការ​បោះជំរំ ហើយនឹង​ធ្វើឱ្យ​យុវជន បាន​សិក្សា​រៀនសូត្រ ស្វែងយល់​ប្រធានបទ​ណាមួយ ទោះ​ជាមាន​ចំនួន​តិចក្ដី ច្រើនក្ដី​ក៏ដោយ ក៏​វា​ជា​ប្រយោជន៍​សម្រាប់​យុវជន​។​

​លោកបាន​បញ្ជាក់ថា​៖«​ខ្ញុំ​គិតថា​ ក្រសួង​អប់រំ និង​ភាគី​ពាក់ព័ន្ធ​គួរតែយកចិត្តទុកដាក់​បន្ថែ​ម និង​ប​ញ្ចូល​ប្រធានបទ​ទាំងនេះ ដាក់ចូល​ក្នុង​វគ្គ​បណ្ដុះបណ្ដាល ឬ​ការបោះ​ជំរំ​ជាដើម ដើម្បី​លើកកម្ពស់​នូវ​ការយល់ដឹង​របស់​យុវជន អំពី​សារៈសំខាន់​នៃ​ការចូលរួម​សកម្មភាព​សង្គម និង​នយោបាយ​»​។​

​ការបោះ​ជំរំ​យុវជន​ជា​សកលគឺជា​គំនិត​ផ្តួចផ្តើម​របស់លោក​នាយក​រដ្ឋមន្ត្រី ហ៊ុន សែន ហើយ​គណៈកម្មការ​រៀប​ចំ​កម្មវិធី​ការបោះ​ជំរំ​យុវជន​ជា​សកលត្រូវបាន​រៀបចំ​តាម​សេចក្តីសម្រេច​ស្តីពី​ការបង្កើត​គណៈកម្មការ​អន្តរក្រសួង​របស់​រាជ​រដ្ឋាភិបាលកាលពី​ឆ្នាំ​២០១៧ដឹកនាំ​ដោយ​ក្រសួង​អប់រំ យុវជន និង​កីឡា ខណៈ​ការ​បោះជំរំ​យុវជន​ជា​សកល បានចាប់ផ្តើម​ពី​ឆ្នាំ​២០១០៕

​