.jpg)
សន្និសីទកាសែតរបស់សហភាពសហព័ន្ធយុវជនកម្ពុជា នៅថ្ងៃទី២០ខែធ្នូ។ រូបថត យូសុះ អាប់ឌុល រ៉ាស់ហ៊ីម
ភ្នំពេញៈលោក សុខ សប្បាយណា ប្រធានលេខាធិការដ្ឋានប្រតិបត្តិនៃព្រឹត្តិការណ៍អង្គរសង្រ្កាន្តបានឱ្យដឹងថា កម្ពុជាគ្រោងបំបែកឯតទគ្គកម្មពិភពលោកចំនួន២បន្ថែមទៀត ក្នុងព្រឹត្តិការណ៍អង្គរសង្ក្រាន្តឆ្នាំ ២០២៣ ខាងមុខ ប៉ុន្តែ លោកនៅមិនទាន់បញ្ជាក់លម្អិតនៅឡើយទេ ចំពោះឯតទគ្គកម្មទាំង ២ នោះ គឺជាអ្វីខ្លះ ដោយលោកថា នឹងជូនព័រមានលម្អិតនៅពេលក្រោយ។
លោក សុខ សប្បាយណា បានឱ្យដឹងបែបនេះក្នុងសន្និសីទសារព័ត៌មានស្តីពីការត្រៀមរៀបចំខួប ១០ ឆ្នាំ នៃព្រឹត្តិការណ៍អង្គរសង្ក្រាន្តឆ្នាំ ២០២៣ ក្រោមប្រធានបទ «ក្តីស្រមៃ និងក្តីសង្ឃឹម» ដែលធ្វើនៅមជ្ឈមណ្ឌលម៉ានី អគារ The Kampus នៅរសៀលថ្ងៃទី ២០ ខែធ្នូ។
លោកថ្លែងថា៖«យើងគ្រោងនឹងបំបែកឯតទគ្គកម្មពិភពលោកចំនួន២ តែខ្ញុំសូមមិនទាន់បញ្ជាក់ឱ្យបានលម្អិត ថាតើបំបែកឯតទគ្គកម្មពិភពលោកអ្វីខ្លះទេ។ ត្រង់ហ្នឹងខ្ញុំសូមជូនជាព័ត៌មានលម្អិត នៅពេលក្រោយ»។
លោកឱ្យដឹងទៀតថា កាលពីឆ្នាំ ២០១៥ តាមរយៈព្រឹត្តិការណ៍អង្គរសង្ក្រាន្ត កម្ពុជាបានបំបែកឯតទគ្គកម្មចំនួន២ គឺ ទី១ អន្សមយក្សមានទម្ងន់ ៤ ០៤០ គីឡូក្រាម ជាមួយសមាគមចុងភៅកម្ពុជា ចំណែកទី២ គឺបំបែកឯតទគ្គកម្មរាំចង្វាក់ម៉ាឌីហ្សន់ មានអ្នកចូលរួមចំនួន ២ ០១៥នាក់។
លោក សុខ សប្បាយណា បានឱ្យដឹងបន្ថែមទៀតថា អង្គរសង្ក្រាន្តឆ្នាំ ២០២៣ ខុសប្លែកពីមុន ធំជាងមុន ការរៀបចំច្នៃប្រឌិតល្អស្អាតជាងមុន និងពង្រីកកម្មវិធីពី ១១ កម្មវិធីធំៗ រហូតទៅដល់ ៣៤ កម្មវិធីធំៗ ហើយជាពិសេសឧបករណ៍យក្សដែលធ្លាប់បានដាក់បង្ហាញនៅក្នុងព្រឹត្តិការណ៍អង្គរសង្ក្រាន្តលើកមុនៗក៏នឹងប្រមូលផ្តុំយកមកដាក់បង្ហាញជាមួយគ្នាផងដែរ ក្នុងនោះមាន អុកយក្ស ព្រះភ័ក្រហនុមាន ចាប៉ីដងវែង អន្សមយក្ស ទាញព្រ័ត្រយក្សជាដើម។
នៅក្នុងសន្និសីទសារព័ត៌មាននោះដែរ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងថា ក្នុងឯតទគ្គកម្មទាំង២ ដែលកម្ពុជាចង់បំបែកនេះគឺត្រូវការការចូលរួមជាច្រើន។
លោកបានលើកជាឧទាហរណ៍ថា កាលពីធ្វើអន្សមយក្សគឺពឹងផ្អែកទាំងស្រុងទៅលើសមាគមចុងភៅកម្ពុជា ដែលមានជាគំនិត ហើយបានផ្តល់ឱ្យសម្រាប់ការដឹកនាំអនុវត្ត ហេតុនេះអ្នកដែលអាចចំហុយអន្សមយក្សបានមានតែសមាគមចុងភៅ ហេតុនេះការបំបែកឯតទគ្គកម្មថ្មី ២ទៀតនេះ ក៏នឹងត្រូវការអ្នកចូលរួមច្រើនដូចគ្នា។
លោកថ្លែងថា៖«អ្វីដែលអាចបើកបានដើម្បីឈានជាព័ត៌មានថា បំបែកឯតទគ្គកម្មនេះ គឺត្រូវការការចូលរួម ហើយនឹងអាចចូលរួម ទាំងអស់គ្នាតែម្តង ថាតើចូលរួមរបៀបម៉េច យើងនឹងផ្សព្វផ្សាយឱ្យបានទូលំទូលាយនៅពេលក្រោយ»។
លោកបានលើកឡើងថា ប្រធានបទសម្រាប់ ព្រឹត្តិការណ៍អង្គរសង្ក្រាន្តនាឆ្នាំ២០២៣គឺជា «ក្ដីស្រមៃ និងក្ដីសង្ឃឹម» ដែលមានន័យថា ការផ្សារភ្ជាប់នូវក្តីស្រមៃ ជាមួយក្តីសង្ឃឹម ប្រកបដោយភាពជឿជាក់របស់ប្រជាពលរដ្ឋខ្មែរគ្រប់ៗរូបក្នុងដំណើរឆ្ពោះទៅកាន់ភាពសុខក្សេមក្សាន្ត មោទនភាពជាតិ ភាពរុងរឿង និងភាពរីកចម្រើន វិបុលភាព និងភាពធន់នៃប្រជាជាតិកម្ពុជា ជាមួយអរិយធម៌ដែលខ្ពង់ខ្ពស់ឆើតឆាយ។
ក្នុងន័យនេះ ប្រធានបទនេះ បានផ្សារភ្ជាប់ជាមួយនឹងគោលគំនិត 3Cs ដែលជាគោលគំនិតឆ្ពោះទៅអនាគតកម្ពុជា នៃការកសាងធនធានមនុស្សប្រកបដោយសមត្ថភាព មានភាពជាខ្មែរ និងពោរពេញដោយធម៌។ ប្រធានបទនេះ បានរំឭកឡើងពីក្ដីស្រមៃរបស់យុវជន១ក្រុមចង់រៀបចំព្រឹត្តិការណ៍ ដ៏អស្ចារ្យមួយនៅមុខប្រាសាទអង្គរ ជាពិសេសធ្វើយ៉ាងណាទាក់ទាញភ្ញៀវទេសចរមកទស្សនាប្រទេសកម្ពុជា ឱ្យបានច្រើនកុះករនារដូវបុណ្យចូលឆ្នាំខ្មែរ។
លោកហ៊ុន ម៉ានី បានលើកឡើង ថា កាលពី១០ឆ្នាំមុន មានយុវជន១ក្រុមធ្លាប់មានក្តីស្រមៃ ដោយសង្ឃឹមថា នឹងមានព្រឹត្តិការណ៍មួយដែលរៀបចំ ដោយយុវជន នៅក្នុងតំបន់នៃរមណីយដ្ឋានអង្គរ ក្នុងភាពជាខ្មែរ ទាំងរូបភាព និងខ្លឹមសារ។ បន្ទាប់ពីបានគិត ក៏បានចាប់ផ្តើមគូរ ហើយក្តីស្រមៃ និងក្តីសង្ឃឹមរបស់ក្រុមយុវជន១ក្រុមតូច ត្រូវបានរីកសុះសាយ បន្ទាប់ពីពួកគេបានដាក់គោលដៅ សិក្សា សហការគ្នា សាមគ្គីគ្នា លះបង់កម្លាំងកាយចិត្ត សមត្ថភាព បញ្ញា ស្មារតីគ្រប់សព្វបែបយ៉ាងក្នុងគោលដៅដើម្បីបុព្វហេតុជាតិមាតុភូមិតែមួយ។
លោកថ្លែងថា៖«មកទល់ពេលនេះ ព្រឹត្តិការណ៍អង្គរសង្ក្រាន្ត មិនត្រឹមតែជាព្រឹត្តិការណ៍ តែជាស្មារតីនៃការអបអរសាទរពិធីបុណ្យចូលឆ្នាំខ្មែរទូទាំងប្រទេស វប្បធម៌ខ្មែរ និងជាស្មារតីក្តីស្រឡាញ់នៃមហាក្រុមគ្រួសារខ្មែរ ហើយបានសព្វសាយទៅកាន់ពិភពលោក» ។
បើតាមលោក ហ៊ុន ម៉ានី ក្រុមការងារជឿជាក់ថា ប្រជាពលរដ្ឋខ្មែរទាំងអស់គ្រប់ទីកន្លែង នឹងចូលរួមចំណែកជាវិជ្ជមាន ដើម្បីជំរុញព្រឹត្តិការណ៍យើងនេះឱ្យកាន់តែជោគជ័យ និងពូនជ្រុំព្រឹត្តិការណ៍នេះឱ្យក្លាយជាស្មារតីជាតិជាក់ជាមិនខាន ហើយការចូលរួមនេះ នឹងរួមចំណែកកសាង និងបង្កើនទំនុកចិត្តសម្រាប់ភ្ញៀវទេសចរជាតិ និងអន្តរជាតិ ដើម្បីចូលរួម និងជះឥទ្ធិពលវិជ្ជមានដល់ការចូលរួមព្រឹត្តិការណ៍អង្គរសង្ក្រាន្ត រួមទាំងការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ៕
វីដេអូ៖
