ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់បានចេញសេចក្តីជូនដំណឹងដល់សាធារណជនស្តីពីការចាប់ផ្តើមទទួលពិសោធន៍សម្ភារសំណង់ ដើម្បីបង្កើននូវគុណភាព សុវត្ថិភាព និងការពារទ្រព្យសម្បត្តិ។
យោងតាមសេចក្តីជូនដំណឹងបានឱ្យដឹងថា ក្រសួងរៀបចំដែនដី នគរូបនីយកម្ម និងសំណង់ សូមជម្រាបជូនដល់សាធារណជនជ្រាបថា ដើម្បីពង្រឹងការអនុវត្តច្បាប់ស្តីពីសំណង់ ក្នុងគោលបំណងបង្កើននូវគុណភាព សុវត្ថិភាព ការពារទ្រព្យសម្បត្តិ និងសុខុមាលភាព របស់ម្ចាស់សំណង់ អ្នកប្រើប្រាស់សំណង់ និងសាធារណជន ក្រសួងនឹងដាក់ឱ្យដំណើរការជំហានដំបូងសម្រាប់ការ ទទួលពិសោធន៍សម្ភារសំណង់ មានដូចជា
ពិសោធន៍គុណភាពបេតុង (Concrete Strength Test) ពិសោធន៍គុណភាពដែក (Steel Strength Test) និងពិសោធន៍ និងវិភាគដី (Proctor Test, Liquid Limits Test, Sieve Analysis Test)។
ក្រសួងបានបញ្ជាក់ថា ក្រសួងគ្រោងនឹងដាក់ឱ្យដំណើរការជាជំហានបន្តបន្ទាប់នៃការពិសោធន៍លើគ្រឿងផ្គុំសំណង់ បរិក្ខារសំណង់ និងផលិតផលសំណង់ នៅពាក់កណ្ដាលឆ្នាំ២០២៣។
សាធារណជនដែលមានបំណងចង់ធ្វើពិសោធន៍ អាចទំនាក់ទំនងមកមន្ទីរពិសោធន៍ជាតិសំណង់តាមរយៈ លោកញ៉ ហេង ប្រធានមន្ទីរពិសោធន៍ជាតិសំណង់ លេខទូរស័ព្ទ ០៩២ ៥៩៥ ៤៩៥ / ០១២ ៩១៦ ៨៦៩ និង
អ៊ីមែល chhln-piseth@mlmupc.gov.kh ឬមកមន្ទីរពិសោធន៍ជាតិសំណង់ អាសយដ្ឋាន ដីឡូត៍លេខ ២០០៥ ផ្លូវលេខ ៣០៧ សង្កាត់ឈ្មួញ ខណ្ឌសែនសុខ រាជធានីភ្នំពេញ៕