ព្រះវិហារៈ សហគមន៍តំបន់ការពារធម្មជាតិចាក់អង្រែបាននិងកំពុងតែសាងសង់ជណ្តើរឈើថ្មីមួយប្រវែង ៣៧៩ ម៉ែត្រ ដើម្បីឡើងទៅលើភ្នំត្បែង ដែលការសាងសង់នេះត្រូវបានផ្តល់មូលនិធិដោយជំនួយខ្នាតតូចរបស់ UNDP។
យោងតាម ព្រៃឡង់បៃតង (USAID Greening Prey Lang)បានឱ្យដឹងថា ជណ្តើរថ្មីត្រូវសាងសង់ ដោយសារតែជណ្តើរចាស់មានភាពទ្រុឌទ្រោម ដែលធ្វើឱ្យអ្នកទេសចរពិបាកឡើងភ្នំដ៏ចោតនោះ។ ការសាងសង់នេះធ្វើតាមគំរូជណ្តើរដែលបានសាងសង់នៅភ្នំជម្រកសត្វ ក្នុងខេត្តស្ទឹងត្រែង។
សមាជិកសហគមន៍តំបន់ការពារធម្មជាតិចាក់អង្រែ បានរៀនពីគំរូជណ្តើរនេះអំឡុងពេលទស្សនកិច្ចសិក្សានៅភ្នំជម្រកសត្វ ក្រោមជំនួយរបស់UNDP។
ជណ្តើរនេះនឹងភ្ជាប់សហគមន៍តំបន់ការពារធម្មជាតិចាក់អង្រែជាមួយសហគមន៍២ផ្សេងទៀតនៅក្នុងឧទ្យានជាតិបេតិកភណ្ឌជាតិភ្នំត្បែងដែលវាបង្កើតជាផ្លូវអេកូទេសចរណ៍ដ៏ពិសេសសម្រាប់ភ្ញៀវទេសចរដើម្បីដំណើរកម្សាន្តលើភ្នំត្បែង។
ជណ្តើរឈើថ្មីនេះ នឹងអាចជួយឱ្យភ្ញៀវទេសចរឡើងទៅកាន់តំបន់ធម្មជាតិដ៏ស្រស់ស្អាតនៅលើឧទ្យានបេតិកភណ្ឌជាតិភ្នំត្បែងបានកាន់តែងាយស្រួល។ ការផ្តល់គ្រឿងបរិក្ខារ និងបទពិសោធន៍ទេសចរណ៍ល្អ នាំឱ្យភ្ញៀវទេសចរកាន់តែច្រើនមកទស្សនាសហគមន៍អេកូទេសចរណ៍។
ចំនួនភ្ញៀវទេសចរកើនឡើងក៏ជាការរារាំងដល់បទល្មើសព្រៃឈើផងដែរ ដោយសារជនល្មើសមិនអាចប្រព្រឹត្តបទល្មើសព្រៃឈើនៅកន្លែងដែលមានទេសចរនិងមគ្គុទ្ទេសសហគមន៍បាននោះទេ។ សហគមន៍មូលដ្ឋាន និងអាជ្ញាធរក៏ត្រូវបានលើកទឹកចិត្តក្នុងការទប់ស្កាត់បទល្មើសព្រៃឈើ នៅពេលដែលសកម្មភាពអេកូទេសចរណ៍ទទួលបានជោគជ័យ ដោយសារការបង្កើនប្រាក់ចំណូលដែលអេកូទេសចរណ៍ផ្តល់ដល់សហគមន៍មូលដ្ឋាន។
សហគមន៍២ផ្សេងទៀតក៏ទទួលបានជំនួយពី UNDP ក្នុងការធ្វើឱ្យប្រសើរឡើងនូវហេដ្ឋារចនាសម្ព័ន្ធអេកូទេសចរណ៍ផងដែរ។ ជំនួយរបស់UNDP បំពេញបន្ថែមទៅលើជំនួយផ្នែកបច្ចេកទេស និងអភិវឌ្ឍន៍សមត្ថភាពសហគមន៍របស់គម្រោង USAID ព្រៃឡង់បៃតង។
កាលពីឆ្នាំ ២០១៦ រដ្ឋាភិបាលបានចេញអនុក្រឹតបង្កើតតំបន់បេតិកភណ្ឌធម្មជាតិភ្នំត្បែង ដែលមានផ្ទៃដីទំហំជាង២៥ ២៦៩ហិកតា៕