ភ្នំពេញៈ នៅក្នុងរយៈពេល ២ ថ្ងៃកន្លងមកនេះ គ្រោះថ្នាក់ចរាចរណ៍ផ្លូវគោកនៅទូទាំងប្រទេសបានបណ្តាលឱ្យមានមនុស្សស្លាប់យ៉ាងហោចណាស់ចំនួន ១៣ នាក់ និងបណ្តាលឱ្យរងរបួសធ្ងន់ស្រាលចំនួន ១៦ នាក់។
ក្នុងនោះគ្រោះថ្នាក់ចរាចរណ៍ផ្លូវគោកនៅថ្ងៃទី ៣ ខែមករា បានបណ្តាលឱ្យមនុស្សស្លាប់យ៉ាងហោចណាស់ចំនួន ៦ នាក់ (ស្រី ១ នាក់) របួសធ្ងន់ចំនួន ៧ នាក់ និងរបួសស្រាលចំនួន ២ នាក់ (ស្រី១នាក់) ។ យោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសចេញដោយនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ នៅថ្ងៃទី ៣ ខែមករា បានបញ្ជាក់ថា គ្រោះថ្នាក់ដែលបង្កឱ្យមាន មនុស្សស្លាប់និងរបួសចំនួន ១៥ នាក់នេះ កើតឡើងដោយសារការប៉ះទង្គិចគ្នាចំនួន ១១ លើក។
ជាមួយគ្នានេះកាលពីថ្ងៃទី ១ ខែមករា គ្រោះថ្នាក់ចរាចរណ៍ផ្លូវគោកទូទាំងប្រទេសបានបណ្តាល ឱ្យមានមនុស្សស្លាប់យ៉ាងហោចណាស់ចំនួន ៧ នាក់ (ស្រី ១នាក់) របួសធ្ងន់ ៥ នាក់ (ស្រី ២នាក់) ។ របាយការណ៍នគរបាលបញ្ជាក់ថា គ្រោះថ្នាក់ចរាចរណ៍ដែលបង្កឱ្យមានមនុស្សស្លាប់ និងរបួសសរុបចំនួន ១២ នាក់នេះ គឺកើតឡើងដោយសារការប៉ះទង្គិចគ្នាចំនួន ១១ លើក។
នៅក្នុងថ្ងៃបុណ្យចូលឆ្នាំសកល គឺនៅថ្ងៃទី ៣១ ខែធ្នូ និងថ្ងៃទី ១ ខែមករា គ្រោះថ្នាក់ចរាចរណ៍នៅទូទាំងប្រទេសបានបណ្តាលឱ្យមនុស្សស្លាប់យ៉ាងហោចណាស់ចំនួន ១៤ នាក់ និង ៣៧ នាក់ផ្សេងទៀត បានរងរបួសធ្ងន់ និងស្រាល៕