ពោធិ៍សាត់ៈ មន្ត្រីនៃអធិការដ្ឋាននគរបាលស្រុកបាកាន កាលពីព្រឹកថ្ងៃទី៥ខែមករា បានសហការជាមួយមន្ទីរសាធារណការ និងដឹកជញ្ជូនខេត្តពោធិ៍សាត់ ចុះធ្វើការផ្សព្វផ្សាយពីគោលនយោបាយភូមិ ឃុំមានសុវត្ថិភាព ស្តីពីច្បាប់ចរាចរណ៍ផ្លូវគោក និងផលប៉ះពាល់នៃការប្រើប្រាស់នូវសារធាតុញៀន ដល់លោកគ្រូ អ្នកគ្រូ និងសិស្សានុសិស្សសរុប ១ ៧៩៤នាក់ នៅវិទ្យាល័យបាកាន។
វិទ្យាល័យបាកាន ស្ថិតនៅក្នុងភូមិក្រោលក្របី ឃុំត្រពាំងជង ស្រុកបាកាន។ ពិធីផ្សព្វផ្សាយនេះធ្វើឡើង ក្រោមអធិបតីភាពលោក ឆាំង ហាវ អនុប្រធានមន្ទីរសាធារណការ និងដឹកជញ្ជូនខេត្តពោធិ៍សាត់ ដោយមានការចូលរួមពីលោកវរសេនីយ៍ឯក នាង វុធ អធិការនគរបាលស្រុកបាកានលោកវរសេនីយ៍ទោ ចាន់ សុភី អធិការរងទទួលបន្ទុកផែនសណ្ដាប់ធ្នាប់ លោកវរសេនីយ៍ត្រី សុង គឹមសែ អធិការរងទទួលបន្ទុកផែនប្រឆាំងគ្រឿងញៀន លោកនាយ នាយរងប៉ុស្តិ៍ រដ្ឋបាលត្រពាំងជង លោកគ្រូ អ្នកគ្រូ និងសិស្សានុសិស្សសរុប ១ ៧៩៤នាក់ស្រី ៩៧៧ នាក់។
លោកវរសេនីយ៍ឯក នាង វុធ បានឱ្យដឹងថា ៖«ក្នុងការផ្សព្វផ្សាយពីគោលនយោបាយភូមិ ឃុំមានសុវត្ថិភានេះ កម្លាំងជំនាញយើងបានចែកខិត្តបណ្ណផ្សព្វផ្សាយពីស្លាកសញ្ញាចរាចរណ៍បានចំនួន៣៥៥សន្លឹក និងខិត្តប័ណ្ណស្តីពីផលប៉ះពាល់នៃការប្រើប្រាស់គ្រឿងញៀនបានចំនួន ៣១៥ សន្លឹកដល់សិស្សានុសិស្ស។
លោកអធិការបានបន្តទៀតថា ការធ្វើយុទ្ធនាការផ្សព្វផ្សាយនេះមានគោលបំណងដើម្បីកាត់បន្ថយគ្រោះថ្នាក់ចរាចរណ៍ និងការប្រើប្រាស់នូវសារធាតុគ្រឿងញៀនខុសច្បាប់ ឱ្យមកនៅកម្រិតទាប ដើម្បីធានាបាននូវសន្តិសុខ សុវត្ថិភាព និងសណ្តាប់ធ្នាប់សង្គមជូនប្រជាពលរដ្ឋឱ្យកាន់តែល្អប្រសើរ៕