.jpg)
លោក ស ខេង ថ្លែងនៅក្នុងពិធីសំណេះសំណាលជាមួយមន្ត្រីថ្នាក់ដឹកនាំកីឡា និងកីឡាករ-កីឡាការិនី។ រូបថត ឈន ណន
ភ្នំពេញៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រកាសប្តេជ្ញាចិត្តក្នុងការបន្តចាត់វិធានការ និងទប់ស្កាត់បទល្មើសជួញដូរមនុស្ស និងសម្អាតប្រាក់ក្នុងឆ្នាំថ្មី បន្ទាប់ពីមើលឃើញថា បទល្មើសទាំងនេះ នៅតែបន្តកើតមានដែលអាចនឹងបង្កហានិភ័យដល់សុខសុវត្ថិភាព និងសន្តិសុខរបស់ប្រជាពលរដ្ឋ និងប្រទេសជាតិ។
នៅក្នុងពិធីជួបសំណេះសំណាលជាមួយថ្នាក់ដឹកនាំប្រតិភូ គ្រូបង្វឹក និងកីឡាករ កីឡាការិនី ដែលទទួលបានជោគជ័យពីការប្រកួតកីឡាជាតិលើកទី៣ ឆ្នាំ ២០២២ នាថ្ងៃទី ៥ ខែមករា នៅមជ្ឈមណ្ឌលជាតិកីឡាការ៉ាតេ ក្នុងបរិវេណសាកលវិទ្យាល័យភូមិន្ទភ្នំពេញ (RUPP) លោក ស ខេង បានថ្លែងថា កម្ពុជានៅមានបញ្ហាស្មុគស្មាញជាច្រើនទៀត ដែលត្រូវបន្តដោះស្រាយ បើទោះជាកន្លងមក អាជ្ញាធរពាក់ព័ន្ធ រួមទាំងប្រជាពលរដ្ឋ បានរួមគ្នាដោះស្រាយបញ្ហាមួយចំនួន ដោយទទួលបានជោគជ័យជាបន្តបន្ទាប់ក៏ដោយ។
លោកបានថ្លែងថា៖ «សភាពការណ៍សន្តិសុខ បទល្មើសនានា ទោះបីជាមកដល់ពេលនេះ យើងរក្សាបានល្អប្រសើរ។ ប៉ុន្តែពួកឧក្រិដ្ឋជន អ្នកប្រព្រឹត្តបទល្មើស គេមិនទាន់បោះបង់ចោលនូវផែនការទុច្ចរិតរបស់ពួកគេនោះទេ។ បទល្មើសជួញដូរមនុស្សគ្រប់ទម្រង់ ដែលជាបទល្មើសមិនប្រពៃណី ហើយដែលមានបែបផែនស្មុគស្មាញ ដែលយើងត្រូវតែបន្តរួមគ្នា ដើម្បីធ្វើការងារនេះ»។
លោកបានថ្លែងបន្តថា៖ «ឥឡូវនេះ យើងបានខិតខំធ្វើកិច្ចការងារនេះនៅក្នុងឆ្នាំ ២០២២ ទទួលបានលទ្ធផលគួរជាទីគាប់ចិត្ត។ ប៉ុន្តែសួរថា យើងត្រូវផ្អាកការងារហ្នឹង បញ្ឈប់ត្រឹមនេះ ឬមួយយើងធ្វើតទៅទៀត? គឺត្រូវតែធ្វើតទៅទៀត ព្រោះដោះស្រាយមិនទាន់អស់នោះទេ គឺមានកិច្ចការជាច្រើនទៀត ដែលយើងត្រូវខិតខំប្រឹងប្រែង ដើម្បីបន្តធ្វើនៅក្នុងឆ្នាំ ២០២៣ នេះ»។
លោក ស ខេង បានថ្លែង ដោយបានណែនាំឱ្យភាគីពាក់ព័ន្ធរួមគ្នាបន្តទៀត ដើម្បីផ្សព្វផ្សាយឱ្យប្រជាពលរដ្ឋ បានយល់ដឹងអំពីបែបផែននៃការជួញដូរមនុស្ស និងបទល្មើសសម្អាតប្រាក់ ដើម្បីរួមគ្នាដោះស្រាយ ព្រោះបទល្មើសទាំងនេះ គឺជាបទល្មើសថ្មី និងមានភាពស្មុគស្មាញយ៉ាងកាចសាហាវ។
លោកបានបញ្ជាក់ថា៖ «ធ្វើយ៉ាងម៉េច ដើម្បីបានការគាំទ្រ និងការចូលរួមពីប្រជាពលរដ្ឋទាំងអស់ ហើយដើម្បីបានការគាំទ្រពីពួកគាត់ ចាំបាច់យើងត្រូវតែខិតខំ។ បទល្មើសសម្អាតប្រាក់នោះក៏ជាបទល្មើស ១ ដែលយើងត្រូវបន្តខិតខំប្រឹងប្រែង ដើម្បីដោះស្រាយបញ្ហាប្រឈមដ៏ស្មុគស្មាញនេះ ពីព្រោះថា តាមរយៈការសម្អាតប្រាក់នេះ គឺនឹងធ្វើឱ្យប៉ះពាល់ទៅដល់មុខមាត់ កិត្យានុភាពរបស់កម្ពុជាយើង»។
តាមរបាយការណ៍របស់អគ្គស្នងការដ្ឋាននគរបាលជាតិ កងរាជអាវុធហត្ថលើផ្ទៃប្រទេស និងស្នងការដ្ឋាននគរបាលរាជធានីខេត្ត បានបង្ហាញថា ក្នុងរយៈពេល ៩ ខែ ឆ្នាំ ២០២២ សមត្ថកិច្ចបានតាមដានស្រាវជ្រាវ បង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទសរុបបាន ១២២ ករណី បើធៀបនឹងរយៈពេលដូចគ្នាក្នុងឆ្នាំ ២០២១ មានចំនួន ២៦៩ ករណី ដោយថយចុះចំនួន ១៤៧ ករណី ស្មើនឹង ៥៤,៦៤ ភាគរយ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស ធ្លាប់ប្រាប់ ភ្នំពេញប៉ុស្តិ៍ ថា រាជរដ្ឋាភិបាល នៅតែបន្តការប្តេជ្ញាចិត្តខ្ពស់ប្រយុទ្ធប្រឆាំងអំពើជួញដូរមនុស្ស បើទោះជារបាយការណ៍បានបង្ហាញថា ការជួញដូរមនុស្សក្នុងប្រទេសមានការថយចុះ។ ប៉ុន្តែ លោកស្រី បានអះអាងថា ការជួញដូរមនុស្សក្នុងរូបភាពពាក់ព័ន្ធនឹងការជួញដូរជនបរទេសពីសំណាក់ជនបរទេសនៅលើទឹកដីខ្មែរ ហាក់មានការកើនឡើងទៅវិញ នៅក្នុងពេលបច្ចុប្បន្ន។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បាននិយាយថា ដើម្បីទប់ស្កាត់បទល្មើសទាំងនេះបាននៅក្នុងផ្ទៃប្រទេស ជាជំហានដំបូងអាជ្ញាធរ គួរចាត់វិធានការរាល់អំពើពុករលួយនៅក្នុងប្រទេសជាមុនសិន ព្រោះបទល្មើសទាំងនេះ គឺមានការពាក់ព័ន្ធគ្នា។ លោក បានបន្តថា បើអាចដោះស្រាយបញ្ហាអំពើពុករលួយបាន នោះបទល្មើសនានានៅក្នុងប្រទេស ក៏ត្រូវបានកាត់បន្ថយផងដែរ ព្រោះជនល្មើស ឬឧក្រិដ្ឋជនទាំងនោះ មិនអាចនៅក្រៅសំណាញ់ច្បាប់ ដោយប្រើប្រាស់អំពើពុករលួយបានទេ។
លោកបានបញ្ជាក់ថា៖ «បទល្មើសទាំងនេះ គឺមានភាពពាក់ព័ន្ធគ្នាជាមួយបទល្មើសពុករលួយ។ អ៊ីចឹងដើម្បីដោះស្រាយបញ្ហានេះ គឺយើងត្រូវមើលទៅលើទិដ្ឋភាព ១ នៃការអនុវត្តក្នុងការប្រយុទ្ធប្រឆាំងនៃអំពើពុករលួយ ដើម្បីធានាថា គ្មានការអត់ឱន គ្មានការយោគយល់ណាមួយដែលធ្វើឱ្យមានទិន្នភាព។ ចំណុចផ្តើម គឺគួរផ្តើមពីការប្រយុទ្ធប្រឆាំងអំពើពុករលួយ»។
លោក សន ជ័យ បានថ្លែងបន្តថា វិធានការដែលបានដាក់ចេញដោយរដ្ឋាភិបាល ឬក៏ក្រសួងមហាផ្ទៃក្នុងពេលនេះ នឹងត្រូវបានអនុវត្តឱ្យមានតម្លាភាព និងប្រសិទ្ធភាព ដើម្បីទប់ស្កាត់បទល្មើសដែលបន្តកើតមាន ដូចជាបទល្មើសជួញដូរមនុស្ស បទល្មើសសម្អាតប្រាក់ និងបទល្មើសគ្រឿងញៀន៕
