ភ្នំពេញៈ យុវជនប្រើប្រាស់គ្រឿងញៀនម្នាក់បានអារកសម្លាប់ខ្លួនឯង នៅចំណុចចម្ការដំឡូង ស្ថិតក្នុងក្រុមទី៥ ភូមិបុស្សដូង ឃុំបាសាក់ ស្រុករុក្ខគិរី ខេត្តបាត់ដំបង ខណៈជនសង្ស័យចំនួន ៣៨ នាក់ (ស្រី ១ នាក់) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ១៧ ករណីទូទាំងប្រទេស កាលពីថ្ងៃទី ៥ ខែមករា។
យុវជនដែលជាជនរងគ្រោះអារកសម្លាប់ខ្លួនមានឈ្មោះ រួត ចិន អាយុ ២២ ឆ្នាំ រស់នៅក្រុម ទី៥ ភូមិបុស្សដូង ឃុំបាសាក់ ស្រុករុក្ខគិរី ខេត្តបាត់ដំបង។
បើតាមផេកហ្វេសប៊ុកអគ្គស្នងការដ្ឋាននគរបាលជាតិ ជនរងគ្រោះបានអារកសម្លាប់ខ្លួនឯង នឹងកាំបិតកាប់ដំទ្បូងបណ្តាលឱ្យដាច់បំពង់កស្លាប់កាលពីវេលាម៉ោងជាង ៣ រសៀលថ្ងៃទី ៤ ខែមករា នៅចំណុចចម្ការដំឡុង។
តាមការបំភ្លឺពីសាច់ញាតិបានឱ្យដឹងថា ជនរងគ្រោះជាមនុស្សប្រើប្រាស់គ្រឿងញៀន ជាយូរមកហើយ (បែកថ្នាំ)។
កម្លាំងនគរបាលជំនាញអធិការស្រុករុក្ខគិរី សហការជាមួយគ្រូពេទ្យជំនាញ បានចុះត្រួតពិនិត្យ និងវិភាគទីកន្លែងកើតហេតុលើជនរងគ្រោះឈ្មោះ រួត ចិន ដោយរកឃើញថា ពិតជាបានអារកសម្លាប់ខ្លួនស្លាប់ពិតប្រាកដមែន។ សាកសពជនរងគ្រោះត្រូវបានប្រគល់ជូនទៅឱ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី។
ពាក់ព័ន្ធបញ្ហាគ្រឿងញៀននេះដែរកាលពីថ្ងៃទី ៥ មករា ជនសង្ស័យចំនួន ៣៨ នាក់ (ស្រី ១ នាក់) ត្រូវបានសមត្ថកិច្ចឃាត់ខ្លួនក្នុងប្រតិបត្តិការបង្ក្រាបបទល្មើសគ្រឿងញៀនចំនួន ១៧ ករណីនៅទូទាំងប្រទេស។
ក្នុងចំណោមជនសង្ស័យទាំងចំនួន ៣៨ នាក់នោះ រួមមាន ជួញដូរ ៩ ករណី ឃាត់ខ្លួន ១៤ នាក់ ដឹកជញ្ជូន រក្សាទុក ៤ ករណី ឃាត់ខ្លួន ៩ នាក់ (ស្រី ១ នាក់) បើកបរក្រោមឥទ្ធិពលគ្រឿងញៀន ១ ករណី ឃាត់ខ្លួន ៣ នាក់ និងប្រើប្រាស់ ៣ ករណី ឃាត់ខ្លួន ១២ នាក់។
វត្ថុតាងដែលចាប់យកបានសរុបក្នុងថ្ងៃទី ៥ ខែមករា រួមមាន មេតំហ្វេតាមីន (Ice) ចំនួន ១១,៧២ ក្រាម និង ៨ កញ្ចប់តូច និងមេតំហ្វេតាមីន (Wy) ចំនួន ០,២៧ក្រាម៕