.jpg)
មន្ត្រីអាជ្ញាធរពាក់ព័ន្ធ នៅក្នុងកិច្ចប្រជុំនៅរដ្ឋបាលខេត្តកណ្តាល កាលពីថ្ងៃទី ៥ មករា។ រូបថត រដ្ឋបាលខេត្តកណ្តាល
កណ្តាលៈ លោក គង់ សោភ័ណ្ឌ អភិបាលខេត្តកណ្តាល បានក្រើនរំឭកជាថ្មីទៀត ដល់អាជ្ញាធរ និងកងកម្លាំងគ្រប់លំដាប់ថ្នាក់ ត្រូវបន្តយកចិត្តទុកដាក់គ្រប់គ្រង បង្ក្រាប និងទប់ស្កាត់ល្បែងស៊ីសងខុសច្បាប់គ្រប់ប្រភេទ កុំឱ្យកើតមានក្នុងមូលដ្ឋាន និងត្រូវពង្រឹងគោលនយោបាយភូមិ-ឃុំមានសុវត្ថិភាពឱ្យមានប្រសិទ្ធភាពខ្ពស់។
បន្ថែមពីនេះ មន្ទីរដែនដីនគរូបនីយកម្ម សំណង់ និងសូរិយោដីខេត្ត និងអង្គភាពពាក់ព័ន្ធ ត្រូវខិតខំដោះស្រាយបញ្ហាដីធ្លីឱ្យអស់ក្នុងភូមិសាស្ត្រខេត្តកណ្ដាល ហើយត្រូវពន្លឿនការចេញបណ្ណកម្មសិទ្ធិដីធ្លីជាប្រព័ន្ធ ជូនប្រជាពលរដ្ឋឱ្យបានរួចរាល់ក្នុងឆ្នាំ២០២៣នេះ។
លោកគង់ សោភ័ណ្ឌ បានក្រើនរំឭកបែបនេះ នៅក្នុងកិច្ចប្រជុំគណ:អភិបាលខេត្តកណ្តាល ប្រចាំឆ្នាំ២០២២ នៅរសៀលថ្ងៃទី៥ ខែមករា ឆ្នាំ២០២៣។
បន្ថែមពីនេះ លោកអភិបាលខេត្ត បានជំរុញ និងលើកទឹកចិត្តដល់បណ្ដាមន្ទីរជុំវិញខេត្ត អាជ្ញាធរក្រុង-ស្រុក ត្រូវបន្តខិតខំបំពេញការងារ តួនាទី ភារកិច្ចរបស់ខ្លួនឱ្យកាន់តែល្អទ្វេឡើងថែមទៀតក្នុងឆ្នាំ២០២៣នេះ ដើម្បីធ្វើឱ្យខេត្តកណ្តាលកាន់តែមានការអភិវឌ្ឍ ទទួលនូវស្នាដៃ និងសមិទ្ធផលជាបន្តបន្ទាប់ទៀត។
ជាមួយគ្នានេះ លោកបានថ្លែងនូវការកោតសរសើរដល់មន្ទីរជុំវិញខេត្ត កងកម្លាំងមានសមត្ថកិច្ច អភិបាលក្រុង-ស្រុក និងមន្ត្រីទាំងអស់ ដែលបានខិតខំបំពេញតួនាទី ភារកិច្ចរបស់ខ្លួនបានយ៉ាងល្អប្រសើរក្នុងឆ្នាំ២០២២កន្លងមក ដែលធ្វើឱ្យខេត្តកណ្ដាលទទួលបានចំណាត់ថ្នាក់លេខ២ លើផ្នែកសេវាសង្គម នៅទូទាំងប្រទេស ពីក្រសួងមហាផ្ទៃ ជាពិសេសខេត្តកណ្ដាលក៏ទទួលបានជយលាភីជាខេត្តបញ្ចប់ការបន្ទោបង់ពាសវាលពាសកាល (ODF) ចំណាត់ថ្នាក់លេខ៣ ទូទាំងប្រទេសផងដែរ។
បន្ថែមពីនេះ លោកគង់ សោភ័ណ្ឌក៏បានស្នើដល់មន្ទីរជុំវិញខេត្ត អាជ្ញាធរគ្រប់លំដាប់ថ្នាក់ ត្រូវបន្តរក្សាស្នាដៃចំណាត់ថ្នាក់ល្អ លើផ្នែកសេវាសង្គម នៅទូទាំងប្រទេសជាបន្តទៀតផងដែរ៕
