.jpg)
ចិញ្ចើមផ្លូវក្នុងក្រុងបាត់ដំបង បន្ទាប់ពីអាជ្ញាធរបានរៀបចំសណ្តាប់ធ្នាប់រួច។ រូបថត រដ្ឋបាលខេត្តបាត់ដំបង
បាត់ដំបងៈ លោក សុខ លូ អភិបាលខេត្តបាត់ដំបង បានណែនាំដល់ក្រុមការងាររៀបចំសណ្ដាប់ធ្នាប់ ដែលទទួលបន្ទុកទៅតាមតំបន់នានាក្នុងខេត្តបាត់ដំបង ក៏ដូចជាចៅសង្កាត់ទាំងអស់ ត្រូវបន្តធ្វើការផ្សព្វផ្សាយ ណែនាំដល់ប្រជាពលរដ្ឋឱ្យមានការយល់ដឹង អំពីការរៀបចំសណ្ដាប់ធ្នាប់ និងគោលបំណងអំពីការរៀបចំសណ្ដាប់ធ្នាប់ ដើម្បីលើកកម្រិតសោភ័ណភាពក្រុងឱ្យកាន់តែស្រស់ស្អាត។
លោកថ្លែងថា ជាពិសេសទៅទៀតនោះអាជ្ញាធរ ត្រូវទប់ស្កាត់ការងើបឡើងវិញនូវការសាងសង់សំយ៉ាបផ្ទះ ការលក់ដូរនៅលើចិញ្ចើមផ្លូវដោយមិនត្រូវលែងដៃឡើយ ពោលគឺត្រូវធ្វើដូចភ្លៀងរលឹម និងត្រូវណែនាំដល់អាជីវករទាំងអស់ដែលដាក់តាំងលក់ទំនិញផ្សេងៗ ត្រូវរៀបចំឱ្យមានការលក់នៅខាងក្នុងផ្ទះវិញ។
លោក សុខ លូ បានធ្វើការណែនាំបែបនេះ នៅក្នុងកិច្ចប្រជុំត្រួតពិនិត្យពីវឌ្ឍនភាពការអនុវត្តការងាររៀបចំសណ្ដាប់ធ្នាប់ សោភ័ណភាព របៀបរៀបរយក្នុងក្រុងបាត់ដំបង និងនៅតំបន់ទេសចរណ៍ភ្នំសំពៅ ស្រុកបាណន់ នៅថ្ងៃទី៦ ខែមករា ឆ្នាំ២០២៣។
កិច្ចប្រជុំនេះបានធ្វើឡើងបន្ទាប់ពីអាជ្ញាធរ បានអនុវត្តការងាររៀបចំសណ្ដាប់ធ្នាប់ សោភណភាពក្នុងក្រុងបាត់ដំបងបានស្ទើររួចរាល់១០០ភាគរយ មានដូចជាការកាត់សំយ៉ាបផ្ទះ ដែលសង់លយចូលមកលើផ្លូវ និងការបញ្ឈប់ការលក់ដូរ ឬការដាក់តាំងលក់ទំនិញនៅលើចិញ្ចើមផ្លូវជាដើម។
បន្ថែមពីនេះ លោកអភិបាលខេត្តបាត់ដំបង បានណែនាំដល់អង្គភាពអគ្គិសនីខេត្ត ពិនិត្យមើល និងសិក្សាអំពីលទ្ធភាពដែលអាចដកបង្គោលភ្លើងចាស់ៗចោល ព្រោះបន្ទាប់ពីធ្វើការរៀបចំកាត់ខ្សែកាប ខ្សែអ៊ីនធឺណិតចេញអស់ហើយ គឺនៅសល់បង្គោលភ្លើងដែលនៅសល់ ហើយបើសិនជាអាចធ្វើការដកបានរដ្ឋបាលខេត្តនឹងសិក្សាអំពីការដាំដើមឈើជំនួសវិញ ដើម្បីលើកកម្រិតសោភ័ណភាពក្រុងឱ្យកាន់តែស្រស់ស្អាតថែមទៀត។
ជាមួយគ្នានេះ លោកសុខ លូ បានមានប្រសាសន៍កោតសរសើរ និងថ្លែងអំណរគុណដល់ក្រុមការងារ ដែលបានខិតខំប្រឹងប្រែងក្នុងការចុះរៀបចំសណ្ដាប់ធ្នាប់ក្នុងក្រុង ក៏ដូចជាប្រជាពលរដ្ឋដែលរស់នៅតំបន់អភិរក្សទាំងអស់ ដែលបានចូលរួមជាមួយរដ្ឋបាលខេត្តបាត់ដំបង ក្នុងការចូលរួមកាត់សំយ៉ាបផ្ទះ ការកាត់ស្លាកសញ្ញាពាណិជ្ជកម្មធំៗចេញពីខាងមុខផ្ទះរបស់ខ្លួន និងយល់ដឹងអំពីគោលបំណងនៃការរៀបចំសណ្ដាប់ធ្នាប់នេះ៕
