.jpg)
រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជាបានចូលរួមអបអរសាទរថ្ងៃជ័យជម្នះ ៧ មករា លើកទី៤៤ ឆ្នាំ (៧ មករា ១៩៧៩-៧ មករា ២០២៣) នៅមជ្ឈមណ្ឌលកោះពេជ្រ ដោយមានការអញ្ជើញចូលរួមពីមន្ត្រីជាន់ខ្ពស់ជាច្រើនរូបរបស់គណបក្សប្រជាជនកម្ពុជា និងថ្នាក់ដឹកនាំ មន្ត្រីរាជការ ស្ថាប័នតាមក្រសួងនានា ភ្ញៀវជាតិ អន្តរជាតិ មន្ត្រីអង្គទូត សិស្សានុសិស្ស និងប្រជាពលរដ្ឋរាប់ម៉ឺននាក់ផងដែរ។
ហ្វេសប៊ុករបស់លោកនាយករដ្ឋមន្ត្រីហ៊ុន សែនបានរំឭកដែរថា កាលពី៤៤មុន ប្រជាពលរដ្ឋខ្មែរគ្រប់រូប រួមទាំងកុមារតូចៗត្រូវរស់នៅក្រោមការបង្ខិតបង្ខំឱ្យធ្វើការលើសកម្លាំង គ្មានថ្ងៃឈប់សម្រាក អាហារមិនគ្រប់គ្រាន់ គ្មានមន្ទីរពេទ្យ គ្មានសាលារៀន គ្មានវត្តអារាម ហើយសិទ្ធិសេរីភាពទាំងអស់របស់ពលរដ្ឋមិនមានឡើយ។ ប៉ុន្តែក្រោយពីប្រទេសជាតិត្រូវបានរំដោះ នៅថ្ងៃទី៧ ខែមករា ឆ្នាំ១៩៧៩ ក្រោមការដឹកនាំរបស់គណបក្សប្រជាជនកម្ពុជា ប្រជាពលរដ្ឋមានសិទ្ធិសេរីភាពពេញលេញឡើងវិញ ហើយប្រទេសជាតិទាំងមូលមានសុខសន្តិភាព និងការអភិវឌ្ឍរីកចម្រើនគ្រប់វិស័យមកទល់សព្វថ្ងៃនេះ ក្រោមការដឹកនាំដ៏ឈ្លាសវៃរបស់លោកនាយករដ្ឋមន្ត្រី។
នៅថ្ងៃទី៧ខែមករានេះផងដែរ អង្គភាពអ្នកនាំពាក្យរាជរដ្ឋាភិបាលក៏បានចេញសេចក្តីថ្លែងការមួយផងដែរ នៅក្នុងឱកាសនៃ “ទិវា ៧មករា" ដោយបានសាទរ និងគុណូបការៈដ៏ខ្ពង់ខ្ពស់បំផុត ចំពោះឥស្សរជនជាវីរបុរសខ្មែរ ដែលលោកបានរំដោះប្រជាជាតិទាំងមូល រួចផុតពីរបបឃោរឃៅ សាហាវយង់ឃ្នង ផ្ដល់ឱកាសរស់រានមានជីវិតប្រកបដោយភាពរុងរឿង ក្នុងភាពជាមនុស្សដែលមានសិទ្ធិរស់រាន សិទ្ធិជ្រើសរើសស្វែងរកសុភមង្គល និងទទួលខុសត្រូវលើជោគវាសនារបស់ខ្លួន និងប្រជាជាតិ។
អង្គភាពអ្នកនាំពាក្យ យល់និងប្រាកដថា ទិវា ៧មករា គឺជាទិវាដែលមានតម្លៃជា “សកលរបស់មនុស្ស ជាតិ” សម្រាប់ការរស់រានមានជីវិតសាជាថ្មីរបស់ប្រជាពលរដ្ឋខ្មែរ ដែលយើងហៅថា “ថ្ងៃកំណើតទី ២"។ ថ្ងៃ ៧ មករា ជាស្មារតីនៃការរួបរួម ឯកភាព និរន្តរភាព និងការអភិវឌ្ឍរបស់ជាតិខ្មែរយើងទាំងមូល។
អង្គភាពអ្នកនាំពាក្យ«សូមសម្តែងនូវកតញ្ញុតាធម៌ដ៏ជ្រាលជ្រៅបំផុត និងចងចាំជានិច្ច គោរពជូនចំពោះឥស្សរជនខ្មែរ ដែលលោកមានតម្លៃជាប្រវត្តិសាស្ត្រ បានពលីជីវិត ក៏ដូចជាវត្តមានដល់បច្ចុប្បន្ន ក្នុងការរំដោះជីវិតប្រជាជនខ្មែរ ជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ដែលលោកបានលះបង់ គ្រប់បែបយ៉ាង ក្នុងបុព្វហេតុជាតិ និងផលប្រយោជន៍ខ្មែរទាំងមូល»៕
