ភ្នំពេញៈ ក្រសួងអប់រំ យុវជន និងកីឡាបានប្រកាសកម្មវិធីប្រកួតវោហារស័ព្ទជាក្រុម អំពីប្រធានបទ"ការលុបបំបាត់ការប្រើប្រាស់បារី អេឡិចត្រូនិក ដោយទទួលអត្ថបទចាប់ពីថ្ងៃជូនដំណឹងនេះ រហូតដល់ ថ្ងៃសុក្រ ទី១០ ខែកុម្ភៈ ឆ្នាំ២០២៣។
ក្រសួងបានបញ្ជាក់ថា គោលបំណងនៃកម្មវិធីនេះគឺដើម្បីផ្ដល់ឱកាសឱ្យយុវជនបញ្ចេញសមត្ថភាពក្នុងការប្រកួតវោហារស័ព្ទជាក្រុម អំពីប្រធានបទ"ការលុបបំបាត់ការប្រើប្រាស់បារី អេឡិចត្រូនិក (E-Cigarette or Vape) និងផលិតផលអេចណ៍ ធី ភី (HTPs) ដើម្បីលើកកម្ពស់សុខភាពសិក្សា និងលើកកម្ពស់ការសិក្សាស្រាវជ្រាវជាក្រុម និងសីលធម៌នៃការជជែកជាសាធារណៈ។
លក្ខខណ្ឌចូលរួមគឺយុវជនដែលមានចំណាប់អារម្មណ៍ចង់ចូលរួមប្រកួត ត្រូវបង្កើតក្រុមដែលមានចំនួន៣នាក់ ដែលយ៉ាងហោចណាស់មានបេក្ខនារីម្នាក់ផងដែរ។ បេក្ខជនត្រូវមានអាយុ១៥ឆ្នាំ ដល់២៥ឆ្នាំ (មិនមែនជាភ្នាក់ងារក្រុមហ៊ុនគ្រឿងស្រវឹងនិងថ្នាំជក់) ហើយត្រូវសរសេរអត្ថបទអំពី “ការហាមឃាត់ការប្រើប្រាស់បារីអេឡិចត្រូនិក និង ផលិតផលអេចឈី ធីភី នៅកម្ពុជា”។ អត្ថបទត្រូវប្រើទំហំ A4 ពុម្ពអក្សរ Khmer OS Siemreap (ទំហំ 12pt) និងមិនលើសពី២ទំព័រ និងផ្ញើអត្ថបទចូលរួមមកកាន់កម្មវិធីតាមរយៈ តេឡេក្រាម៖ ០៩៦ ៣១១៣ ៩៥៧/០១៦ ៤៧៩ ៤២៩/០១២ ៧២៧ ៥៣៣។
ចំពោះប្រធានបទ៖ ការហាមឃាត់ការប្រើប្រាស់បារីអេឡិចត្រូនិក និង ផលិតផលអេចឈុំ ធី ភី នៅកម្ពុជា អត្ថបទត្រូវបង្ហាញនូវចំណុចសំខាន់ៗរួមមាន៖ ការស្គាល់ និងយល់ដឹងពីបារីអេឡិចត្រូនិក និងផលិតផលអេចណ៍ ធី ភី, ផលប៉ះពាល់នៃការប្រើប្រាស់បារីអេឡិចត្រូនិក និង ផលិតផលអេចណ៍ ធី ភី, យុទ្ធសាស្ត្រផ្សព្វផ្សាយពាណិជ្ជកម្ម ចែកចាយ និងលក់ ផលិតផលបារីអេឡិចត្រូនិក និង ផលិតផលអេចណ៍ ធី ភី របស់អ្នក ផលិត និងឈ្មួញ, ដំណោះស្រាយឆ្លើយតបរបស់រាជរដ្ឋាភិបាល/ក្រសួងអប់រំ យុវជន និងកីឡា ដើម្បីលុបបំបាត់ការប្រើប្រាស់បារីអេឡិចត្រូនិក និងផលិតផលអេចណ៍ ធី ភី និង ការលើកកម្ពស់សុខភាពសិក្សានៅកម្ពុជា និងអនុសាសន៍ និងសំណូមពរ។
ជ័យលាភីលេខ១ ទទួលបាន មេដាយមាស ថវិកា៣លានរៀល និងវិញ្ញាបនបត្របញ្ជាក់ជ័យលាភី, ជ័យលាភីលេខ២ ទទួលបាន មេដាយប្រាក់ ថវិកា២លាន៤០ម៉ឺនរៀល និងវិញ្ញាបនបត្របញ្ជាក់ជ័យលាភី, ជ័យលាភីលេខ៣ ទទួលបាន មេដាយសំរឹទ្ធ ថវិកា១លាន៨០ម៉ឺនរៀល និងវិញ្ញាបនបត្របញ្ជាក់ជ័យលាភី និងរង្វាន់លើកទឹកចិត្ត ទទួលបានថវិកា៨០ម៉ឺនរៀល និង វិញ្ញាបនបត្របញ្ជាក់ការចូលរួម៕