.jpg)
កែបៈ រូបសំណាក "ព្រាប ស" ត្រង់ចំណុចផ្លូវលេខ ១៣៣៥ ចូលទៅកាន់តំបន់ភ្នំវល្លិ៍ត្រូវបានសម្ពោធនាថ្ងៃទី ៦ ខែមករានេះ ដែលរូបសំណាកនេះបញ្ជាក់អំពីតម្លៃ និងនិមិត្តរូបនៃសន្តិភាព ដែលផ្តល់ឱកាសមានការអភិវឌ្ឍប្រទេសជាតិមានការរីកចម្រើន។
រូបសំណាក "ព្រាប ស " នេះជាគំនិតផ្ដួចផ្ដើមរបស់លោកសួង ហេង រដ្ឋលេខាធិការក្រសួងសាធារណការ និងដឹកជញ្ជូននឹងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកដំណាក់ចង្អើរ និងលោកសោម ពិសិដ្ឋខេត្ត និងលោកស្រី ស ម៉ាលីដា។ សម្រាប់ការចាប់ផ្តើមដំណើរការសាងសង់រូបសំណាកនេះគឺនៅថ្ងៃទី២០ ខែមេសា ឆ្នាំ២០២២ និងបញ្ចប់ការងារសាងសង់ជាស្ថាពរ នៅថ្ងៃទី១៩ ខែធ្នូ ឆ្នាំ២០២២ កន្លងទៅនេះ ដោយចំណាយថវិកាសរុប ១៤៣០០ដុល្លារគត់។ នេះបើយោងតាមរបាយការណ៍របស់លោក ឆាង ឆៃអភិបាលស្រុកដំណាក់ចង្អើរ។
លោកសោម ពិសិដ្ឋអភិបាលខេត្តកែបបានមានប្រសាសន៍ក្នុងពិធីសម្ពោធនោះថា៖«ការសាងសង់រូបសំណាក "ព្រាបស" នៅលើទីតាំងនេះ គឺចង់បញ្ជាក់អំពីតម្លៃ និងនិមិត្តរូបនៃសន្តិភាព ដែលបង្កឱកាសឱ្យយើងទាំងអស់គ្នា អភិវឌ្ឍសហគមន៍ ក៏ដូចជាប្រទេសជាតិយើងឱ្យមានការរីកចម្រើន»។
លោកបានរំឭកថា តំបន់ភ្នំវល្លិ៍នេះធ្លាប់ជាទីតាំង សមរភូមិសង្គ្រាមដ៏ក្តៅគគុក និងជាកន្លែងលាក់ខ្លួនធ្វើសកម្មភាពរបស់កងទ័ពខ្មែរក្រហម ប៉ុន្តែក្រោមនយោបាយ ឈ្នះ ឈ្នះ របស់លោកនាយករដ្ឋមន្ត្រីហ៊ុន សែននៅឆ្នាំ១៩៩៤ កម្លាំងទ័ពខ្មែរក្រហម បានធ្វើសមាហរណកម្ម ចូលរួមជាមួយរដ្ឋាភិបាល ហើយភ្លើងសង្គ្រាមនៅទីតាំងនេះក៏បានរលត់ ប្រជាជនរស់នៅបានសុខសន្តិភាព។ បច្ចុប្បន្ន បានប្រែក្លាយជាតំបន់អភិវឌ្ឍកសិកម្មដ៏មានសក្តានុពលរបស់ខេត្តកែប។
លោកបានបន្ថែមថា រូបសំណាក" ព្រាបស" ត្រដាងស្លាប នាដើមផ្លូវលេខ១៣៣៥នេះនឹងធ្វើឱ្យអ្នកដំណើរតាមផ្លូវជាតិលេខ៣៣ ងាកមកចាប់អារម្មណ៍ទីតាំងនៃតំបន់អេកូទេសចរណ៍ និងកសិទេសចរណ៍ភ្នំវល្លិ៍ ដែលពោរពេញដោយ ទេសភាពដ៏ស្រស់បំព្រង ដែលគ្របដណ្តប់ទៅដោយដំណាំកសិកម្ម ព្រៃភ្នំដ៏ខៀវស្រងាត់ និងខ្យល់អាកាសបរិសុទ្ធ។ ទៅថ្ងៃអនាគត ទីតាំងនេះ ក៏នឹងក្លាយទៅជាតំបន់កសិឧស្សហកម្ម ផងដែរ។
លោកអភិបាលខេត្តបានបញ្ជាក់អះអាងថា លោកនឹងធ្វើការអភិវឌ្ឍហេដ្ឋារចនាសម្ព័ន្ធ តំបន់ភ្នំវល្លិ៍ឱ្យដូចជាសរសៃឈាម និងជាផ្នែកមួយនៃតំបន់ទេសចរណ៍របស់ខេត្តកែប ដែលភ្ញៀវទេសចរអាចមកលេងទឹកសមុទ្រ ញ៉ាំអាហារសមុទ្រដ៏មានឱជារស ហើយបន្តដើរកម្សាន្តអេកូទេសចរណ៍ លើខ្នងភ្នំវល្លិ៍ និងកសិទេសចរណ៍នៃតំបន់នេះថែមទៀត៕
