ភ្នំពេញៈ សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន បានបង្ក្រាបករណីជួញដូរគ្រឿងញៀនមួយដោយបានចាប់ខ្លួនជនសង្ស័យម្នាក់ និងបានរឹបអូសគ្រឿងញៀនជាង ៥ គីឡូក្រាម នៅរាជធានីភ្នំពេញ។ នេះបើយោងតាមនគរបាលប្រឆាំងគ្រឿងញៀន កាលពីថ្ងៃទី ៦ ខែមករានេះ។
នគរបាលប្រឆាំងគ្រឿងញៀន បានឱ្យដឹងថា នៅថ្ងៃទី៣ ខែមករា ឆ្នាំ ២០២៣ វេលាម៉ោង ១៩:៣០ នាទី កម្លាំងសមត្ថកិច្ចបានធ្វើការស៊ើបអង្កេតស្រាវជ្រាវ បង្រ្កាប នៅចំណុចផ្ទះជួលលេខ អេ៤៨ ផ្លូវលេខ៦ ភូមិត្រពាំងមាន សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។ ជាលទ្ធផលបានធ្វើការឃាត់ខ្លួនបុរសជាជនសង្ស័យម្នាក់កើតឆ្នាំ ១៩៨៧ ជាជនជាតិខ្មែរ។
វត្ថុតាងចាប់យកបានរួមមានថ្នាំញៀន មេតំហ្វេតាមីន (ICE) ទម្ងន់សុទ្ធ ៥ គ.ក្រ ២០៧ ក្រាម ហើយបច្ចុប្បន្នជនសង្ស័យ និងវត្ថុតាងចាប់យកខាលើ សមត្ថកិច្ចជំនាញបានកសាងសំណុំរឿង បញ្ជូនទៅសាលាដំបូងរាជធានីភ្នំពេញបន្តតាមនីតិវិធី។
ការបង្រ្កាបនេះអនុវត្តតាមបញ្ជារបស់លោក នាយឧត្ដមសេនិយ៍ នេត សាវឿន អគ្គស្នងការនគរបាលជាតិ និងលោកនាយឧត្ដមសេនីយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ពីលោកឧត្ដមសេនីយ៍ទោ ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន៕