.jpg)
លោក ថង សាវុន អភិបាលខេត្តមណ្ឌលគិរី។ រូបថត ហ្វេសប៊ុក
មណ្ឌលគិរីៈ ប្រធានក្រុមប្រឹក្សានិងអភិបាលខេត្តមណ្ឌលគិរី បានស្នើដល់ស្នងការដ្ឋាននគរបាលខេត្តបន្តខិតខំផ្តល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋ និងបន្តផ្សព្វផ្សាយជូនដល់ប្រជាពលរដ្ឋឱ្យទៅទទួលយកការចាក់វ៉ាក់សាំងការពារជំងឺកូវីដ១៩ បានគ្រប់ៗគ្នា។
យោងតាមអនុសាសន៍ណែនាំរបស់ប្រមុខរដ្ឋាភិបាល លោក ថង សាវុន អភិបាលខេត្តមណ្ឌលគិរី បានជំរុញដល់អាជ្ញាធរ និងមន្ទីរជំនាញឱ្យបន្តផ្សព្វផ្សាយជូនដល់ប្រជាពលរដ្ឋដើម្បីមកទទួលយកការចាក់វ៉ាក់សាំងការពារជំងឺកូវីដ១៩ ឱ្យបានគ្រប់ៗគ្នា។ ក្នុងនោះមានទាំងដូសជំរុញ និងអ្នកដែលមិនទាន់បានទទួលការចាក់វ៉ាក់សាំងការពារជំងឺកូវីដនូវដូសទី១ ជាពិសេស កុមារគ្រប់អាយុ ៣ឆ្នាំ សិស្សានុសិស្ស លោកគ្រូ អ្នកគ្រូ ដែលជាចំណុចងាយរងហានិភ័យនិងឱ្យបន្តយកចិត្តទុកដាក់អនុវត្តតាមវិធានការការពាររបស់ក្រសួង សុខាភិបាល។ នេះបើយោងតាមសេចក្តីប្រកាសព័ត៌មានស្តីពីលទ្ធផលកិច្ចប្រជុំសាមញ្ញលើកទី៤៣ អាណត្តិទី៣ របស់ក្រុមប្រឹក្សាខេត្តមណ្ឌលគិរី។
សេចក្តីប្រកាសរបស់រដ្ឋបាលខេត្តមណ្ឌលគិរី កាលពីថ្ងៃទី៦ ខែមករា ក៏បានឱ្យដឹងផងដែរថា លោក ម៉ុន ង៉ុយ ប្រធានក្រុមប្រឹក្សាខេត្តក៏បានសំណូមពរដល់ស្នងការដ្ឋាននគរបាលខេត្តបន្តខិតខំផ្តល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋសម្រាប់យកទៅប្រើប្រាស់ផ្សេងៗ ជាពិសេស សម្រាប់ចូលរួមការបោះឆ្នោត ជ្រើសតាំងតំណាងរាស្ត្រឆ្នាំ ២០២៣។
ឆ្លើយតបទៅនឹងបញ្ហានេះ លោក ឡោ សុខា ស្នងការនគរបាលខេត្តមណ្ឌលគិរី ក៏បានជំរុញឱ្យស្នងការរងទទួលផែនការងារ អត្តសញ្ញាណប័ណ្ណបង្កើនការយកចិត្តទុកដាក់ និងពន្លឿនការធ្វើអត្តសញ្ញាណប័ណ្ណជូនប្រជាពលរដ្ឋផងដែរ។
ក្នុងនោះរួមមានអត្តសញ្ញាណប័ណ្ណផុតសុពលភាព និងប្រជាពលរដ្ឋដែលគ្រប់អាយុត្រូវធ្វើអត្តសញ្ញាណប័ណ្ណ។ ក្រៅពីនោះ លោកក៏បានធ្វើការណែនាំថា ស្នងការរងដែលទទួលការងារនេះ ពេលចុះទៅអនុវត្តន៍ត្រូវសហការជាមួយអាជ្ញាធរដែនដី ដើម្បីជាកម្លាំងចម្រុះនិងសក្សីឬក៏ងាយស្រួលក្នុងការធ្វើរបាយការណ៍បញ្ជាក់ជូនអង្គភាពដើមវិញ ដើម្បីចៀសវាងការបដិសេធរបស់បងប្អូនប្រជាពលរដ្ឋមកលើមន្ត្រីនគរបាលថា មិនបានយកចិត្តទុកដាក់លើការធ្វើអត្តសញ្ញាណប័ណ្ណជូនពួកគាត់។
ក្រៅពីបញ្ហានោះ ក្រុមប្រឹក្សាខេត្ត បានសំណូមពរដល់មន្ទីរសុខាភិបាលឱ្យបន្តសហការជាមួយអង្គភាពអគ្គិសនីខេត្តឱ្យបានទាន់ពេលវេលា ដើម្បីតភ្ជាប់ចរន្តអគ្គិសនី នៅតាមមណ្ឌលសុខភាពចំនួនបីដែលទើបសាងសង់រួច។ ក្នុងនោះមានដូចជា មណ្ឌលសុខភាពជីមៀត មណ្ឌលសុខភាពស្រែឈូក និងមណ្ឌលសុខភាព ស្រែអំពូម ដែលពុំទាន់បានតភ្ជាប់ចរន្តអគ្គិសនីសម្រាប់ប្រើប្រាស់នៅឡើយ៕
