.jpg)
សេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត។
ភ្នំពេញៈ គណៈកម្មាធិការជាតិរៀបចំការបោះឆ្នោត នៅថ្ងៃទី ៦ ខែមករា បានប្រកាសស្តីពីការកំណត់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុង ស្រុក ដែលបំបែក និងបង្កើតថ្មី នៅថ្ងៃទី៩ ខែមេសា ឆ្នាំ ២០២៣នេះ។
សេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតបានឱ្យដឹងថា ការបោះឆ្នោតលើកទី១ ដើម្បីជ្រើសរើស ក្រុមប្រឹក្សាក្រុងអរិយក្សត្រ ក្រុងសំពៅពូន នៃខេត្តកណ្តាល ក្រុងឧដុង្គម៉ែជ័យ ស្រុក សាមគ្គីមុនីជ័យ នៃខេត្តកំពង់ស្ពឺ និងស្រុកអូរគ្រៀងសែនជ័យនៃខេត្តក្រចេះ នឹងប្រព្រឹត្តទៅនៅថ្ងៃអាទិត្យទី៩ ខែមេសា ឆ្នាំ ២០២៣។
សេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គឺយោងទៅតាមសេចក្តីសម្រេចរបស់រាជរដ្ឋាភិបាលកម្ពុជាចុះថ្ងៃទី៥ ខែមករា ឆ្នាំ២០២៣។
អនុក្រឹត្យលេខដដែលនេះបានកំណត់ថា ក្រុងអរិយក្សត្រ មានចំនួនសមាជិកក្រុមប្រឹក្សាចំនួន ១៩ នាក់ និងក្រុងសំពៅពូន ក៏មានចំនួនសមាជិកក្រុមប្រឹក្សា ១៩ នាក់ផងដែរ។
ដោយឡែក ចំពោះខេត្តកំពង់ស្ពឺ ក្រុងឧដុង្គម៉ែជ័យ មានចំនួនសមាជិកក្រុមប្រឹក្សា ១៧នាក់ និងស្រុក សាមគ្គីមុនីជ័យ មានចំនួនសមាជិកក្រុមប្រឹក្សា ១៩នាក់។ រីឯនៅស្រុក អូរគ្រៀងសែនជ័យ ក្នុងខេត្តក្រចេះ វិញមានចំនួនសមាជិកក្រុមប្រឹក្សា ១៥នាក់៕
