ភ្នំពេញៈ លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានឱ្យដឹងថា មានក្រុមហ៊ុនចំនួន២ ក្នុងចំណោមក្រុមហ៊ុនចំនួន១៩ បានធ្វើបណ្តឹងតវ៉ានឹងសេចក្តីសម្រេចរបស់គណៈកម្មាធិការជាតិការពារអ្នកប្រើប្រាស់ «គ.ជ.ក.ប.» ពាក់ព័ន្ធនឹងការផ្សាយពាណិជ្ជកម្មមិនសុចរិត។
ការប្ដឹងតវ៉ារបស់ក្រុមហ៊ុនចំនួន២នេះ បានធ្វើឡើងបន្ទាប់ពី គ.ជ.ក.ប. បានជួបជាមួយក្រុមហ៊ុនផ្សាយពាណិជ្ជកម្មទាំង១៩កាលពីពេលថ្មីៗនេះហើយគណៈកម្មាធិការនេះ ក៏បានចេញសេចក្តីសម្រេចដោយតម្រូវឱ្យក្រុមហ៊ុនទាំងនោះ ត្រូវធ្វើការកែសម្រួលសកម្មភាពនិងខ្លឹមសារផ្សព្វផ្សាយពាណិជ្ជកម្មរបស់ខ្លួន ហើយក្នុងករណីមិនអនុវត្តតាម នឹងចាត់វិធានការតាមច្បាប់ជាធរមាន។
លោក ផាន អូន បានប្រាប់ភ្នំពេញប៉ុស្តិ៍នៅថ្ងៃទី៨ មករា ថា បន្ទាប់ពី គ.ជ.ក.ប. បានចេញសេចក្តីសម្រេចនេះហើយ គឺមានក្រុមហ៊ុនចំនួន១៧ក្នុងចំណោមក្រុមហ៊ុនចំនួន១៩ បានទទួលស្គាល់កំហុស និងបានអនុវត្តទៅតាមស្មារតីនៃសេចក្តីសម្រេច។
ប៉ុន្តែ លោក ថា ក្នុងនោះមានក្រុមហ៊ុនចំនួន២ ដែលមិនសុខចិត្ត និងបានធ្វើបណ្តឹងតវ៉ាមក គ.ជ.ក.ប. ដែលលោក អះអាងថា គ.ជ.ក.ប.នឹងពិនិត្យមើលលើនីតិវិធីបន្តទៀត ជាមួយនឹងបណ្តឹងតវ៉ារបស់ក្រុមហ៊ុនទាំង២នេះ ដើម្បីចេញសេចក្តីសម្រេចជាលើកទី២ក្នុងពេលខាងមុខ។
លោកបានបញ្ជាក់ថា៖«យើងពិនិត្យឃើញថាមានក្រុមហ៊ុនចំនួន១៩ដែលមិនអនុលោមតាមច្បាប់ ហើយយើងបានចាត់វិធានការហ្នឹងទៅ ដោយគណៈកម្មាធិការជាតិការពារអ្នកប្រើប្រាស់បានប្រជុំគ្នា និងចេញសេចក្តីសម្រេចក្នុងក្របខ័ណ្ឌនៃការផ្សាយពាណិជ្ជកម្មដែលយើងចាត់ទុកថាជាការអនុវត្តមិនសុចរិតក្រោមច្បាប់ស្តីពីកិច្ចការពារអ្នកប្រើប្រាស់»។
លោកបានបន្តថា៖«ក្រុមហ៊ុនភាគច្រើនក្នុងចំណោមក្រុមហ៊ុនទាំង១៩នេះ គាត់បានអនុវត្តទៅតាមសេចក្តីសម្រេចរបស់គណៈកម្មាធិការជាតិការពារអ្នកប្រើប្រាស់ទៅលើអត្ថបទផ្សាយ ឬក៏ស្ប៉តផ្សាយពាណិជ្ជកម្មទំនិញ និងសេវារបស់គាត់។
ចំពោះក្រុមហ៊ុន២ ទៀត គឺគេបានធ្វើបណ្តឹងតវ៉ា ដែលតាមច្បាប់យើងគឺគេឱ្យមានបណ្តឹងតវ៉ា នៅពេលដែលក្រុមហ៊ុន អាចមានអំណះអំណាងជាយថាហេតុណាមួយអាចយល់ថា ខ្លួនមិនខុស។ បណ្តឹងតវ៉ានេះ គឺមាននៅក្នុងនីតិវិធី ដែលគណៈកម្មាធិការជាតិការពារអ្នកប្រើប្រាស់ នឹងធ្វើការវាយតម្លៃលើបណ្តឹងតវ៉ានេះ»។
យ៉ាងណាក្ដី ពាក់ព័ន្ធនឹងក្រុមហ៊ុនទាំងនេះ លោក ផាន អូន មិនទាន់អាចបញ្ជាក់បានទេថា ក្រុមហ៊ុនដែលល្មើសនឹងច្បាប់ស្តីពីកិច្ចការពារអ្នកប្រើប្រាស់មានឈ្មោះអ្វីខ្លះ ដោយលោកគ្រាន់តែអះអាងថា ក.ប.ប ឬគ.ជ.ក.ប.នឹងបញ្ចប់នីតិវិធី និងចេញសេចក្តីសម្រេចជាលើកទី២ ក្នុងពេលឆាប់ៗ។
ច្បាប់ស្តីពីកិច្ចការពារអ្នកប្រើប្រាស់ ត្រូវបានព្រះមហាក្សត្រព្រះបាទសម្តេចព្រះបរមនាថ នរោត្តម សីហមុនី ទ្រង់ឡាយព្រះហស្តលេខា ប្រកាសឱ្យប្រើប្រាស់កាលពីថ្ងៃទី២ ខែវិចិ្ឆកា ឆ្នាំ២០១៩ ដែលច្បាប់នេះមានគោលដៅធានាឱ្យមានកិច្ចការពារអ្នកប្រើប្រាស់ និងចូលរួមលើកកម្ពស់ការប្រកួតប្រជែងដោយសុចរិត។
លោក ផាន អូន បានអះអាងថា អំពើមិនសុចរិតក្នុងច្បាប់នេះ គឺសំដៅអំពើណាមួយដែលបុគ្គលនៅក្នុងធុរកិច្ចអាចបំភាន់ឬបោកបញ្ឆោតអ្នកប្រើប្រាស់ ទោះបីជាអំពើនោះធ្វើដោយចេតនាឬអចេតនាក៏ដោយ។ដូច្នេះហើយ គ.ជ.ក.ប ឬ ក.ប.ប. គឺសុទ្ធតែអាចចាត់វិធានការដោយយោងទៅលើច្បាប់នេះទាំងអស់។
យោងតាមច្បាប់ស្តីពីកិច្ចការពារអ្នកប្រើប្រាស់បានបញ្ញត្តថា រាល់អ្នកល្មើសទៅនឹងបទប្បញ្ញត្តិនៃច្បាប់នេះគឺអាចនឹងទទួលទណ្ឌកម្ម និងការពិន័យអន្តរការណ៍ ដែលរួមមាន ការព្រមានជាលាយលក្ខណ៍អក្សរ ការព្យួរ ការដកហូត ឬការលុបចោលវិញ្ញាបនបត្រចុះបញ្ជីពាណិជ្ជកម្ម ឬអាជ្ញាប័ណ្ណ ការពិន័យអន្តរការណ៍ ទោសពិន័យជាប្រាក់ និងទោសដាក់ពន្ធនាគារ។
ការព្រមានជាលាយលក្ខណ៍អក្សរ ការព្យួរ ការដកហូត ឬការលុបចោលវិញ្ញាបនបត្របញ្ជាក់ ការចុះបញ្ជីពាណិជ្ជកម្មឬអាជ្ញាប័ណ្ណ ជាសមត្ថកិច្ចរបស់គណៈកម្មាធិការជាតិការពារអ្នកប្រើប្រាស់ ខណៈការពិន័យអន្តរការណ៍ ជាសមត្ថកិច្ចរបស់មន្ត្រីស៊ើបអង្កេត ហើយការបង់ប្រាក់ពិន័យអន្តរការណ៍នាំឱ្យរលត់បណ្តឹងអាជ្ញា។ក្នុងករណីជនល្មើសមិនព្រមបង់ប្រាក់ពិន័យអន្តរការណ៍ មន្ត្រីស៊ើបអង្កេតអាចកសាងសំណុំរឿងបញ្ជូនទៅតុលាការ ។ នេះបើយោងតាមមាត្រា៤០ នៃច្បាប់ដដែលនេះ៕