.jpg)
លោក គង់ គាំ ឧត្តមទីប្រឹក្សាគណបក្សភ្លើងទៀន និងលោក ហ៊ុន សែន។ រូបថត ហុង មិនា និង SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានផ្ញើសារព្រមានដល់គណបក្សនយោបាយដែលវាយប្រហារគណបក្សប្រជាជនកម្ពុជា ថាប្រសិនបើបន្តវាយប្រហារតទៅទៀត គណបក្សលោក នឹងប្រើសិទ្ធិការពារខ្លួនក្នុងករណីចាំបាច់តាមរយៈផ្លូវច្បាប់ និងមួយទៀតប្រើ «ដំបង»។
លោក ហ៊ុន សែន លើកឡើងថា គណបក្សនយោបាយខ្លះ ក្នុងប៉ុន្មានថ្ងៃមកនេះ បានបើកការវាយប្រហារចំពោះគណបក្សប្រជាជនកម្ពុជា ហើយលោកក៏ដាក់ជាសំណួរថា តើគណបក្សនោះចង់ប្រែក្លាយខ្លួនទៅជាសត្រូវរបស់គណបក្សប្រជាជនឬក៏យ៉ាងណា? បើគណបក្សនោះចង់ឈ្នះឆ្នោត គឺគ្រាន់តែឃោសនាពីនយោបាយរបស់ខ្លួនទៅបានទេ ហើយចាំបាច់អ្វីមកវាយប្រហារគណបក្សប្រជាជន? លោកថ្លែងដូច្នេះ ក្នុងពិធីបើកការដ្ឋានសាងសង់ពង្រីក និងលើកកម្រិតគុណភាពកំណាត់ផ្លូវជាតិលេខ ៧ ចាប់ពីរង្វង់មូលស្គន់ ទីរួមស្រុកជើងព្រៃ រហូតដល់ទីរួមខេត្តកំពង់ចាម នាថ្ងៃទី ៩ មករា។
លោកបញ្ជាក់ថា៖ «ខ្ញុំសូមដាស់តឿនអ្នក បើសិនជាអ្នកបន្ត យើងខ្ញុំនឹងប្រើសិទ្ធិការពារខ្លួន ក្នុងករណីចាំបាច់តាមរយៈផ្លូវច្បាប់។ខ្ញុំគ្រាន់តែព្រមាន និងដាស់តឿនអ្នកឱ្យអ្នកបានយល់។ អ្នកប្រជុំនៅសៀមរាប តើអ្នកបានធ្វើអ្វី? អ្នកប្រជុំប៉ុន្មានថ្ងៃ នៅខេត្តកំពង់ចាមយើងនេះ នៅ[ស្រុក]ជើងព្រៃ។ អ្នកត្រូវយល់ឱ្យច្បាស់មិនមែនអ្វីអ្នកក៏ត្រូវធ្វើតាមចិត្តទេ»។
លោកបន្តថា៖ «ហើយអ្នកគិតថា អ្វីអាងតុលាការ ខ្ញុំចង់សួរអ្នកទៅវិញថា ជម្រើសមានតែ ២ ទេ មួយគឺប្រើផ្លូវច្បាប់ មួយទៀតគឺប្រើដំបងហ្មង! តើអ្នកយកមួយណា ២ ហ្នឹង? អាហ្នឹងអ្នកនិយាយឱ្យច្បាស់។ ខ្ញុំសូមព្រមានចំពោះអ្នក តើពួកខ្ញុំនេះ មិនទុកឱ្យពួកអ្នកចោទថា ជាចោរមួយជីវិតទេ ខ្ញុំសូមជម្រាបជូន ត្រូវតែបញ្ចប់វប្បធម៌ឡាំប៉ាក្រោយការបោះឆ្នោត»។
លោកបន្តថា គណបក្សប្រជាជនកម្ពុជា មិនអាចទទួលយកបាននូវពាក្យថាជា «ចោរលួចបន្លំសន្លឹកឆ្នោត» បាននោះទេ ហើយបើអ្នកណាហ៊ាននិយាយបែបនេះ គណបក្សលោកត្រូវតែប្តឹង ហើយសំណុំរឿងនៅតុលាការកំពូលក៏ត្រូវតែធ្វើដែរ។ លោកថា នេះមិនមែនជាសិទ្ធិបញ្ចេញមតិនោះទេ ក្នុងពេលដែលគណបក្សនោះវាយប្រហារគណបក្សប្រជាជនកម្ពុជា។ លោកថា៖ «អ្នកឯងនិយាយអ៊ីចឹងសិទ្ធិបញ្ចេញមតិ! អ៊ីចឹងដូច្នេះខ្ញុំក៏អាចបញ្ចេញមតិត្រឡប់ទៅវិញគឺប្រមូលមនុស្សទៅដល់កន្លែងអ្នកឯងហ្មង! តាមមកដល់ផ្ទះហ្មង! មិនមែនជាការគំរាមកំហែងទេ!»។
បន្ថែមពីនេះលោក ហ៊ុន សែន បានថ្លែងដោយចំឈ្មោះ និងបានផ្តាំទៅកាន់លោក គង់ គាំ ឧត្តមទីប្រឹក្សាគណបក្សភ្លើងទៀន ឱ្យបញ្ឈប់ការវាយប្រហារមកលើគណបក្សប្រជាជនកម្ពុជា។ លោកថា៖ «ខ្ញុំសូមដាស់តឿន ជាការព្រមានបន្ថែម។ អ្នកឯងសាកមើល! ហ៊ុន សែន ហ៊ានវ៉ៃខ្នោះចំពោះជនក្បត់ ដែលមានភ័ស្តុតាងគ្រប់គ្រាន់នៅម៉ោង១២យប់។ ហ៊ុន សែនគឺមិនខ្លាចអ្វីទាំងអស់ ទាក់ទងនឹងរឿងថែរក្សាសន្ដិភាព»។
លោកបន្តថា៖ «ខ្ញុំសុំព្រមានអ្នកឯង កុំឱ្យសោះ កុំ។ អ្នកឯងវ៉ៃប្រហារអី វ៉ៃទៅ! អ្នកឯងអួត អ្នកឯងវ៉ៃទៅ! អ្នកឯងវ៉ៃគណបក្សប្រជាជន អ្នកឯងដឹងថា គេឈឺទេ?»។
លោក គង់ គាំ ប្រាប់ ភ្នំពេញ ប៉ុស្តិ៍ថា លោកសោកស្តាយដែលហាក់ដូចជាមានការយល់ច្រឡំពីគ្នាច្រើនជាងពាក្យពេចន៍ដែលគណបក្សភ្លើងទៀនបានថ្លែង។ ពាក្យពេចន៍ដែលគណបក្សភ្លើងទៀនបានថ្លែង គឺគ្រាន់តែជាការប្រៀបធៀបអំពីពាក្យស្លោក «ផឹកទឹកឱ្យនឹកប្រភព ជ្រកម្លប់ឱ្យនឹកអ្នកដាំ»។ ចង់ប្រាប់សកម្មជន និងអ្នកគាំទ្រគណបក្សភ្លើងទៀនថា ប្រភពរបស់ខ្លួនគឺកិច្ចព្រមព្រៀងទីក្រុងប៉ារីស រដ្ឋធម្មនុញ្ញកម្ពុជា និងអ្នកដាំរបស់ខ្លួនគឺអ្នកប្រជាធិបតេយ្យសេរីពហុបក្ស។
លោកបន្តថា៖ «មិនបានលើកទ្រគោះបោះបោកអីខ្លាំងទៅលើគណបក្សប្រជាជនកម្ពុជានោះទេ»។ ពាក់ព័ន្ធនឹងសាររបស់ លោក ហ៊ុន សែន ដែលបានផ្តាំទៅកាន់លោក គង់ គាំ ឱ្យបញ្ឈប់ការវាយប្រហារនេះ លោក គង់ គាំ ថ្លែងថា៖ «បាទ! ខ្ញុំនឹងចេះតែទទួលឱវាទពីគាត់ហើយ ដោយសារថា យើងជាអ្នកធ្លាប់រួមរស់ជាមួយគ្នាផង ហើយ គេហៅថា ដំណាក់កាលនីមួយៗ យើងកាន់តែចាស់ទុំខាងប្រកួតប្រជែងហ្នឹងផង គឺថា យើងនឹងចៀសវាងអ្វីដែលគាត់បានទូន្មាន គាត់បានព្រមានយើងហ្នឹង គឺថា យើងនឹងចៀសវាងតាមដែលគាត់សំណូមពរអ៊ីចឹងទៅបាទ!»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព ថ្លែងថា លោកចង់ឃើញអ្នកនយោបាយអាចនឹងអង្គុយជជែកគ្នាហើយយកបញ្ហាមកដាក់លើតុហើយព្យាយាមដោះស្រាយមុនការបោះឆ្នោត។ លោកក៏ចង់ឃើញថា អ្វីដែលជាការព្រួយបារម្ភពីអ្នកពាក់ព័ន្ធនិងជាពិសេសពាក់ព័ន្ធនឹងបទបញ្ជានិងនីតិវិធីពាក់ព័ន្ធច្បាប់គឺគណៈកម្មាធិការជាតិរៀបចំការបោះឆ្នោត (គ.ជ.ប) ក៏ដូចរដ្ឋាភិបាលគួរតែពិចារណានៅក្នុងការយកនូវសំណើឬក៏អនុសាសន៍ទាំងអស់នោះទៅពិចារណាកែលម្អដើម្បីកាត់បន្ថយកុំឱ្យមានជម្លោះទាស់ទែងនៅក្រោយការបោះឆ្នោត។
លោកថ្លែងថា៖ «យើងអាចព្យាយាមធ្វើយ៉ាងណា ឱ្យមានការប្រាស្រ័យទាក់ទងគ្នាការជជែកគ្នាទោះបីនៅក្នុងកាលៈទេសៈណាក៏យើងអាចជជែកគ្នា យើងអាចស្វែងយល់ពីគ្នាទៅវិញទៅមក។ ឧទាហរណ៍ថា អ្នកនយោបាយនៅថ្នាក់ក្រោមដែលថា ពិបាកជជែកគ្នា ប៉ុន្តែអ្នកនយោបាយដែលជាថ្នាក់ដឹកនាំនយោបាយគួរតែមានការជជែកគ្នាខ្លះ ដែលជាការប្រសើរដើម្បីឱ្យមានការយល់គ្នាកាន់តែច្រើន»។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជាប្រាប់ភ្នំពេញប៉ុស្តិ៍ថា ខណៈជិតដល់ពេលវេលាបោះឆ្នោតជ្រើសតាំងតំណាងរាស្ត្រ អ្នកនយោបាយច្រើនតែយកការរិះគន់វាយបន្តុះបង្អាប់និងលាបពណ៌គ្នាទៅឃោសនានិងលើកឡើងក្នុងប្រព័ន្ធផ្សព្វផ្សាយជាដើម។ លោកថា វាល្មមដល់ពេលវេលាដែលអ្នកនយោបាយមានភាពចាស់ទុំក្នុងការកែប្រែទៅលើការរិះគន់មកជាការបង្ហាញពីគោលនយោបាយរបស់ខ្លួនវិញដែលមិនមែនជាគោលនយោបាយស្រមើស្រមៃតែជាគោលនយោបាយដែលមានការសិក្សាស្រាវជ្រាវច្បាស់លាស់មុននឹងចេញជាកម្មវិធីនយោបាយជាដើម។
លោកបញ្ជាក់ថា៖ «ប្រសិនបើយើងពិនិត្យមើលទៅលើសារនយោបាយរបស់សម្តេចប្រធានគណបក្សប្រជាជនកម្ពុជាថា នឹងតបតតាមផ្លូវច្បាប់ ជាការពិតហើយ នេះជាសារមួយដែលបានប្រាប់ទុកជាមុនថា ប្រសិនបើមានការវាយប្រហារឬក៏លាបពណ៌នយោបាយគណបក្សប្រជាជននឹងតបតតាមប្រព័ន្ធផ្លូវច្បាប់។ ការប្រើប្រាស់ប្រព័ន្ធផ្លូវច្បាប់ក្នុងការតបតនេះ គឺធ្វើឱ្យសង្គមមានសណ្តាប់ធ្នាប់ និងស្ថិរភាពនយោបាយ ហើយប្រសិនបើគណបក្សប្រជាជនមិនតបតតាមប្រព័ន្ធផ្លូវច្បាប់ទេ គឺមានន័យថា គណបក្សប្រជាជនយល់ស្របនឹងការរិះគន់របស់បក្សផ្សេង ឬក៏បុគ្គលផ្សេងដែលតែងតែលាបពណ៌នោះហើយ»៕
វីដេអូ៖
